ԱՐՈՆՅԱՆԸ ԴԵՌ «ՔԱՐԱՑԱԾ» ՄԱՐԶԱՎԻՃԱԿՈՒՄ Է

ԱՐՈՆՅԱՆԸ ԴԵՌ «ՔԱՐԱՑԱԾ» ՄԱՐԶԱՎԻՃԱԿՈՒՄ Է

Ստավանգերում շարունակվում է Norway Chess 2015 դասական շախմատի սուպերմրցաշարը, եւ այս անգամ եւս Հայաստանի հավաքականի առաջատար Լեւոն Արոնյանը դարձյալ աչքի չի ընկնում տպավորիչ ելույթներով: Այժմ Արոնյանի հաղթանակները նույնքան անսպասելի են լինում, որքան նախկինում նրա պարտությունները կամ ոչ-ոքիները:

Այսպես՝ սուպերմրցաշարի առաջին տուրում Լեւոն Արոնյանը սեւերով պարտվեց ֆրանսիացի Մաքսիմ Վաշյե-Լագրավին: Երկրորդ տուրում Արոնյանը ոչ-ոքի խաղաց Գրիշչուկի հետ, ինչը, թերեւս, ստիպված ենք լավ արդյունք համարել: Նույն «լավ» արդյունքն էր երրորդ տուրում նորվեգացի Յոն Լյուդվիգ Համերի հետ պարտիան: Սուպերմրցաշարի չորրորդ տուրում պարտություն կրեց բուլղարացի Վեսելին Տոպալովի հետ խաղում: Միայն հինգերորդ տուրն էր, որ հաջող ստացվեց՝ Արոնյանը վերջապես հաղթանակ տարավ Կարուանայի նկատմամբ, որից հետո նորից միավորը կիսեց Գիրի հետ:
Այսպիսով՝ բուլղարացի Վեսելին Տոպալովը 5.5 միավորով միանձնյա գլխավորում է սուպերմրցաշարային աղյուսակը: Անանդը եւ Նակամուրան ունեն 4-ական, իսկ Անիշ Գիրին՝ 3.5 միավոր: Շախմատի Հայաստանի հավաքականի առաջատարը, Վաշյե-Լագրավը եւ Կարուանան ունեն 2.5 միավոր: Միակ «մխիթարանքն» այն է, որ Աշխարհի չեմպիոն Մագնուս Կարլսենը հավաքել է կես միավոր պակաս եւ գտնվում է մեկ աստիճան ներքեւ: Իսկ վերջին հորիզոնականում գտնվող Համերն իր ակտիվում ունի 1.5 միավոր:
Մի խոսքով` այն, որ անկախ մրցաշարի մակարդակից՝ Արոնյանը տեւական ժամանակահատված է, որ հիմնականում բավարարվում է ոչ-ոքիներով, կարելի է արդեն կայացած փաստ համարել: Մինչդեռ, ինչպես ուժեղների, այնպես էլ՝ համեմատաբար թույլերի հետ այդ ոչ-ոքիների շարանը հուշում է, որ մի կողմից՝ Արոնյանը դեռ ուժեղագույնների հետ նույն շարքում է, մյուս կողմից էլ, որ միջինների հետ եւս նույն «քաշային կարգում» է գործում: Տարօրինա՞կ է. թերեւս: Բայց դա գոնե հույսեր է տալիս, որ այս քարացած պատկերն Արոնյանը կկարողանա ճեղքել՝ կրկին հաստատվելով ամենաուժեղների շարքերում: Հակառակ ուղղությամբ «ճեղքման» դեպքում՝ հայաստանյան շախմատն արդեն նոր առաջատարի խնդիր կունենա:

ՔՐԻՍՏԻՆԵ ՊԵՏՐՈՍՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝