«ԲԵՐՔԻ ՏՈՆ» ՔԱՆԴԱԿԻ ԿԵՍՆ ԱՆՀԵՏԱՑԵԼ Է

«ԲԵՐՔԻ ՏՈՆ» ՔԱՆԴԱԿԻ ԿԵՍՆ ԱՆՀԵՏԱՑԵԼ Է

Հետաքրքիր է, որքան դեռ պիտի շարունակվի քաղաքի տարբեր ծայրերում եւ ընդհանրապես Հայաստանի տարածքում գտնվող պատմամշակութային արժեք ներկայացնող հուշարձանների օր օրի անհետացումն ու թալանը: Օրեր առաջ «Իրավունքը» տեղեկացավ, որ Երեւան քաղաքի Նոր Նորքի վարչական շրջանում գտնվող ՀՀ ժողովրդական նկարիչ ՍՈՒՐԵՆ ՆԱԶԱՐՅԱՆԻ «Բերքի տոն» (բրոնզ, 1967) քանդակի կեսն անհետացել է` պոկել տարել են ու փչացրել հուշարձանի երբեմնի տեսքը: Այս մասին մեզ հայտնեցին արձանի հարակից տարածքի բնակիչները: Այդ մասին ֆեյսբուքյան իր էջում վրդովմունք էր հայտնել նաեւ ժողովրդական նկարչի որդին` քանդակագործ Արշակ Նազարյանը եւ տեղադրել ավերված հուշարձանի լուսանկարը:

Բնակիչների խոսքով` այդ հարցով դիմել են Մշակույթի նախարարություն, որտեղից տեղեկացրել են, որ արձանը պատմության եւ մշակույթի անշարժ հուշարձանների պետական ցուցակում ընդգրկված չէ, ուստի հուշարձանի կամ այն այժմյան տեսքին հասցնողների խնդիրը նախարարության իրավասությունը չէ: Թեպետ նախարարությունից բնակիչներին հավաստիացրել են, որ դեպքի մասին տեղեկացրել են Երեւանի քաղաքապետարանին: Սակայն քաղաքապետարանի մշակույթի բաժնից «Իրավունքին» տեղեկացրին, որ այս պահին այդ մասին որեւէ տեղեկություն չունեն:
Ի դեպ` քանդակագործ Արշակ Նազարյանի ֆեյսբուքյան գրառումը բուռն քննարկումների առիթ է դարձել, ու թեպետ վերջերս «ավանդույթ» է դարձել պետական մարմինների` սոցցանցերում աշխատելու մշակույթը, բայց  ոստիկանությունից մեզ նույնպես պատասխանեցին, որ այս մասին որեւէ հայտարարություն, դիմում չեն ստացել:
Ամենեւին չմեղմացնելով նման արարք ցուցաբերող անձանց մեղքը` ստիպված ենք կրկին շեշտել, որ պետական գերատեսչությունների անտարբերությունը մշակութային արժեքների նկատմամբ միայն նպաստում է նման դեպքերի կրկնությանը: Ամեն դեպքում, հուսանք, որ քաղաքապետարանն արդեն տեղեկացավ այս հուշարձանի անմխիթար վիճակի մասին եւ գոնե վաղն այս մասին միջոցներ կձեռնարկի` այն անհետ չկորցնելու համար:
Կույտը մշակեց ՆՈՒՆԵ ՉՈԲԱՆՅԱՆԸ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝