ՀԱՐԳԱՆՔԻ ՏՈՒՐՔ` ՆՎԻՐՎԱԾ ՍԵՐՈ ԽԱՆԶԱԴՅԱՆԻ ՀԻՇԱՏԱԿԻՆ

ՀԱՐԳԱՆՔԻ ՏՈՒՐՔ`ՆՎԻՐՎԱԾ ՍԵՐՈ ԽԱՆԶԱԴՅԱՆԻ ՀԻՇԱՏԱԿԻՆ

Հունիսի 26-ին լրացավ հայ արձակագիր, ՀԽՍՀ մշակույթի վաստակավոր գործիչ ՍԵՐՈ ԽԱՆԶԱԴՅԱՆԻ մահվան 17-րդ տարելիցը: Մեծանուն հային իրենց հարգանքի տուրքը մատուցելու եւ խոնարհումը բերելու համար Կոմիտասի անվան Պանթեոնում էին հավաքվել գրողի հարազատները, ընկերները, ինչպես նաեւ գրողի անունը կրող  Երեւանի  հ.184 ավագ դպրոցի տնօրեն ԱՇՈՏ ՀԱՐՈՒԹՅՈՒՆՅԱՆԸ եւ ուսուցչական անձնակազմը: Հավաքվածները ծաղիկներ դրեցին գրողի շիրիմին` մեկ առ մեկ հիշելով նրա  ստեղծագործությունները, որոնք պատմականորեն մեծ արժեք են ներկայացնում: Հարազատների ու ընկերների խոսքով`գրողն ունեցել է անսպառ հումոր, որով միշտ ուրախացրել է իրեն շրջապատողներին. «Սերոն հայտնվում էր ամենապատասխանատու պահին, նրա խոսքը ազդեցիկ էր, տեղին ու հզոր: Մենք երիտասարդներս հաճախ էինք շփվում նրա հետ,  լավ էր վերաբերվում  եւ խրախուսում էր երիտասարդ գրողներին: Ս. Խանզադյանը հանրագիտարան էր, ով անգիր գիտեր Հայաստանն իր գյուղերով ու տեղանուններով, զարմանալի էր թե ինչպես էր այդքանը հիշում: Մի օր այս հարցը տվեցի նրան, ասաց, որ առավորտյան արթնանում է, մի բաժակ օղի է խնում ու սկսում աշխատել մինչեւ կեսգիշեր: Ամեն օր գրել, կարդալ ու աշխատել, սա է մեծ գրողի տքնանքը: Խանզադյանը շատ է գրել է ու թողել գրական մեծ ժառանգությունը, որը կաեւոր է պատմականորեն եւ գեղարվեստորեն»,-նշեց Հայաստանի գրողների միության նախագահ ԷԴՎԱՐԴ ՄԻԼԻՏՈՆՅԱՆԸ:

Գրողի քույրը`ՎԵՐՋԻՆԵ ԽԱՆԶԱԴՅԱՆԸ «Իրավունքի» հետ զրույցում հիշեց մի քանի դեպք`կապված գրողի հետ, որոնք միշտ ուղեկցում են նրան. «Ճակատագրի բերումով  ամուսնացել էի զինվորականի հետ եւ ապրում էի Կիեւում: Մի անգամ տղաս ասաց, որ Կիեւում մեծ ցուցապաստառով քեռի Սերոյի նկարն է դրված`չհավատացի: Երկու օր անց զանգահարեց Սերոն եւ ասաց, որ Կիեւում է, եկել է մասնակցելու քաղաքի օրվան: Այդ ժամանակ քաղաքի պաշտոնյաններից մեկը նրան մի մեծ տուփ էր նվիրել, տուփի պարունակությունը շատ էր ուրախացրել նրա: Ելույթի ժամանակ Սերոն ասաց. «Հայաստանից բոլորը հող են խլում, իսկ Ուկրաինիան հող է նվիրում»,-պատմեց Վ. Խանզադյանը, ով անկեղծանալով նաեւ ասաց, որ իր անունը շատ է սիրում, քանի որ իրեն անվանակոչել է գրողը:

Նշենք, որ յուրաքանչյուր տարի Ս. Խանզադյանի անվան հ. 184 ավագ դպրոցի տնօրինությունը գրողի հարազատների հետ միասին մասնակցում է գրողի ծննդյան տարեդարձին նվիրված միջոցառումներին, ինչպես նաև հարգանքի իր տուրքն է մատուցում գրողի մահվան տարելիցին:

ԶՎԱՐԹ ԽԱՉԱՏՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝