ՀԻՄԱ ԷԼ ԲԵՆԶԻՆԻ՞ՆԸ

ՀԻՄԱ ԷԼ ԲԵՆԶԻՆԻ՞ՆԸ

Երեկ առավոտվանից երեւանյան բենզալցակայաններում  մոտ 10-20 դրամով անսպասելիորեն թանկացել է բենզինը: Թե ինչը կարող էր այս հերթական թանկացման պատճառը լինել, եւ որքանով է այն օբյեկտիվ, երբ նավթի էժանացման թեման օրակարգից չի իջնում, փորձեցինք հետաքրքրվել տնտեսագետ ՎԻԼԵՆ ԽԱՉԱՏՐՅԱՆԻՑ, ով նկատեց.
- Կարծում եմ՝ օբյեկտիվ որեւէ պատճառ չկար` բենզինի գների բարձրացման համար: Թանկացման վրա կարող էր ազդել նավթի գինը, բայց նավթի գները չեն բարձրացել: Կարծում եմ՝ բենզինի թանկացման վրա  որոշ չափով կարող են ազդել փոխարժեքի տատանումները, թե չէ այլ գործոնների ազդեցություն այս պահին հնարավոր չեմ համարում:

Քանի որ  բենզինի այս թանկացումը արդեն իսկ որոշ մասնագետներ կապում են միայն ներկրող մոնոպոլիստների ցանկությամբ, դիմեցինք նաեւ Տնտեսական մրցակցության պաշտպանության պետական հանձնաժողովին: Մամուլի պատասխանատու Գայանե Սահակյանը մեզ հետ զրույցում մասնավորապես ասաց.- Համապատասխան մասնագետները մոնիտորինգ են իրականացրել, որի արդյունքները ներկայացվել են հանձնաժողովին: Եթե հանձնաժողովը հաստատի, որ իսկապես եղել է բարձրացում, հանդես կգամ հայտարարությամբ:  
Փորձեցինք բացատրություն ստանալ նաեւ ներկրողներից: Սակայն վերջիններս հիմնականում «ջրի տակ» են անցել: Հնարավոր եղավ կապվել միայն «Ֆլեշ» ընկերության հետ, որտեղից միայն տեղեկացրին. «Այս պահին իրավասու չենք որեւէ բան ասել»:
ԻԼՈՆԱ ԱԶԱՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝