ԵԽԽՎ-ՈՒՄ ՀԱՅԱՍՏԱՆՅԱՆ ՊԱՏՎԻՐԱԿՈՒԹՅԱՆԸ ՀԱՋՈՂՎԵՑ ԱԴՐԲԵՋԱՆԱԿԱՆ ԶԵԿՈՒՅՑԻՑ ՀԱՆԵԼ ՀԱԿԱՀԱՅԿԱԿԱՆ ՁԵՎԱԿԵՐՊՈՒՄԸ

ԵԽԽՎ-ՈՒՄ ՀԱՅԱՍՏԱՆՅԱՆ ՊԱՏՎԻՐԱԿՈՒԹՅԱՆԸ ՀԱՋՈՂՎԵՑ ԱԴՐԲԵՋԱՆԱԿԱՆ ԶԵԿՈՒՅՑԻՑ ՀԱՆԵԼ ՀԱԿԱՀԱՅԿԱԿԱՆ ՁԵՎԱԿԵՐՊՈՒՄԸ

Երեկ գիշեր Ստրասբուրգում ընթացող ԵԽԽՎ ամառային նստաշրջանի նիստում քվեարկվել է Ադրբեջանում քաղաքացիական ինստիտուտների գործունեության վերաբերյալ մոնիտորինգի հանձնաժողովի համազեկուցողների պատրաստած զեկույցը: ԵԽԽՎ-ում հայաստանյան պատվիրակության մեծ ջանքերի շնորհիվ զեկույցն ընդունվել է առանց հակահայկական` «օկուպացված տարածքներ» ձեւակերպման, որը կար զեկույցի նախնական տեքստում: Արդյունքում ԵԽԽՎ պատգամավորների մեծամասնությունը իրենց քվեարկությամբ մերժել են պրոադրբեջանական դիրքորոշում ունեցող համազեկուցողներ Պեդրո Ագրամունդի եւ Թադեուշ Իվինսկու կողմից պատրաստված զեկույցի այդ հատվածը, որի հետ Ադրբեջանը մեծ հույսեր էր կապում:

Հիշեցնենք, որ ավելի վաղ ԵԽԽՎ-ում քննարկման է դրվել վերոնշյալ «Ժողովրդավարական հաստատությունների գործունեությունն Ադրբեջանում» զեկույցի նախագիծը, որի վերաբերյալ ԱԺ փոխնախագահ ՀԵՐՄԻՆԵ ՆԱՂԴԱԼՅԱՆԻ ելույթը փոխանցվել է քարտուղարությանը` շեշտադրելով հայկական պատվիրակության դժգոհությունը զեկույցի առնչությամբ: Տիկին Նաղդալյանը մասնավորապես նշել է. «Պարոն Ագրամունտի եւ պարոն Իվինսկու կողմից մշակված` «Ադրբեջանում ժողովրդավարական հաստատությունների գործունեության» վերաբերյալ զեկույցը ափսոսանք եւ դառնություն է առաջացնում: Համազեկուցողները բացարձակ անտեսել են Վեհաժողովի արժեքներն ու սկզբունքները: Խորը մտահոգության եւ հիասթափության առիթ է այն, որ զեկույցը զուրկ է Ադրբեջանում քաղաքական իրավիճակի ադեկվատ արտացոլումից` մարդու իրավունքների եւ ժողովրդավարության առումով: Փաստաթղթի հիմնական էությունը պետք է լիներ երկրում ժողովրդավարական կառույցների վիճակը, փոխարենը` զեկույցի հենց առաջին պարբերության մեջ հեղինակները անդրադառնում են էներգետիկ ռեսուրսներին, որոնք «առանցքային դեր» են խաղում երկրում, ինչպես նաեւ` Լեռնային Ղարաբաղի խնդրին: Նրանք փորձում են ,,աշխարհաքաղաքական պատճառներով,, արդարացնել դատապարտելի իրավիճակը հիմնարար ազատությունների ոլորտում, ինչը որեւէ առնչություն չունի ժողովրդավարական հաստատությունների գործունեության հետ` առկա ներքին քաղաքական խնդիրների ողջ պատասխանատվությունը գցելով Հայաստանի ու հայերի վրա: Սա պարզ արտացոլումն է Ադրբեջանի պետական քարոզչության:

Ինչպե՞ս կարող է պարոն Ագրամունտի եւ պարոն Իվինսկու դիրքորոշումն այդքան տարբերվել մարդու իրավունքների Հանձնակատար Մուիժնիեկսի եւ ԵԱՀԿ մամուլի ազատության հարցերով ներկայացուցիչ Դունյա Միյատովիչի գնահատականներից, ովքեր խստորեն դատապարտել են Ադրբեջանում մարդու իրավունքների վիճակը, ներառյալ` հարյուրավոր քաղբանտարկյալների առկայությունը: Այդուհանդերձ, զեկուցողները որեւէ մտահոգություն չեն հայտնում երկրում ստեղծված իրավիճակի աննախադեպ բացասական գնահատականների շուրջ, որոնք տրվել են մարդու իրավունքների միջազգային դիտորդների կողմից:

Բավական տխրեցնող է, որ ադրբեջանական քարոզչության սիրված դրույթները հնչեցնելով` մեր գործընկերները իրենց ցուցադրել են որպես ադրբեջանական ավտորիտար ռեժիմի անձնական ներկայացուցիչներ:

Ավելին, Լեռնային Ղարաբաղի հակամարտությանն անդրադառնալիս` զեկուցողները ամբողջությամբ անտեսել են միջազգային հանրության` մասնավորապես խնդրին առնչվող ԵԱՀԿ Մինսկի խմբի համանախագահների դիրքորոշումը: Զեկույցում տեղ գտած ձեւակերպումը բավականին միակողմանի է: Հետեւաբար, փաստաթղթում չի կարելի չնկատել հակահայկական կեցվածքն ու կողմնակալությունը եւ զեկուցողների հուսահատ փորձերը` շեղելու Ադրբեջանի իշխանությունների պատասխանատվությունը երկրում առկա խնդիրներից, այդ թվում` մարդու իրավունքների սարսափելի վիճակից: Այս երկրի իշխանությունները ամեն ժողովրդավարականի ժխտման քաղաքականության գագաթնակետին են: Վերջերս նրանք ԵԱՀԿ-ին մեկ ամիս ժամանակ են տվել` դադարեցնելու իր գործունեությունը երկրում: Եվ սա նախքան խորհրդարանական ընտրությունների ամիսներն են, որոնք տեղի են ունենալու այս տարվա աշնանը: Պատկերը շատ պարզ է` ԵԱՀԿ / ԺՀՄԻԳ –ի դիտորդական առաքելությունը չի ողջունվում Ադրբեջանում:

Այնպես որ, փաստերը հստակ հարց են առաջացնում` ինչպե՞ս կարող է հանդուրժվել Եվրոպայի խորհրդի անդամ պետության նման վարքագիծը:

Մենք կոչ ենք անում գործընկերներին հավատարիմ մնալ ԵԽԽՎ առաքելությանն ու նպատակներին եւ խուսափել կողմնակալ ու կոռումպացված փաստաթղթերի ընդունումից , ինչը վարկաբեկում է մեր կազմակերպությանը»:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝