Զարմացած է ՀՈՎՀԱՆՆԵՍ ԳԱԼԱՋՅԱՆԸ

Բավականին զարմանալի հայտարարություն է արել «Քաղաքացիական պայմանագիր» կուսակցության անդամ, հայտնի ընդդիմադիր ՍԱՍՈՒՆ ՄԻՔԱՅԵԼՅԱՆԸ. «Այս շարժումն անպայման հաղթելու է, քանի որ քաղաքական առաջնորդ չկա»: Դե ինչ, ուշագրավ խոստովանություն է, որը բխում է մեր վայ-ընդդիմադիրների վերջին տարիների տխուր փորձից: Պարզապես զարմանալի է, որ դա ասում է մի այնպիսի միավորի ներկայացուցիչ, որը քաղաքական առաջնորդ ունի` ի դեմս Նիկոլ Փաշինյանի: Երեւի թե, Սասուն Միքայելյանը մի պահ մոռացել է, որ ինքն այլեւս անկուսակցական չէ, իր կուսակցությունն էլ ունի առաջնորդ:

Սասուն Միքայելյանի ասածը հաստատում է նաեւ քաղաքագետ ԱԼԵՔՍԱՆԴՐ ԻՍԿԱՆԴԱՐՅԱՆԸ. «Այն, ինչ այսօր կատարվում է Բաղրամյան պողոտայում եւ Ազատության հրապարակում, քաղաքականությունը քաղաքական գործընթացից դուրս մղելու անմիջական հետեւանք է: Հայաստանում դա արտահայտվում է քաղաքացիների փողոցային ակտիվության տեսքով: Քաղաքացիական բողոքի ակցիաները քաղաքական դժգոհության արտահայտություն է. գոլորշին պետք է ինչ-որ ձեւով դուրս գա, եւ եթե գոլորշին բաց թողնող չկա, երկրում իրական ընդդիմություն չկա, կամ ընդդիմությունն այնքան թույլ է, որ անգամ չի փորձում օգտագործել քաղաքացիական բողոքի ալիքը եւ ծառայեցնել այն իր նպատակներին, ունենում ենք այն, ինչ ունենք»: Այ, քաղաքագետը լիովին իրավացի է, որ ընդդիմությունն ահավոր թույլ է, բայց որ չի փորձում քաղաքացիական շարժումն օգտագործել` դրանում Իսկանդարյանը սխալվում է: Լավ էլ փորձում է` կողքից դիրքավորվելով եւ ձգտելով երիտասարդ ցուցարարներին մղել անկանխատեսելի քայլերի, որպեսզի պղտոր ջրում ձուկ բռնելու շանս առաջանա:
Իսկ հայտնի ՀՀՇ-ական, Երեւանի նախկին քաղաքապետ ՎԱՀԱԳՆ ԽԱՉԱՏՐՅԱՆԸ հայտարարել է. «Մենք հուշել ենք այն տեղերը, որտեղ կարելի է արդյունավետ ծախս կատարելով` իջեցնել սակագինը: 6 տարվա մեջ` 2009-ից մենք 2 անգամ հոսանքի գինը բարձրացնում ենք: Մեր ի՞նչն է 2 անգամ ավելացել: Քաղաքացիների եկամուտնե՞րն են ավելացել, աշխատավարձե՞րը, տնտեսությո՞ւնն է 2 անգամ արագ զարգացել»: Չգիտենք` տնտեսագիտության տեսանկյունից Խաչատրյանը ճիշտ է, թե` սխալ: Միգուցեեւ իրավացի է 100 տոկոսով, սակայն զարմանալի է, որ նախկին իշխանավորը խոսում է փողն արդյունավետ ծախսելու մասին: Այդքան արդյունավետ ծախսող եք` արդյունավետ ծախսեիք, երբ իշխանության մեջ էիք, թե չէ գեղեցիկ այդ ճառն արտասանել այսօր` կարողանում է ոչ միայն յուրաքանչյուր քաղաքական գործիչ, այլեւ յուրաքանչյուր տաքսիստ:
Իսկ այժմ մի տարօրինակ եւ զարմանալի երեւույթի մասին, որը նկատելի է երիտասարդ ցուցարարների մոտ: Տարիներ անցան, տասնամյակներ անցան, բայց այդպես էլ չպրծանք ՕՏԱՐԱԼԵԶՈՒ պաստառներ պարզելու գեշ խասյաթից: Ինքներդ ասում եք, որ քաղաքականությունից հեռու եք, որ զուտ մեկ հարց ունեք լուծելու, սակայն ինչո՞ւ նույն` ձեր չսիրած ու ձախողակ ընդդիմությունից ընդօրինակել եք պաստառների մի մասը անգլերեն եւ ռուսերեն գրելու սովորույթը: Ինչ է, օտարների համա՞ր եք գրում: Երբ է վերջապես մեր երկրում ձեւավորվելու այն մշակույթը, որ պահանջելիք ունենանք միայն սեփական իշխանությունից, իսկ օտարի կարծիքը մեզ նույնքան քիչ հետաքրքրի, որքան օտարին մեր կարծիքն է հետաքրքրում:
Եվ վերջապես մեզ դրականորեն զարմացրեց մայրաքաղաքի փոխոստիկանապետ ՎԱԼԵՐԻ ՕՍԻՊՅԱՆԸ: Երբ նա շրջայց էր կատարում ցուցարարների շարքերով, ռուս լրագրողներից մեկը հարց ուղղեց, թե որոշել է հյո՞ւր գալ ցուցարարներին, ինչը զարմացրեց Օսիպյանին (այ-այ-այ, իմ մենաշնորհն է խլում) եւ նա պատասխանեց.  «Ի՞նչ հյուր, սա մեր ժողովուրդն է, մենք մի ժողովուրդ ենք ու չենք տարանջատում ոստիկանությունը ժողովրդից: Մենք չենք գտնվում տարբեր բեւեռներում, սա մեր ժողովուրդն է»: Երեւի թե, օտարազգիները չեն կարողանում ըմբռնել հայի հոգեբանությունը ու ուղեղները պարզապես կախում է` թե ինչպես կարող է ցուցարարներին ջրցաններով ու մահակներով ցրելու հրաման տված ոստիկանական պաշտոնյան ընդամենը մեկ-երկու օր անց անկաշկանդ շփվել նույն ցուցարարների հետ: Դե պատկերացնում եմ, թե ինչքան կզարմանան օտարներն այն փաստից, որ ոստիկաններն ու ցուցարարները նույնիսկ միասին ֆուտբոլ են խաղացել:

Զարմացած է  
ՀՈՎՀԱՆՆԵՍ ԳԱԼԱՋՅԱՆԸ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝