ԴՊՐՈՑԱԿԱՆ ԴՐԱՄԱՀԱՎԱՔՈՒԹՅՈՒՆՆԵՐԻՑ ԱՄՌԱՆՆ ԷԼ ՊՐԾՈՒՄ ՉԿԱ

ԴՊՐՈՑԱԿԱՆ ԴՐԱՄԱՀԱՎԱՔՈՒԹՅՈՒՆՆԵՐԻՑ ԱՄՌԱՆՆ ԷԼ ՊՐԾՈՒՄ ՉԿԱ

Այն, որ սեպտեմբերի 1-ի՝ ամեն նոր ուսումնական տարվա մեկնարկի հետ տրվում է նաեւ դպրոցական դրամահավաքությունների մեկնարկը, նոր բան չէ եւ, ճիշտն ասած, նույնիսկ հասցրել ենք հաշտվել: Տարօրինակ է, որ այս անգամ դրամահավաքությունների մասին ենք խոսում նաեւ թեժ ամառային սեզոնին, բայց պարզվում է, մի շարք դպրոցներում գլխի են ընկել դրամահավաքությունները նաեւ ամառ տեղափոխելու մասին: Ամեն դեպքում՝ նման ահազանգեր այս օրերին շատերից ենք ստացել: Պատճառաբանությունն է՝ փող է պետք` վերանորոգման համար: Լավ, ինչքա՞ն կարելի է ծնողների գրպաններից դուրս չգալ: Դա էլ մի կողմ. դպրոցը պետական շինություն է, եւ պատկան մարմիններն էլ քանիցս հավաստիացրել են, թե վերանորոգումների հարցում խնդիրներ չունեն: Ուրեմն, ստացվում է, որ դա արդեն ծնողների հո՞գսն է, երբ ամեն տարի կրթության համակարգին տրվող բյուջետային փողերը միայն ավելանում են: Դե, մնում էր Երեւանի քաղաքապետարանի կրթության վարչության պետ ԳԱՅԱՆԵ ՍՈՂՈՄՈՆՅԱՆԻՑ ճշտել, թե այս ինչ է կատարվում իր ղեկավարած համակարգում: Ու պարզվում է.

-Յուրաքանչյուր դպրոց ֆինանսավորվում է աշակերտների թվով, եւ յուրաքանչյուր դպրոց նախորդ տարվա բյուջեի ֆինանսավորման մեջ ունի տող, որտեղ ընթացիկ տարվա աշխատանքներն են նախատեսվում` իր ունեցած տնտեսումների հաշվին: Եթե դպրոցը տնտեսումներ է ունենում, կարողանում է վերանորոգել շենքը, դասասենյակը, բայց եթե չի կարողանում վերանորոգել, չունի այդքան տնտեսումներ, այլ կերպ ասած՝ իր կարիքները հազիվ է կարողանում բավարարել, հետեւաբար, եթե ծնողները, միայն կամավորության սկզբունքով, կարողանում են իրենց երեխայի դասարանը վերանորոգել, ներկել, դա արդեն կախված է ծնողների մոտեցումներից: Այսինքն, եթե նման հարցերում կա պարտադրանք, խստագույնս կպատժվի այդ տնօրենը, ով ինքնագործունեությամբ է զբաղվում` հատկապես քաղաքապետի հանձնարարականից հետո: Ինձ համար մի փոքր զարմանալի է, որ կան նման դեպքեր: Որպեսզի ինձ օգնեք եւ արմատախիլ անեք նման երեւույթը, պարզապես կցանկանամ տեղեկացնեք մեզ, թե կոնկրետ որ դպրոցը կամ դպրոցներն են, որոնք բողոքի նման ալիքի տեղիք են տվել: Սովորաբար վերանորոգման հետ կապված` նման բաներ արվում են օգոստոսի կեսերից, ամեն դեպքում, եկեք միանանք եւ արմատախիլ անենք տհաճ երեւույթը:
- Որեւէ օրենք կա՞, որը թույլ տալիս է պետական շենքի՝ դպրոցի շինաշխատանքների համար մասնավորից՝ ծնողից անհատույց գումար ստանալ: Եթե չկա, ապա դա չի՞ նշանակում, որ նման ցանկացած դրամահավաքություն ապօրինություն է:
- Իհարկե, որեւէ օրենք նման բան չի պարտադրում ծնողին. ծնողին կարող է առաջարկվել, բայց ոչ պարտադրվել: Եվ որպեսզի նման տհաճ դեպքերը բացառենք, նորից եմ կրկնում, օգնեք մեզ բացահայտել նման տնօրեններին, դասղեկներին, եւ ես ի պաշտոնե խոստանում եմ, որ նրանք, ովքեր ծնողներին կամ աշակերտներին պարտադրում են գումար հավաքել, խստագույնս կպատժվեն:

«ՕՐԵՆՔ` ՈՐՊԵՍ ԱՅԴՊԻՍԻՆ,
ՈՐ ԾՆՈՂԸ ԹԵԿՈՒԶ ԿԱՄԱՎՈՐ ԳՈՒՄԱՐ ՀԱՏԿԱՑՆԻ ԴՊՐՈՑԻՆ, ԻՆՉ ԽՈՍՔ, ՉԿԱ»
Վայ, տիկին Սողոմոնյան, ուզում եք բացահայտել ու մեր հույսի՞ն եք մնացել. լավ էլի: Մի խոսքով, փորձեցինք ավելի սպառիչ պատասխաններ ստանալ վերադաս օղակից՝ Կրթության եւ գիտության նախարարության հանրակրթության վարչության պետ ՆԱՐԻՆԵ ՀՈՎՀԱՆՆԻՍՅԱՆԻՑ: Մասնավորապես, որ կամավոր դրամահավաքությունն ի վերջո նշանակում է պարտադիր:
- Կամավորը պարտադիր դառնալու գործընթացն իհարկե ժխտում եմ. չի կարող նման բան լինել ¥բայց այդ ո՞ր ծնողը, ելնելով թեկուզեւ իր երեխայի հետ «թարսվելու» չբացառվող հեռանկարից, «կամավոր» այդ մուծումները տարին շարունակ չի կատարում- հեղ.¤ : Բայց եթե դպրոցը որեւէ կարիք ունի եւ իր կարիքը ներկայացնում է ծնողական խորհրդին` առանց պարտադրելու, վերջիններս էլ միանում եւ լուծում են դպրոցի որեւէ կարիք, դրա արգելքը չկա:
- Մի՞թե դպրոցին հատկացված պետական միջոցները բավարար չեն` դպրոցի կարիքները հոգալու համար, եւ որքանո՞վ է արդարացի, որ պետական կառույցի վերանորոգման համար ծնողները պետք է գումար հատկացնեն:
- Դրանք պետական միջոցներից զատ են, գուցե այդ դպրոցում միջոցները չեն հերիքում, կամ այն վերանորոգման ծրագրում չկա: Բայց եթե դպրոցը խնդիր ունի, ասենք օրինակ, սանհանգույց կարգավորելու, կարող է հանգիստ դիմել ե՛ւ ծնողներին, ե՛ւ բարերարներին, ե՛ւ համայնքին, որպեսզի իր դպրոցի կարիքը հոգա, դա նորմալ է:
- Ասացիք նորմալ է, իսկ նման օրենք գոյություն ունի՞, որ ծնողը պետք է թեկուզ կամավոր գումար հատկացնի` պետական կառույցը վերանորոգելու համար:
- Չէ, խնդիրն օրենքի մեջ չէ, այլ կարիքը հոգալու մեջ է, իսկ կարիք հոգալը, այո, ինչու ոչ, նաեւ ծնողական համայնքի խնդիրն է: Բայց նման օրենք` որպես այդպիսին, որ ծնողը թեկուզ կամովին գումար հատկացնի դպրոցին, ինչ խոսք, չկա:
- Այսինքն` ստացվում է, որ ամեն դեպքում դա ապօրինություն է, եթե որեւէ օրենքի կետով նման բան չի նախատեսվում:
- Չի կարելի նման ձեւակերպում տալ, ցանկացած դրամահավաք պարզապես ծնողի կամեցողությամբ է լինում, իսկ դա ապօրինություն կոչելը ճիշտ չէ:
- Բայց ծնողը ինչքա՞ն կարող է, հատկապես այս ծանր սոցիալական պայմաններում,  «կամովի» վճարել մե՛կ դպրոցի վերանորոգման, մեկ ավարտական երեկոյի, մե՛կ միանման համազգեստի եւ նմանատիպ բազում, այսպես ասած, դպրոցի կարիքների համար:
-  Նույն ծնողները կարող են չմասնակցել եւ ոչ մի դրամահավաքի, թող չվճարեն, ասենք, Ձեր նշած միասնական հագուստի համար, դա դպրոցի ներքին կանոն է: Տեղեր կան, որտեղ հենց ծնողներն են առաջարկում դպրոցներին, որպեսզի գումար հավաքեն եւ միասնական համազգեստ գնեն բոլորի համար, քանի որ դժվարանում են ամեն օր երեխաներին տարբեր զգեստներով ճանապարհել դպրոց: Այսօր ամեն բան շատ թափանցիկ, եւ ոչ ոք ոչ ոքի չի կարող պարտադրել. չի ուզում ծնողը` թող չանի:
- Չե՞ք կարծում, որ ոչ մի ծնող չի ցանկանա, որ իր երեխան հետ մնա մյուսից, եւ արդեն ստիպված իր վերջին կոպեկը տալիս է դպրոցին, որպեսզի հետագայում դա որեւէ կեպ չանդրադառնա երեխայի վրա, չընկճվի:
- Նման բան թող ծնողները չմտածեն, եթե չունեն, թող չտան, թող ընդվզեն, դա որեւէ խնդիր չի առաջացնի ո՛չ ծնողի համար, ո՛չ էլ առավել եւս աշակերտի:
Մեկ ուշագրավ հանգամանք նկատենք. եթե տարիներ առաջ պատկան աշխատակիցները գոնե ձեւի համար ասում էին, թե դրամահավաքությունները` պարտադիր թե կամավոր, արգելված են, ապա այսօր ստացվում է, որ համակարգի ղեկավարությունը սկսել է արդարացնել դա, անշուշտ շատ լավ հասկանալով, թե իրականում ուր է գնում այդ հավաքված փողերի մի մասը, եւ ինչպես են ծախսվում պետական հատկացումները: Լավ, առաջիկայում կփորձենք տեսնել, թե նախարա՞րն ինչ է մտածում օրենքով չթույլատրված այդ գործառույթին ու այն կամավորության անվան տակ արդարացնելու փորձերին:
ԻԼՈՆԱ ԱԶԱՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝