«ՆՈՐ ՍԵՐՆԴԻ ՄՈԴԵԼՆԵՐԸ ՔԻՉ ԵՆ, ՈՎՔԵՐ ԷԼ ԿԱՆ, ԳՐԵԹԵ ԻՄ ՍԵՐՆԴԱԿԻՑՆԵՐՆ ԵՆ»

«ՆՈՐ ՍԵՐՆԴԻ ՄՈԴԵԼՆԵՐԸ ՔԻՉ ԵՆ, ՈՎՔԵՐ ԷԼ ԿԱՆ, ԳՐԵԹԵ ԻՄ ՍԵՐՆԴԱԿԻՑՆԵՐՆ ԵՆ»

Օրերս կայացավ «Թոփ մոդել Երեւան 2015» եւ «Թոփ մոդել Չարենցավան 2015» մանկական մրցույթների եզրափակիչ փուլը: Պրոֆեսիոնալ ժյուրին ընտրեց լավագույններին, որոնցից հատուկ անվանակարգերում հաղթողներին իրավունք կընձեռվի մասնակցելու աշնանը կայանալիք «Little Miss World» հանրահայտ մրցույթին: Այս մասին «Իրավունքին» տեղեկացրեց «Թոփ մոդել Հայաստան» ազգային ասոցիացիայի հիմնադիր ԳԵՎՈՐԳ ԱՍԱՏՐՅԱՆՆ ու հավելեց. ««Թոփ մոդել Հայաստան» ազգային ասոցիացիան հետայսու դառնում է «Little Miss World»-ի ազգային տնօրենը Հայաստանում, որն ամեն տարի կներկայացնի հայաստանյան մասնակցին կամ մասնակիցներին այդ մրցույթում»: Ի դեպ, կայացած մրցույթի, ինչպես նաեւ հայաստանյան մոդելային արվեստի զարգացման տենդենցների մասին զրուցեցինք նաեւ ժյուրիի անդամ, heqiat.am կայքէջի հիմնադիր տնօրեն, «Միսս Հայաստան 2001» ԻՐԻՆԱ ԹՈՎՄԱՍՅԱՆԻ հետ.

- Ամենահետաքրքիրն այն էր, որ ժյուրիի ձայներն ու կարծիքները ընդհանուր առմամբ համընկան: Շատ ուրախ էի, որ հենց այն աղջիկներին ու տղաներին, որոնց ես էի ձայն տվել, փաստորեն, ընտրվեցին: Այս մրցույթը շատ եմ գնահատում, որովհետեւ Հայաստանի համար պրոֆեսիոնալ մակարդակով էր կազմակերպված: Մասնակից երեխաները բազմաթիվ բարդույթներ են հաղթահարում, էլ չեմ ասում, որ կհասնեն ինչ-որ հետաքրքիր բարձունքների: Եվ դա էլ մի կողմ դրած` սա իրենց համար շատ լավ հիշողություն է` ողջ կյանքի ընթացքում:
- Կարո՞ղ ենք ասել, որ սրանով հիմք է դրվում է, որպեսզի, վերջիվերջո, Հայաստանում մոդելային արվեստը կայանա:
- Իհարկե, որովհետեւ հիմա շատ քիչ են նոր սերնդի մոդելները, ովքեր էլ կան` գրեթե իմ սերնդակիցներն են: Իսկապես, երբ նայում եմ մեծ ցուցադրությունները հիմնականում բոլորն այն մոդելներն են, որոնք դեռ իմ ժամանակ էին մոդել, ինչի համար ցավում եմ:
- Իսկ ինչո՞վ է պայմանավորված ոլորտի այսպիսի ճգնաժամը:
- Որովհետեւ շատ չեն պրոֆեսիոնալ մոտեցումները, ցուցադրությունները: Թվում է` պոդիումում քայլելը շատ հեշտ բան է, բայց` ոչ: Պետք է մեծ աշխատանք տարվի, կարեւոր է նաեւ դպրոցը: Մեր մոդելները բացի մրցույթներից, պետք է անցնեն դպրոց` կեցվածքի դասընթացներ, բեմական արվեստ, նույնիսկ պարային էլեմենտներ պետք է սովորեն: Այնպես որ, կարծում եմ` այս մրցույթը շատ լավ հիմք է,  ես երկու ձեռքով կողմ եմ նմանատիպ նախագծերին:

Նյութը`

ՀՐԱՆՏ ՍԱՐԱՖՅԱՆԻ

Լուսանկարները`

ԱՐԵԳ ՎԱՐԴԱՆՅԱՆԻ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝