«ՊԱՀԱՆՋԵ՛Ք ՀԱՎԱՍՏԱԳԻՐ, ՈՐ ԳԱԶԻ ԲԱԼՈՆԸ ՊԻՏԱՆԻ Է ՕԳՏԱԳՈՐԾՄԱՆ»

«ՊԱՀԱՆՋԵ՛Ք ՀԱՎԱՍՏԱԳԻՐ, ՈՐ ԳԱԶԻ ԲԱԼՈՆԸ ՊԻՏԱՆԻ Է ՕԳՏԱԳՈՐԾՄԱՆ»

Այս անգամ «Իրավունքի» «Ուղիղ կապ» խորագրի հյուրը ՀՀ Տարածքային կառավարման եւ արտակարգ իրավիճակների նախարարության պետական հրդեհային եւ տեխնիկական անվտանգության տեսչության քարոզչության բաժնի պետ ՍԵՐԳԵՅ ՀԱՅՐԱՊԵՏՅԱՆՆ էր: Պարոն Հայրապետյանին ուղղված մեր ընթերցողների եւ ֆեյսբուքյան օգտատերերի հարցերը հիմնականում վերաբերում էին գազալցակայաններում նախարարության կողմից իրականացվող ստուգումներին, ինչպես նաեւ հրդեհային եւ տեխնիկական անվտանգությանն առնչվող դեպքերին ու դրանց վիճակագրությանը:

«ԵԹԵ ՉԱՆՑՆԵՆ ՓՈՐՁԱՔՆՆՈՒԹՅՈՒՆ, ԿՏՈՒԳԱՆԵՆՔ ՄԵԿ ՄԻԼԻՈՆ ԴՐԱՄԻ ՉԱՓՈՎ»

- Որքան տեղյակ ենք, վերջին շրջանում գազալցակայաններում նախարարության կողմից լուրջ ստուգումներ են իրականացվում: Հետաքրքիր է, թե անվտանգության ի՞նչ կանոններ են խախտված լինում հիմնականում, ինչի արդյունքում վարչական տույժերի են ենթարկվում (ՈՒՍԱՆՈՂՈՒՀԻ, ք. Երեւան):
-Այդ ստուգումների արդյունքում երկու գազալցակայանի աշխատանք դադարեցվել է, 46-ի նկատմամբ վարչական արձանագրություններ են կազմվել, իսկ մոտ 20-ն արդեն իսկ տուգանվել են: Հիմնական թերությունը տեխնիկական անվտանգության գծով այն է, որ փորձաքննություն չեն անցել (նմանատիպ 8 գազալցակայանների նկատմամբ կազմել ենք արձանագրություն): Եվ եթե չանցնեն փորձաքննություն, կտուգանենք մեկ միլիոն դրամի չափով, ինչը օրենքի պահանջն է:
- Իսկ արձանագրված խախտումները եղել են միայն մայրաքաղաքի՞ գազալցակայաններում, թե՞ նաեւ մարզերի:
- Ե՛վ մայրաքաղաքի, ե՛ւ մարզերի: Ստուգումների առաջին 4-5 օրը աշխատել ենք մայրաքաղաքում, եւ արդեն մեկ շաբաթ է շարունակվում են աշխատանքները նաեւ մարզերում:

ԻՆՉՈ՞Ւ ԵՆ ՊԱՅԹՈՒՄ ՄԵՔԵՆԱՆԵՐԻ ԲԱԼՈՆՆԵՐԸ

- Վերջերս մի քանի դեպքեր գրանցվեցին, որ մեքենայի գազի բալոնները պայթել էին: Արդյոք նույնքան վտանգավոր չե՞ն բնակարանային գազի բալոնները (ՏԻԿԻՆ ԿԱՐԻՆԵ, ք. Երեւան):
-Գազի ներբնակարանային սպասարկում մենք չենք իրականացնում: Գազի ծառայության աշխատակիցները, որքան գիտեմ, 6 ամիսը մեկ առնվազն պարտավոր են գալ եւ ստուգել բնակարանային գազի քաշը, հնարավոր արտահոսքերը եւ այլն: Այնպես որ, բնակարաններում վերահսկողության ոչ մի խնդիր չունենք: Ինչ վերաբերում է մեքենաների վրա դրված բալոնների պայթելուն, ապա նշեմ, որ դա տեղի է ունենում այն պատճառով, որ օգտագործում են տարբեր տեսակի ժամկետանց, հին, արդեն իսկ շարքից դուրս եկած բալոններ, որոնք պիտանի չեն շահագործման:
- Մեքենայիս գազի բալոնի վրա ճաքեր կան, արդյոք սա վտանգավո՞ր է, եւ ի՞նչ անել այս դեպքում (ԿԱՐԵՆ, ք. Երեւան):
-Ո՞վ է տեղադրել բալոնը, իսկ Ձեզ հավաստագիր տվե՞լ են: Պահանջե՛ք հավաստագիր, որ բալոնը փորձարկվել է եւ պիտանի է օգտագործման, ասենք, մեկ-երկու տարի կամ 6 ամիս: Նշված ժամկետը լրանալուց հետո գազալցակայանները, եթե համապատասխան հավաստագիր ցույց չտաք, իրավունք չունեն ձեր բալոնը լիցքավորելու: Ցավոք, այն լիցքավորողները, որոնք հաշվի չեն առնում այս ամենը, որպես կանոն` հենց իրենք են զոհվում պայթյունից: Դրա համար, եթե Ձեր գազի բալոնի վրա ճաքեր կան, տարեք այն հատուկ մասնագիտացված տեղ, այնտեղ թող ստուգեն: Ավելին ասեմ` կարող է Ձեր գազի բալոնը շատ լավը լինի, բայց 6 ամիս հետո վատը դառնա, որովհետեւ շատ կարեւոր է առաջին հերթին նորմալ ճնշումով, նորմալ ջերմաստիճանով եւ նորմալ խոնավությամբ գազի օգտագործումը: Եվ եթե այս երեք պարամետրերից թեկուզ մեկը խախտվում է, բալոնի կյանքը կարճանում է:

«ՀՐԴԵՀՆԵՐԻ ՄԵԾ ՄԱՍՆ ԱՆՓՈՒԹՈՒԹՅԱՆ ՊԱՏՃԱՌՈՎ Է»

- Գաղտնիք չէ, որ ամռան ամիսներին հրդեհների թիվը ավելանում է: ԱԻՆ-ը որքանո՞վ է պատրաստ դիմակայել այս տարվա հրդեհներին, եւ ինչպե՞ս խուսափել մեծամասշտաբ հրդեհներից (ՔՐԻՍՏԻՆԵ):
-Դուք շատ ճիշտ եք նկատել, որ ամառային շրջանում ավելանում են խոտածածկ տարածքների հրդեհները: Վստահեցնեմ Ձեզ, որ ԱԻՆ-ը պատրաստ է դիմակայելու այդ հրդեհներին: Բայց հրդեհների հարցում առաջին հերթին մարդկանց ինքնագիտակցության խնդիր կա: Այդ հրդեհների մեծ մասն առաջանում է մարդկանց անփութության պատճառով: Դեն նետած մի ծխախոտի մնացորդը բավական է, որպեսզի այդ չոր խոտը բռնկվի, եւ հեկտարներով տարածք այրվի: Հետո էլ, մեր հրշեջները գալիս են եւ ժամերով այդքան տեխնիկա ու միջոցներ են օգտագործում, որ այդ հրդեհը հանգցնեն եւ տարածումը կանխարգելեն: Մարդիկ հաճախ իրենց հանգիստը անցկացնում բնության գրկում, բայց շատ դեպքերում մոռանում են իրենց վառած խարույկը հանգցնել, եւ մեկ էլ քամու միջոցով կայծերը տարածվում են, եւ հրդեհ է բռնկվում:
- Ունե՞նք որեւէ տվյալ` թե քանի մարդ է զոհվել հրդեհից վերջին շրջանում, եւ որքանո՞վ եք համամիտ այն մտքին, որ մարդիկ անպաշտպան են կրակի առաջ, քանի որ չգիտեն ինչպես պաշտպանվել (ՏՆԱՅԻՆ ՏՆՏԵՍՈՒՀԻ):
-Այս տարվա հինգ ամիսների կտրվածքով, պետք է նշեմ, որ հրդեհների պատճառով ունենք 11 զոհ, մինչդեռ նախորդ տարի այս շրջանում արդեն 22 զոհ կար: Այսինքն` այս տարի, բարեբախտաբար, 50 տոկոսով պակասել է զոհերի քանակը: Իսկ հրդեհի պատճառով վիրավորներ վերջին հինգ ամիսներին եղել են 12 հոգի, մինդեռ նախորդ տարի նույն ժամանակահատվածում վիրավորների թիվը 29-ն էր: Ինչ վերաբերում է, որ անպաշտպան ենք, ես չէի ասի: Այդ հրդեհների գրեթե 85 տոկոսը տեղի են ունեցել մարդկային գործոնի պատճառով: Եթե մարդիկ մի փոքր ավելի ուշադիր լինեն եւ այդ տարրական անվտանգության պահանջները պահպանեն, իրենց մոտ հաստատ հրդեհ չի առաջանա: Իսկ թե ինչպես պաշտպանվել հրդեհից կամ այլ աղետից, այդ ամենը կարող եք գտնել մեր նախարարության պաշտոնական կայքում:
- Բոլորս էլ գիտենք, որ մի շարք հաստատություններում հակահրդեհային սարքերը պարզապես ձեւական բնույթ են կրում: Դրան նախարարությունը որեւէ կերպ ուշադրություն դարձնո՞ւմ է («ԻՐԱՎՈՒՆՔ»):
-Սա ամենացավոտ հարցերից մեկն է: Դժբախտաբար, մենք հնարավորություն չունենք այդ միջոցները գտնել եւ փոխանցել տարբեր հաստատությունների, եւ դա մեր գործառույթների մեջ չի մտնում: Իհարկե, անվտանգության ապահովության առումով հատկապես կարեւոր է, որ հաստատություններում լինեն հրդեհաշիջման միջոցներ, մասնավորապես կրակմարիչներ, սակայն, ցավոք, բավարար քանակությամբ` անգամ մեր դպրոցները ապահովված չեն: Դա առաջին հերթին, բնականաբար, կապված է իրենց ֆինանսական միջոցների հետ: Մենք պարբերաբար այդ հարցին անդրադառնում ենք, պնդում, որ պետք է ունենան, բայց այսօր ընդամենը 20 տոկոսն են կարողանում որոշ չափով ապահովվել, մի քանի տեղերում` 40-50 տոկոսով: Իրականում դա  մեծ գումարների հետ է կապված, եւ այդ հարցում դեռ աշխատանքներ կան անելու, ինչը մեզնից կախված չէ: Այն գերատեսչությունում, որում գտնվում են մեր դպրոցները, իրենք պետք է իրենց միջոցներով ձեռք բերեն եւ ապահովեն այդ անվտանգության միջոցները: Ավելին` բացի այդ կրակմարիչներից, կան նաեւ անվտանգության այլ հարցեր, որոնք էլի ֆինանսական միջոցների բացակայության պատճառով երկար ժամանակ չեն լուծվում: Միեւնույն ժամանակ, պետք է ընդգծեմ, որ ոչ բոլոր դպրոցներում է իրավիճակը նույնը: Կան տեղեր, որոնք նորմալ ուշադրություն են դարձնում անվտանգության խնդիրներին եւ ավելի բարվոք վիճակում են: Եվ անվտանգության առումով իրավիճակը հիմա բավականին լավ է, քան առաջ:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝