ԲԵՐՄԱՆ ԵՆԹԱՐԿՎԱԾՆԵՐԻ ԹԻՎՆ ԱՆՆԱԽԱԴԵՊ Է, ՆՐԱՆՑ ԹՎՈՒՄ ԵՆ ՆԱԵՎ ԼՐԱԳՐՈՂՆԵՐ

ԲԵՐՄԱՆ ԵՆԹԱՐԿՎԱԾՆԵՐԻ  ԹԻՎՆ ԱՆՆԱԽԱԴԵՊ Է,  ՆՐԱՆՑ ԹՎՈՒՄ ԵՆ ՆԱԵՎ ԼՐԱԳՐՈՂՆԵՐ

ՀՀ ոստիկանության հասարակայնության հետ կապերի և լրատվության բաժնից «Իրավունք»-ին տեղեկացրեցին, որ այս պահի դրութjամբ ոստիկանության տարբեր բաժիններ բերման է ենթարկվել 237 անձ: Ներկայումս պարզվում է նրանց ինքնությունը: Նրանցից քանիսն են լրագրողներ և հատկապես ո՞ր  լրատվամիջոցների ներկայացուցիչներ են հարցին ոստիկանությունից պատասխանեցին, որ դեռևս նման տեղեկություն չկա, քանի որ անձերի ինքնությունը պարզելու գործընթացը չի ավարտվել:

Հիշեցնենք, որ հունիսի 22-ին ընդդեմ  էլեկտրաէներգիայի թանկացման «Ոչ թալանին» նախաձեռնության անդամները ավարտելով  վաղօրոք հայտարարաած եռօրյա նստացույցը երթով շարժվեցին դեպի ՀՀ նախագահի նստավայր, սակայն ոստիկանությունը փակել էր Բաղրամյան պողոտայի մի մասը, որի պատճառով  ակցիայի մասնակիցները հնարավորություն չունեցան շարունակել իրենց բողոքի երթը: Ոստիկանությունը ցուցարարներին տեղեկացրել էր, որ  նախագահականը պատրաստ է ընդունել ցուցարարների  5 հոգանոց խմբին ու լսել նրանց պահանջները, սակայն նրանք հրաժարվեցին, պատճառաբանելով, որ հոսանքի թանկացման հարցը յուրաքանչյուրին է վերաբերում, նույնիսկ ոստիկաններին, իսկ հասարակության պահանջը մեկն է՝ չեղյալ հայտարարել հոսանքի թանկացման մասին Նազարյանի հանձնաժողովի կայացրած որոշումը:

Ակցիայի մասնակիցները ողջ գիշեր նստած մնալով Բաղրամյան պողոտայի սկզբնամասում շարունակում էին բողոքի ակցիան, սակայն լուսադեմին՝  հրաժարվելով Օսիպյանի վերջին ՝ Բաղրամյան պողոտան բացելու և ակցիան այլ վայրում շարունակելու առաջարկը , ոստիկանությունը ժամը 5.20-ի շրջակայքում օգտագործելով ջրցան մեքենա և հատուկ տեխնիկա  ազատեց Բաղրամյան պողոտան և վերականգնեց երթևեկությունը:

Տեղեկացնենք նաև, որ մինչ ոստիկանությունը կպարզի թե քանի լրագրող է բերման ենթակվել և պաշտոնական տվյալներ կներկայացնի, մամուլում արդեն հրապարակվել են տեղեկություններ, համաձայն որի բերման ենթարկվածների թվում  են  ՀԵՏՔ-ի, Գալա Հեռուստաընկերության, «Հայկական Ժամանակ» օրաթերթի, news.am-ի և panarmenian.net-ի լրագրողները:

ԱՐՄԻՆԵ  ԳՐԻԳՈՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝