«ԳՅՈՒՄՐԻՆ ԸՆԿՆՈՒՄ Է ԱՆԻԻ ՕՐԸ»
Արխիվ 12-16
«ԳՅՈՒՄՐԻՆ ԸՆԿՆՈՒՄ Է ԱՆԻԻ ՕՐԸ»
Էլեկտրաէներգիայի թանկացման թեման, ինչպես հայտնի է, շիկացրել է կրքերը նաեւ Գյումրիում: Առաջիկայում նախատեսված է բողոքի զանգվածային ակցիա, եւ այդ հարցով էլ դիմեցինք Գյումրու նախկին քաղաքապետ ՎԱՐԴԱՆ ՂՈՒԿԱՍՅԱՆԻՆ:Մասնակցելո՞ւ է էլեկտրաէներգիայի թանկացման դեմ հունիսի 19-ին սպասվող հանրահավաքին, որը տեղի կունենա նաեւ Գյումրիում:
- Նախ ասեմ, որ ես դեմ եմ ցանկացած ապրանքի թանկացմանը, կողմ եմ աշխատավարձերի, նպաստների բարձրացմանը, աշխատատեղերի ստեղծմանը: Իսկ ինչ վերաբերում է էլեկտրաէներգիայի թանկացման դեմ իրականացվելիք ակցիային, ես դեռ պատրաստ չեմ ասելու՝ կմասնակցե՞մ, թե ոչ. հնարավոր է` մասնակցեմ, հնարավոր է` ոչ: Ես միշտ եղել եմ ժողովրդի եւ ժողովրդի կողմից ընտրված իշխանությունների կողքին, եւ համոզված եմ, որ ժողովրդի միահամուռ լինելը, համատեղ պայքարը կարող է հասցնել նաեւ նրան, որ հոսանքի գինը թանկանա, համենայնդեպս՝ որոշվածի չափով: Չեմ հավատում, որ ժողովրդի ձայնը անտեղի անցնի: Էս պայմաններում հոսանք թանկացնելը խայտառակություն է, առավել եւս, որ դա կրկնակի, եռակի անգամ ծանր կնստի հենց գյումրեցու վրա: Դուք գիտե՞ք` հիմա Գյումրիում ինչ վիճակ է, բոլոր խանութների, օբյեկտների վրա կա՛մ գրված է՝ «փակվում է», կա՛մ էլ՝ «տրվում է վարձով»: Այսինքն, մնաք բարով, հաջողություն... Էս պահին Գյումրիում մեծ թափով արտագաղթ է սկսվել, էսօր Գյումրիում մահացությունն էլ է ավելի շատ, քան ծնելիությունը: Էստեղ հույսը, հավատը, ամեն ինչը մահացած են: Գյումրին ընկնում է Անիի օրը, եւ պետք է արագ կարգով համապատասխան մոտեցում ցուցաբերեն այս քաղաքի նկատմամբ: Եթե ռուսական ռազմաբազան էլ չլինի, Գյումրին ամբողջությամբ կմահանա: Եկեք խանութպաններին հարցրեք. ասում են, եթե ռուսներն էլ առեւտուր չանեն, կդառնա գոյություն չունեցող քաղաք: Տեղի իշխանավորներն էլ իրենց չկամությամբ ավելի են նպաստում Գյումրու ծայրահեղ վիճակին: Մեկը, որ երեք տարի ընդունելություն չանի, էլ ի՞նչ ասեմ Ձեզ. թե էս յոթգլխանի դեւին որտեղի՞ց բերինք, դրեցինք էս քաղաքի վրա:
- Պարոն Ղուկասյան, Դուք թեեւ այդքան վատատեսական տրամադրություն ունեք, բայց ահա քաղաքաշինության նախարարը մտածում է` առաջիկայում Գյումրին տուրիստական քաղաք դարձնելու մասին:
- Չեմ կարծում, որ մի օր էլ Գյումրին կարող է դառնալ տուրիստական քաղաք, որովհետեւ այսօր տուրիզմի դաշտը մոնոպոլիզացված է: Այսօր տուրիստը գալիս է Երեւան, Էջմիածին, Ծաղկաձոր, այսինքն՝ Երեւանի չորսբոլորով վերջացնում են: Իսկ դա սարսափելի է, Գյումրին այսօր տուժում է թե՛ տուրիզմի տեսանկյունից, թե՛ աշխատատեղերի ստեղծման առումով. ամեն բան այսօր կենտրոնացված է մայրաքաղաքում: Տուրիստը դեռ հասկացանք, ընդունեցինք ինչ-որ տեղ, որ Գյումրի չի հասնում, բայց սարսափելին այն է, որ մեր՝ հայաստանյան երիտասադների երեւի 80 տոկոսն իր երկրի երկրորդ քաղաքում չի եղել: Անկեղծ ասած, այնքան վիրավորված եմ. մի քանի օր առաջ հեռուստատեսությամբ Գյումրու հետ կապված հարցեր էին քննարկվում, եւ ֆինանսների փոխնախարարը զարմանքով հարցրեց. «Իսկ ինչի՞ Գյումրիում...»: Այն պատճառով, որովհետեւ այստեղ 25 հազար մարդ է մահացել, որովհետեւ 27 տարի է` Գյումրին համարվում է թե՛ տնտեսապես, թե՛ սոցիալապես եւ թե՛ բարոյահոգեբանական առումով ամենաանապահով քաղաքը: Որովհետեւ Գյումրու` «Աղետի գոտու» փողերով ամբողջ Հայաստանն ապահովվեց...
- Երեկ ռուսական ռազմաբազայում սպանության դեպք էր գրանցվել, որեւէ տեղեկություն ունե՞ք կատարվածից:
- Ցավալի բան է եղել: Բայց հինգ հազար զինվոր ու սպաներ կան, ո՞նց կարող է մեկ-մեկ նման բան չլինել: Ուղղակի բոլորը կենտրոնանում են միանգամից Գյումրու վրա, բայց որտե՞ղ սպանություն չի լինում: Կայենը Աբելին սպանեց, Դուք էլ ինչ եք ստից բաների հետեւից ընկել: Տարբեր վարկածներ են շրջանառվում՝ հավանականից մինչեւ անհավանական, ո՞վ իմանա:
ԻԼՈՆԱ ԱԶԱՐՅԱՆ
Բաժանորդագրվե՛ք https://t.me/iravunk
1
31286 դիտում
2
8701 դիտում
3
2592 դիտում
4
1768 դիտում
5
1646 դիտում
2
19251 դիտում
3
17693 դիտում
4
11374 դիտում
