«ԱՅՍ ՖԻԼՄԸ ՊԵՏՔ Է ՇԱՐՈՒՆԱԿՈՒԹՅՈՒՆ ՈՒՆԵՆԱ»
Արխիվ 12-16
«ԱՅՍ ՖԻԼՄԸ ՊԵՏՔ Է ՇԱՐՈՒՆԱԿՈՒԹՅՈՒՆ ՈՒՆԵՆԱ»
Օրերս «Մոսկվա» կինոթատրոնում կայացավ ««Արմենիա». Ծովից ծով» վավերագրական ֆիլմի ցուցադրությունը: Այն նկարահանվել է արձակագիր Զորի Բալայանի «Ծովից ծով Հայաստան» գրքի հիման վրա, իսկ ռեժիսորն է Վահե Գեւորգյանցը:
Ֆիլմի հիմքում մոտ 2 տարի ու 3 ամիս տեւացած «Արմենիա» առագաստանավի նավարկությունն է` նվիրված հայոց մայրերին: Առագաստանավն անցել է 80 հազար կիլոմետր, 3 օվկիանոսներում եւ 5 մայրցամաքներում է եղել, հանդիպել է տարբեր երկրների հայկական համայնքներին:
Պրեմիերայից հետո «Իրավունքի» հետ զրույցում ԶՈՐԻ ԲԱԼԱՅԱՆՆ ասաց, որ գոհ է հեռանում ֆիլմի առաջնեկ ցուցադրությունից. «Նայում էի ֆիլմն ու մտածում հաջորդ ֆիլմի մասին, քանի որ սա մի մասնիկն է, այսպես ասած, մեր երթուղու: Առանձին ֆիլմ պետք է նկարահանվի հայ եկեղեցիների մասին, դա շատ հետաքրքիր է, ինչպես նաեւ հայերի մասին, ովքեր օտարության մեջ են գտնվում: Մի ամբողջ գիրք եմ գրել, ուստի, այս ֆիլմը պետք է շարունակություն ունենա: Սա նախերգանքն է»:
Պրեմիերային ներկա ՀՀ մշակույթի նախարար ՀԱՍՄԻԿ ՊՈՂՈՍՅԱՆԸ ընդգծեց. «Ֆիլմն ինձ շատ դուր եկավ: Մեկ անգամ եւս հաստատեցինք, որ մեզ համար գոյություն չունեն սահմաններ, որ մեզ կարող ենք թույլ տալ այն, ինչ իրենց են թույլ տալիս հզոր պետությունները: Եվս մեկ անգամ համոզվեցինք, որտեղ էլ հանգրվանում ենք, կա մի փոքր Հայաստան, եւ շատ կարեւոր է, որ այդ Հայաստանը ոչ միայն ֆիզիկապես կա, այլեւ իր բոլոր դրսեւորումներով: Ֆիլմում շատ հայրենասիրություն կա. ամեն մի մանրուք հայրենասիրության մի խորհրդանիշ էր»:
Ֆիլմի երաժշտության հեղինակ ՎԱՀԱՆ ԱՐԾՐՈՒՆԻՆ էլ նշեց. «Կարծում եմ` ճշմարիտ ազգային պաթոսն արտահայտել արվեստի լեզվով` շատ ծանր խնդիր է: Կարեւոր է չափի զգացողությունը: Երաժշտության շատ նուրբ կետեր կան, որոնք չի կարելի չափազանցնել եւ ուժգնությունը պետք է համահունչ լինի ընդհանուր սցենարի զարգացմանը: Առաջին անգամ եմ ֆիլմը դիտում, առաջին տպավորություններս. էմոցիոնալ էր շատ»:
ՎԼԱԴ ՄՈՒՐԱԴՅԱՆ
Բաժանորդագրվե՛ք https://t.me/iravunk
1
31272 դիտում
2
8112 դիտում
3
2569 դիտում
4
1760 դիտում
5
1635 դիտում
2
19251 դիտում
3
17693 դիտում
4
11364 դիտում
5
8286 դիտում
