Բիբինը ոչ միայն արհամարհում է, այլև՝ սպառնում

Բիբինը ոչ միայն արհամարհում է, այլև՝ սպառնում

Այն, որ ՀԷՑ-ի գլխավոր տնօրեն Եվգենի Բիբինը խուսափում է հանրության առջև հանդես գալ, նորություն չէ: Ավելին, ամենայն հավանականության հանրության աչքին չի երևում, որ որոշ փակագծեր չբացվի, բայց այն, որ փոխհրաձգությունն արդեն սկսվել է, փաստ է: Պարզվում է, որ ՀԷՑ-ի գլխավոր տնօրենը անհամաձայնություն է հայտնել Հանրային ծառայությունները կարգավորող հանձնաժողովի ներկայացրած սակագնի վերաբերյալ և 9 էջանոց նամակով փորձել է համոզել, որ հանձնաժողովը չհիմնավորված մոտեցումներ է ցուցաբերել ՀԷՑ-ի հայտի հանդեպ: Ավելին, Բիբինը նամակով տեղեկացրել է, որ եթե չլինի 17 դրամի թանկացում, ապա ընկերությունը չի կարողանա երաշխավորել մատակարարվող էլեկտրաէներգիայի որակի և հուսալիությանը ներկայացվող անհրաժեշտ պահանջների բավարարումը ու բարելավել էլեկտրաէներգիայի որակը: ՀԷՑ-ի տնօրենը տեղեկացրել է, որ դրանից բացի կրկին կդիմի հանձնաժողովին ստեղծված իրավիճակում լիցենզավորված գործունեության իրականացման հնարավորությունը քննարկելու նպատակով: Նազարյանը, սակայն համարում է, որ իրենք չհասկացված են և ներկաներին հորդորեց հարցեր ուղղել նաև Ատոմակայանի, ՋԷԿ-ի, Սևան-Հրազդան Կասկադ ընկերությանը: Նա նշեց, նաև, որ հանձնաժողովի անդամների համար էլ է դժվար ամեն անգամ թանկացման մասին որոշում կայացնել, բայց դա իրենց խաչն է և ստիպված են տանել: «Մենք յուրաքանչյուրս պետք է անենք այնպես, որ հետագայում չամաչենք մեր կատարած գործի համար և կստեղծենք մի իրավիճակ, որը կդառնա անդառնալի և անշտկելի: Մենք ուզում ենք հասկացված լինենք: Ես հայամետ եմ, սիրում եմ իմ հայրենիքը և շարունակելու եմ անել այնպիսի բաներ, որպեսզի երբևիցե չամաչեմ ՀՀ որևէ քաղաքացուց իմ արածի համար»,- ասաց Ռ.Նազարյանը: Սակայն այս մեղայախառը լոլոներից անմիջապես հետո հանձնաժողովը միաձայն քվեարկեց հոսաքի սակագնի թանկացման օգտին, որին ի պատասխան ներկաները վանկարկեցին «ամոթ»: Հարց է ծագում, թե ինչպե՞ս է պատահել, որ այս ընթացքում իր ժողովրդի կողմից հասկացված լինելու փաստից Նազարյանն առանձնապես չի էլ նեղվել, իսկ հիմա, երբ իրեն սկսել է «չհասկանալ» նաև Բիբինը, հիշել է, որ ինքը հայամետ է ու սիրում է իր հայրենիքը: Իսկ այն, որ չհասկացված լինելու խաչն այս անգամ սրի է վերածվելու փաստ է, որի ձայնը դեռ կլսենք առաջիկայում:

ԱՐՄԻՆԵ ԳՐԻԳՈՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝