Զարմացած է

Մինչ հայ հանրությունը եւ ոստիկանությունը զբաղված են հանրահավաքով, զարմանալիորեն շատերի ուշադրությունից վրիպեց այն, ինչն ասել է ՀՀ արտգործնախարար ԷԴՎԱՐԴ ՆԱԼԲԱՆԴՅԱՆԸ բրազիլական «Էստադաո» թերթին տված հարցազրույցում. «Հայաստանը երբեք հարցականի տակ չի դնի Հայոց ցեղասպանության փաստը, դրա միջազգային ճանաչման կարեւորությունը»: Մինչդեռ արտգործնախարարի ասածը ֆունդամենտալ հիմնադրույթ է: Երբ ԼՏՊ-ն էր նախագահ, բոլոր նորմալ հայերը երազում էին այն ժամանակների մասին, երբ ՀՀ արտգործնախարարն այդպես է արտահայտվելու: Իսկ հիմա դա մեզ համար նույնքան սովորական է, ինչքան այն, որ օդը շնչելու համար է նախատեսված:
Այն, որ մեր ոստիկանությունը ցուցարարներին շատ կիրթ ձեւով տեղահանեց Բաղրամյան պողոտայից, բոլորս տեսանք ուղիղ հեռարձակմամբ:

Դե, իսկ արեւմտամոլ քարոզչամիջոցներն էլ, չունենալով ռեալ ասելիք «ահավոր ոստիկանական բռնությունների» մասին, զարմանալիորեն որոշեցին առաջնորդվել Թումանյանի հեքիաթի հերոսի տրամաբանությամբ` էնպիսի սուտ ասել, որ... Եվ ինչ մոգոնեն` իբր ոստիկանության մամլո խոսնակ ԱՇՈՏ ԱՀԱՐՈՆՅԱՆԸ քաղաքացիական հագուստով ուղարկվել էր, որ խառնվի ցուցարարներին, եւ իբր նա քաշքշել եւ հայհոյել է: Ախր, 02 վարելիս նա այնքան է երեւացել եթերում, որ չճանաչող չկա, եւ ամենաֆանտաստիկն է հենց նրան «ծպտյալ» ուղարկել ցուցարարների մեջ: Համ էլ, մամլո խոսնակին ոստիկանական օպերացիայի մասնակից ներկայացնելը մոտավորապես նույնն է, ինչ փորձել ծիրանի ծառի վրա բանան պատրաստել: Ինչեւէ, զարմանալով հանդերձ, մնում է ենթադրել, որ այդ քարոզիչները հայհոյանք տալուց շատ հեռու գտնվող Ահարոնյանին վերջը սովորեցնելու են հայհոյել:
Բավականին զարմանալի բաներ է հայտարարել արեւմտամոլ «իրավապաշտպան» ԱՎԵՏԻՔ ԻՇԽԱՆՅԱՆԸ ՀՀ սահմանադրության մասին: Երկար տրտնջալով, որ ժամանակին ասվում էր, թե մեզ ուժեղ նախագահ է պետք, իսկ այժմ բերվում է պատերազմող Իսրայելի խորհրդարանական կառավարման արդյունավետության օրինակը, նա ի վերջո հանգեց մի զարմանալի ցանկության. «Ես կպատռեի Սահմանադրության առաջին երկու գլուխները, որովհետեւ ինձ հետաքրքրում է` ինչպես է ձեւավորվում իշխանությունը, կա իրական տարանջատում, թե` ոչ: Իսկ հռչակագրային դրույթները շատ հաճախ ոտնատակ են արվում, այդ թվում` ԵՏՄ-ին անդամակցելու ժամանակ»: Դե ինչ, լավ է, որ Սահմանադրության օրինակները պետական հիմնարկներ եւ գրախանութներ հասնելուց առաջ չեն անցնում պարոն Իշխանյանի ձեռքով: Այլապես, հասցեատերերին կհասնեին պատռած էջերով, ճիշտ այնպես, ինչպես Բիբլիան` Լուիս Սթիվենսոնի նկարագրած ծովահենների հետ առնչվելուց հետո:
Իսկ մեր հարեւան մազութային սուլթանատին հաստատ վախ բռնող է պետք: Այն բանից հետո, որ ԶԼՄ-ներում տարածվեց լուրը, թե Հայաստանին տրամադրվելու են «Իսկանդեր» տիպի հրթիռներ, Բաքվում այնպիսի վայնասուն են կապել, կարծես այդ հրթիռներն արդեն գլխներին են թափվել: Դե, ձեռի հետ էլ, որոշ ռուս փորձագետներ խտացնում են այդ վախերը: Զորօրինակ, ռազմական փորձագետ ԱԼԵՔՍԱՆԴՐ ԽՐԱՄՉԻԽԻՆԸ հայտարարել է հենց ադրբեջանական ԶԼՄ-ներին տված հարցազրույցում. «Նպատակն անվտանգության ապահովումն է, իսկ թե որ կողմից, դա երկրորդական հարց է: Հրթիռի վրա հո գրված չէ, թե ում դեմ է այն ուղղված` Թուրքիայի, Ադրբեջանի, թե՞ ԻՊ գրոհայինների: Հրթիռները ուղղված են լինելու Հայաստանի ցանկացած թշնամու դեմ, այդ թվում` Ադրբեջանի: Իմիջիայլոց Վրաստանը նույնպես այդ ցուցակում է, քանի որ այդ հանրապետությունը Ռուսաստանի հակառակորդն է եւ կարող է խոչընդոտել ռազմական տեխնիկան Հայաստան տեղափոխելուն»: Ինչեւէ, զարմանալով հանդերձ, մնում է եզրակացնել, որ Ադրբեջանի դեմ որեւէ հրթիռ կիրառելն ավելորդ է: Բավական է միայն կիրառման մասին հավարը գցել, եւ Բաքվում շատերը վախից ավելի շուտ կմեռնեն, քան այնտեղ կհասնի նույնիսկ ամենասրընթաց հրթիռը:

Զարմացած է
ՀՈՎՀԱՆՆԵՍ ԳԱԼԱՋՅԱՆԸ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝