ՀԷՑ-Ը ՀԵՐՔՈՒՄ Է ՍԵՆՍԱՑԻՈՆ ՏԵՂԵԿՈՒԹՅՈՒՆԸ

ՀԷՑ-Ը  ՀԵՐՔՈՒՄ Է ՍԵՆՍԱՑԻՈՆ  ՏԵՂԵԿՈՒԹՅՈՒՆԸ

ՀԷՑ-ի հասարակայնության և ԶԼՄ-ների հետ կապերի դեպարտամենտի պետ Նատալյա Սարջանյանը հերքում է այն տեղեկությունը, թե ՀԷՑ-ը հոսանքն ընդամենը 6,02 դրամի թանկացման հայտ  է ներկայացրել իշխանություններին, իսկ թե որտեղից են նման տեղեկությունները  նա չգիտի:

«Ոչ-ոչ ՀԷՑ-ը ներկայացրել է 17 դրամի թանկացման հայտ»,- «Իրավունք»-ի հարցին ի պատասխան ասաց Սարջանյանը: Հիշեցնենք, որ, օրեր առաջ «Ոչ թալանին» նախաձեռնության անդամ Վաղինակ Շուշանյանը սենսացիոն հայտարարություն արեց այն մասին, որ  ՀԷՑ-ի իրենց  աղբյուրից տեղեկացել են, որ էլեկտրացանցերը 6,02 դրամի հոսանքի թանկացման  հայտ է ներկայացրել սկզբնապես, իսկ հետագայում այն  17 դրամի հասցնելը և ապա 6,93 դրամի թանկացումը իշխանությունների ձեռքի գործն է։

Այն, որ ՀԷՑ-ը ի դեմս Սարջանյանի պաշտոնապես հերքում է նման հայտարարությունը բավականին տրամաբանական է, որին այս պահին կարելի է փիլիսոփայորեն վերաբերվել, բայց այն, որ առանց կրակ ծուխ չի լինում, դա էլ հստակ է: Այս ֆոնին, արդեն Բիբինի լռությունը կարելի է որակել ոչ թե արհամարհանքի դրսևորում հայ հասարակության պահանջի հանդեպ, այլև՝ «շատ գիտես, քիչ խոսիր, որ չվնասես» կարգախոսի ներքո իրականացվող քաղաքականության դրսևորում, քանի որ դժվար է պատկերացնել, որ «Ինտեր ՌԱՕ»-ն, որը  2015 թվականի առաջին եռամսյակին ունեցել է  ընդհանուր եկամուտի 14,2 %-ի աճ, իսկ  Հայաստանից ստացված եկամուտը անցյալ տարվա համեմատ աճել է 65,3 %-ով՝ 2014 թ.-ի  օգոստոսին էլեկտրաէներգիայի սակագինը 4 դրամով բարձրացնելու և դրամ-դոլար-ռուսական ռուբլի փոխարժեքների փոփոխության արդյունքում:

Այս պայմաններում դժվար է պատկերացնել, որ «Ինտեր ՌԱՕ»-ն դժգոհ կլինի Բիբիից էլ, մեր իշխանություններից էլ, քանի որ մյուս երկրների համեմատ բավականին մեծ է եղել Հայաստանւց ստացվող եկամուտի չափը: Չնայած անցյալ տարվա ընթացքում դոլարի փոխարժեքի կտրուկ տատանման պատճառը այդպես էլ ոչ ոք չհասկացավ, բայց ամիսների հեռավորությունից կարելի է ասել որ չի բացառվում նաև, որ այն հենց պայմանավորված էր «գազ-հոսանք» խաղից շահույթով դուրս գալու համար: Սրանք հարցեր են, որոնք դեռևս մասնագիտական վերլուծության և մեկնաբանության կարիք ունեն: Այնպես, որ այս խմորը դեռ երկար ջուր կվերցնի, իսկ թե այդ ընթացքում ով ջրից չոր դուրս կգա դեռ վաղ է ասել:

ԱՐՄԻՆԵ  ԳՐԻԳՈՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝