Ա. ԹՈՐԳՈՄՅԱՆ. «ՉԵՄ ԳՏԵԼ ԱՅՆՊԻՍԻ ՄԱՐԴՈՒ, ՈՎ ԿԱՐՈՂ Է ԻՄ ԲՆԱՎՈՐՈՒԹՅԱՆԸ ՀԱՐՄԱՐՎԵԼ» (ՆՈՐ ՖՈՏՈՇԱՐՔ)

Ա. ԹՈՐԳՈՄՅԱՆ. «ՉԵՄ ԳՏԵԼ ԱՅՆՊԻՍԻ ՄԱՐԴՈՒ, ՈՎ ԿԱՐՈՂ Է ԻՄ ԲՆԱՎՈՐՈՒԹՅԱՆԸ ՀԱՐՄԱՐՎԵԼ» (ՆՈՐ ՖՈՏՈՇԱՐՔ)

Մոդել, դերասան ԱՐԱՄ ԹՈՐԳՈՄՅԱՆՆ, ով «Լսո՞ւմ ես ինձ, ճակատագի՛ր» ֆիլմում գլխավոր դերակատարներից մեկն էր ու նկարահանվել էր բավական համարձակ տեսարաններում, այժմ` հանրության դատին է հանձնել իր ոչ պակաս համարձակ նոր ֆոտոշարքը: Այս, ինչպես նաեւ իր անձնական կյանքի ու ապագա ծրագրերի մասին էլ «Իրավունքը» զրուցեց հենց նրա հետ:

- Նախ անդրադառնանք Ձեր նոր ֆոտոշարքին. ինչպե՞ս ծնվեց գաղափարը եւ ովքե՞ր են մտահաղացման հեղինակները:

- Մտահաղացումն իմն էր, որը քննարկեցինք իմ լուսանկարիչ ընկեր Կարեն Հովհաննիսյանի հետ, եկանք ընդհանուր հայտարարի ու ստացանք այսպիսի ֆոտոշարք:

- Ֆոտոշարքում Դուք ուրախ, տխուր, սեքսուալ կերպարներում եք, բայց միմիայն սեւ ու սպիտակ գույների մեջ: Իսկ կյանքում ի՞նչ գույներ եք նախընտրում:

- Իմ կյանքն իսկապես գունավոր է ու ամեն օր նոր գույներ եմ ավելացնում եղածին, որպեսզի ձանձրալի չլինի: Այնպես որ, սիրում եմ կյանքը ու կյանքն էլ` ինձ:

- Թե՛ «Լսո՞ւմ ես ինձ, ճակատագի՛ր» ֆիլմում, թե՛ նոր ֆոտոշարքում շատ համարձակ կերպարով եք ներկայացել հանրությանը: Պարզապես այդպես է ստացվո՞ւմ, թե՞ դա համահունչ է նաեւ Ձեր իրական կերպարին:

- Ամեն ինչ իր չափի մեջ է գեղեցիկ: Հետեւաբար, ամեն ինչ անում եմ, որ ինչքան էլ համարձակ լինի, բաց տեսարաններ լինեն կամ ֆոտոշարքեր, հանկարծ վուլգար չդիտվի այդ ամենը: Ըստ իս, պետք է լինեն որոշակի սահմաններ, որպեսզի ե՛ւ նայվող լինի, ե՛ւ քննադատությունների չարժանանանք:

- Եթե լինեն այլ ֆիլմերում նկարահանվելու առաջարկներ, հետաքրքիր է` ո՞ր դերերից կհրաժարվեք ու ինչպիսի՞ ֆիլմերում եք Ձեզ տեսնում:

- Միանշանակ կհրաժարվեմ, այսպես ասած, «մասովկա» խաղալուց: Ինչ վերաբերում է, թե ինչպիսի ֆիլմերում եմ ինձ տեսնում, միանգամից ասեմ, որ բոլոր կերպարներն էլ հետաքրքիր են եւ յուրաքանչյուր կերպարի հետ կկարողանամ համակերպվել ու սիրուն մատուցել այն: Այսինքն` կարող է լինել մելոդրամա, սարսափ ֆիլմ կամ կատակերգություն, միայն թե չլինի «շաբլոն»` նույնատիպ:

- Թերեւս ինձ չեն ների Ձեր երկրպագուհիները, եթե չհարցնեմ` ազա՞տ է Արամ Թորգոմյանի սիրտը:

- Ազատ է սիրտս, որովհետեւ չեմ գտել այնպիսի մարդու, ով կարող է իմ բնավորությանը հարմարվել: Ունեմ բարդ բնավորություն, հին մտածելակերպ, որը մեր օրերում քիչ մարդիկ են հասկանում:

- Միգուցե ոչ թե հին, այլ հայկական ավանդական մտածելակե՞րպ ունեք:

- Ուղիղ նշանակետին էր:

- Ի՞նչ ծրագրեր ունեք ապագայում` թե՛ որպես դերասան, թե՛ որպես մոդել:

- Դեռ շուտ է խոսել ծրագրերիս մասին, որովհետեւ չեմ սկսել իրագործել, բայց ժամանակի ընթացքում ամեն ինչ պարզ կլինի:

- Ի վերջո, ո՞րն է սիրված լինելու ու, կարծես, հոլիվուդյան Ձեր կերպարի գաղտնիքը:

- Դեռ աշխատում եմ այդ ուղղությամբ ու չեմ պատրաստվում հիմա որեւէ բաղադրատոմս բացահայտել:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝