ՆԵՐԿԱՅԻՍ ԴԻՍԿՈՄՖՈՐՏՆ ԱՌԱՋԱՑԵԼ Է ԻՐԱՎԱՍՈՒԹՅՈՒՆՆԵՐԸ ՃԻՇՏ ՉԿԱՏԱՐԵԼՈՒ ՀԵՏԵՎԱՆՔՈՎ

ՆԵՐԿԱՅԻՍ ԴԻՍԿՈՄՖՈՐՏՆ ԱՌԱՋԱՑԵԼ Է ԻՐԱՎԱՍՈՒԹՅՈՒՆՆԵՐԸ  ՃԻՇՏ ՉԿԱՏԱՐԵԼՈՒ  ՀԵՏԵՎԱՆՔՈՎ. Վ. ԲՈՍՏԱՆՋՅԱՆ

Մայիսի 28-ին «Ինտեր ՌԱՕ» խմբի կողմից հրապարակած 2015 թ.-ի առաջին եռամսյակի ֆինանսական հաշվետվությունում սևով սպիտակի վրա նշված է, որ «Ինտեր ՌԱՕ»-ի ընդհանուր եկամուտն առաջին եռամսյակին աճել է 14,2 %-ով (26,9 միլիարդ ռուբլի) և կազմել է 216 միլիարդ ռուբլի:

Հայաստանին վերաբերող տողում էլ նշված է, որ մեր երկրից ստացված եկամուտն աճել է 65,3 %-ով, որը պայմամավորված է 2014 թ.-ի օգոստոսին էլեկտրաէներգիայի սակագնի բարձրացմամբ և ռուսական ռուբլու նկատմամաբ հայկական դրամի փոխարժեքի աճով: Փաստորեն, ստացվում է, որ  «Ինտեր ՌԱՕ» խմբի անդամ «Ինտեր ՌԱՕ ԵԷՍ»-ի 100 տոկոս սեփականատեր ՀԷՑ-ը 2015 թվականին բավականին արդյունավետ է աշխատել և իր «ընտանիքի» բյուջեն հարստացրել է 2,3 միլիարդ ռուբլու չափով: Այս ֆոնին առավել, քան զավեշտալի է թվում ՀԷՑ-ի կողմից ներկայացված էլեկտրաէներգիայի սակագնի 17 դրամով թանկացման մասին հայտն ընդհանրապես և Նազարյանի հանձնաժողովի կողմից,  որպես «լավություն»,  այն մոտ 7 դրամով բարձրացնելու մասին պատճառաբանությունները՝ մասնավորապես:

Տնտեսագետ, ԱԺ նախկին պատգամավոր  Վարդան Բոստանջյանը «Իրավունք»-ի հետ զրույցում անդրադառնալով «Ինտեր ՌԱՕ»-ի հայաստանյան սեգմենտից ստացված 65,3 % շահույթին և դրանց հիմքերին նշեց, որ բոլոր մենաշնորհների դեպքում էլ տնտեսվարող սուբյեկտների հանդեպ վարվող տնտեսական քաղաքականությունը էականորեն տարբերվում է այլ տնտեսվարող սուբյեկտների հանդեպ վարվող քաղաքականությունից:

«Բնական մենաշնորհները կառավարող տնտեսվարող սուբյեկտները, մասնավորապես՝ ջրամատակարարումը, գազամատակարարումը, էլեկտրաէներգիայի մատակարարումը, երկթուղային տրասպորտը  և այլ նման ինստիտուտներ միշտ աշխատում են անվրեպ և շահույթով: Դրանց գործունեության կարգավորման, զսպման և «շահույթ» կատեգորիայի առումով նրանք խնդիր չունեն, քանի որ հանրությունն է օգտվում այդ ծառայություններից և այս ընկերությունների շահույթը զսպելու համար աշխարհի բոլոր պետությունները ստեղծել են հանրային ծառայությունները կարգավորող հանձնաժողովներ, որը սահմանում է խելամիտ շահույթի մակարդակը: 65,3 % շահույթը նշանակում է, որ տվյալ ծառայությունը չի գործել բնականոն և այն սահմաններում, որը պետք է իրականացներ հանրային ծառայությունները կարգավորող հանձնաժողովը»,- ասում է Վ. Բոստանջյանը:

Տնտեսագետի խոսքով հանրային ծառայությունները կարգավորող մարմինն իհարկե պետք է մտածի բնական մենաշնորհի օբյեկտների մասին, բայց կա ավելի կարևոր հարց, որ հանձնաժողովի գերակա խնդիրը պետք է լինի բնակչության և քաղաքացիների մասին  մտածելը:

«Ներկայիս դիսկոմֆորտը և ճեղքվածքը առաջացել է այդ իրավասությունները հստակորեն և ճիշտ չկատարելու հետևանքով և այս առումով երիտասարդները, որոնք ոտքի են կանգնել և չեն նահանջում նշանակում է, որ արդեն բաժակը լցվել է»,- ասում է Վ. Բոստանջյանը:

ԱՐՄԻՆԵ ԳՐԻԳՈՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝