«ՀՈՒԶՎԱԾ ԷԻ, ԹԵ ՉԷ ԱՎԵԼԻ ԼԱՎ ԿԵՐԳԵԻ, ԵՍ ԴԵՌ ՁԱՅՆ ՈՒՆԵՄ»

«ՀՈՒԶՎԱԾ ԷԻ, ԹԵ ՉԷ ԱՎԵԼԻ ԼԱՎ ԿԵՐԳԵԻ, ԵՍ ԴԵՌ ՁԱՅՆ ՈՒՆԵՄ»

Օրերս Ալ. Սպենդիարյանի անվան Օպերայի եւ բալետի ազգային ակադեմաիակն թատրոնում կայացավ ՀՀ ժողովրդական արտիստ ՕՖԵԼՅԱ ՀԱՄԲԱՐՁՈՒՄՅԱՆԻ 90-ամյակին նվիրված հոբելյանական երեկոն: Ողջ երեկոյի ընթացքում պարբերաբար բեմի մեծ էկրանից երգչուհու սերնդակից հայտնի դեմքերն իրենց լավագույն հիշողություններով ու պատմություններով, առանձնակի ջերմությամբ խոսում էին երգչուհու անզուգական լինելու մասին: Իսկ դրանք պարբերաբար ընդմիջվում էին լավագույն երգիչ-երգչուհիների, երգի ու պարի պետական կոլեկտիվների կատարումներով:

Երեկոյի ավարտին բեմ դուրս եկավ նաեւ ժողովրդական արտիստի դուստրը` հանրահայտ ջազ երգչուհի ՏԱԹԵՎԻԿ ՀՈՎՀԱՆՆԻՍՅԱՆԸ, ով ԱՄՆ-ից Հայաստան էր ժամանել 2 օրով` հատուկ հոբելյանական միջոցառման համար: Հայտնի ջազ երգչուհին երկու անակնկալ էր պատրաստել հանդիսատեսի համար: Նախ` հանդես եկավ ոչ թե ջազային իր որեւէ կատարումով, այլ` ժողովրդական պոպուրին կատարեց ջազային մատուցմամբ: Ի դեպ, հենց Օֆելյա Համբարձումյանը միշտ դեմ է եղել դստեր ջազային երգչուհի դառնալուն, բայց, կարծես թե, 90-ամյա անզուգական երգչուհին ժամանակի ընթացքում «հարմարվել է» այդ փաստին, քանի որ չէր կարողանում թաքցնել հուզմունքն ու հպարտությունը` դստեր կատարման ընթացքում: Ինչեւէ, երգի կատարումից հետո Տ. Հովհաննիսյանն ասաց. «Ես էլ մերվեցի այս երեկոյին` երգելով ավելի հիմնավոր արվեստ, ինչն ուզում եմ շարունակել` ներկայացնելով ձեզ մի արտակարգ անակնկալ, մի անակնկալ, որի համար ինքս եմ զարմացել: Պատմության մեջ առաջինն է լինելու, երեւի այսօրվան էր սպասում, պիտի կատարվեր: Համոզել եմ, որպեսզի միասին մի գեղեցիկ երգ կատարենք»-, ասաց երգչուհին ու դանդաղ քայլերն ուղղեց դեպի դահլիճ` հայացքով փնտրելով մայրիկին: Ու մինչ կմատուցեին անակնկալը, Տ. Հովհաննիսյանը հպարտորեն ասաց. «Այսպիսի երեւույթ ինչպիսին նա է, անկեղծ, նրա համար չեմ ասում, որ իմ մայրն է, պարզապես այսպիսի երաժիշտները, որոնք դարեդար կշարունակեն ուսուցանելով` մեր հայ ժողովրդի երաժշտությունը կայացնելու համար, բացառիկ է: Սա մի ձայն է, որ երբեք չի դադարի ջերմացնել մարդկանց սրտերը»:
Դահլիճը քար լռությամբ, շունչը պահած վայելում էր 90-ամյա անզուգական երգչուհու ու դստեր հրաշալի զուգերգը, որը պատմության մեջ կայացավ առաջին անգամ եւ ապացուցեց, որ լավ երգչուհու համար տարիքը երբեք չի խլում ձայնը: Դա փաստեց նաեւ Օ. Համբարձումյանը, երբ հանդիսատեսի անդադար ծափահարությունների, բրավոների ուղեկցությամբ բեմ բարձրացավ, որի ընթացքում նաեւ հանդիսատեսի շարքերից պարբերաբար լսվում էր. «Ա՛յ, իսկական աստղը նա է...»:
Բեմ հասնելուն պես, ժողովրդի սերը վայելած երգչուհին շունչը տեղը բերելով` ասաց. «Այնքան եմ հուզվել, որ չեմ կարողանում խոսել: Սիրելի ժողովուրդ, այս սերը ես մոտ 60-70 տարի եմ վայելում, շնորհակալ եմ բոլորին: Հուզված էի, թե չէ ավելի լավ կերգեի, ես դեռ ձայն ունեմ»,- ժպիտով ասաց հոբելյարն ու նույն տոնով շարունակեց. «Չկարծե՛ք, թե բեմ բարձրանալը հեշտ բան է, ոչ, հուզմունքի բուն է»:
ԼԻԼԻԹ ԵՂԻԱԶԱՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝