ԵՐՎԱՆԴ ԶԱԽԱՐՅԱՆՆ ԱՐՄԵՆ ՄՈՎՍԻՍՅԱՆԻՆ ՎԱՏՈՒԹՅՈՒՆ ՉԻ՞ ՈՒԶՈՒՄ ԱՆԵԼ

ԵՐՎԱՆԴ ԶԱԽԱՐՅԱՆՆ ԱՐՄԵՆ ՄՈՎՍԻՍՅԱՆԻՆ

ՎԱՏՈՒԹՅՈՒՆ ՉԻ՞ ՈՒԶՈՒՄ ԱՆԵԼ

Հանրային ծառայությունները կարգավորող հանձնաժողովը վաղը` հունիսի 17-ին,  քննարկելու է ՀԷՑ-ի` հոսանքի թանկացման հայտը: Խորհրդարանի միջանցքներում պտտվող լուրերի համաձայն` իշխանությունը շահագրգռված է իր վրայից «մաքրել» հոսանքի թանկացման հարցում իրեն վերագրվող մեղադրանքները: Մասնավորապես, պատժել Բիբինին եւ ստիպել նրան, որ  որոշակի ժամանակահատվածում լուծի ՀԷՑ-ում առաջացած խնդիրները, եւ ամենակարեւորը`նվազեցնի  կորուստները: Չի բացառվում` վաղվա նիստում ՀԾԿՀ-ը   գուցե   մեծ  չափով տուգանի ՀԷՑ-ին, ժամանակավորապես կասեցնի լիցենզիան եւ ստիպի Բիբինին  որոշակի ժամանակահատվածում լուծել ցանցում առաջացած խնդիրները: Եթե դա չարվի, ՀԷՑ ՓԲԸ-ին միգուցե զրկեն լիցենզիայից:

Կրկին այդ պտտվող կուրերի, եթե իրավապահները խորքային քննություն սկսեն, չի բացառվում`լուրջ խնդիրների առաջ կանգնեն նաեւ հէկ-ի տերերը, որոնցից ՀԷՑ-ը, ըստ  շրջանառվող լուրերի, տարբեր ու բավական թանկ գնով է հոսանք գնում:

«Իրավունքին» հասած եւ խորհրդարանում շրջանառվող մյուս  լուրերը վերաբերում են Բիբինի` ԱԺ չգալուն: Բանն այն է, որ Բիբինի` խորհրդարան չգալու համար շահագրգռված էին որոշ հայ չինովնիկներ, որոնք եւս, ինչպես  հայտարարվեց  լսումների ժամանակ, ունեն պատասխանատվության իրենց բաժինը: Վերջիններս, ըստ լուրերի, համոզել են Բիբինին, որ ԱԺ չգնա, քանի որ չէր բացառվում` ՀԷՑ-ի տնօրենը  որոշ անուններ գուցե հնչեցներ:

ՀԷՑ-ի  կոռուպցիոն ռիսկերի մասին խոսելիս տիրող իրավիճակի առաջին պատասխանատու հնչում էր Երվանդ Զախարյանի անունը, ով, սակայն, կրկին ըստ լուրերի, չի ցանկանում  առաջացած իրավիճակը մանրամասն  ուսումնասիրել,  քանի որ ստիպված պետք է լինի հնչեցնել  էներգետիկայի նախկին նախարար Արմեն Մովսիսյանի անունը: Մինչդեռ զուտ մարդկային առումով Մովսիսյանին չեն ցանկանում վատ դրության մեջ դնել, քանզի նրա գույքը, ըստ մամուլի որոշ հրապարակումների, գրավի տակ է «Նաիրիտ» գործարանի աշխատակիցների աշխատավարձերի պարտքը փակելու համար:

Եվս մեկ ուշագրավ փաստ.  խորհրդարանի միջանցքներում պտտվող լուրերը կարծես թե հաստատում են «Իրավունքի»` օրեր առաջ  հրապարակած «Չի բացառվում` հէց-ի «պապա» «ԻՆՏԵՐ ՌԱՕ ԵԷՍ»-ը գլխավորող ընկերություններում ադրբեջանական ընկերություննե՞ր լինեն» վերտառությամբ հոդվածը, որում գրված էր` ՀԷՑ ՓԲԸ-ն «ԻՆՏԵՐ ՌԱՕ ԵԷՍ» ՓԲԸ-ի դուստր ընկերությունն է, որը գլխավորում է ավելի քան 14 երկրներում գտնվող 20 ընկերություններից բաղկացած խմբի կողմից: Թե ովքեր են  այդ ընկերություններն ու երկրները,  ՀԷՑ-ը չէր պատասխանել, բայց  կարեւոր մի տեղեկություն, այնուամենայնիվ, տրամադրել էր` ««Ինտեր ՌԱՕ» ընկերությունն իր գործունեությունը ծավալում է այնպիսի երկրներում, ինչպիսիք են Ռուսաստանը, Հայաստանը, Ֆինլանդիան, Բելառուսը, Լիտվան, Ուկրաինան, Ռուսաստանը, Վրաստանը, Ադրբեջանը, Հարավային Օսեթիան, Ղազախստանը, Չինաստանը, Մոնգոլիան, Թուրքիան»:

Ասել է թե` չի բացառվում` Հայաստանի էներգո համակարգում տեղ գտած այս ողջ իրավիճակի  հարցում գուցե «թուրք-ազերիական» գործոնը կարեւոր դեր խաղացած լինի: Ավելին` Բիբինի  ղեկավարման ողջ գործընթացից անհնար է, որ «ԻՆՏԵՐ ՌԱՕ ԵՍԷ-ը» տեղյակ չլիներ:

Հուսանք` այս եւ այլ հարցերի պատասխաններն  առաջիկայում կստանանք պատկան մարմիններից եւ հետեւողական քայլերի շնորհիվ հնարավոր կլինի ՀԷՑ-ը դուրս բերել անմխիթար այս վիճակից:

ՍՈՆԱ ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝