«ԱՆՑԱԾ ԴԱՐԻՑ ՊԱՏԳԱՄԱՎՈՐ ԵՄ ԵՎ ԵՐԲԵՔ ՉԵՄ ՏԵՍԵԼ, ՈՐ ՔԱՂԱՔԱՑԻՆԵՐԸ «ՎԱՌ» ԸՆԴԴԻՄՈՒԹՅԱՆ ՀԵՏԵՎԻՑ ԳՆԱՆ»

«ԱՆՑԱԾ ԴԱՐԻՑ ՊԱՏԳԱՄԱՎՈՐ ԵՄ ԵՎ ԵՐԲԵՔ ՉԵՄ ՏԵՍԵԼ, ՈՐ ՔԱՂԱՔԱՑԻՆԵՐԸ «ՎԱՌ» ԸՆԴԴԻՄՈՒԹՅԱՆ ՀԵՏԵՎԻՑ ԳՆԱՆ»

Նախորդ շաբաթ կայացավ խորհրդարանական լսումներ` «Էլեկտրաէներգիայի սակագնի վերանայման հիմնավորվածության վերաբերյալ» թեմայով: Լսումներին մասնակցում էին ԱԺ պատգամավորներ, կառավարության անդամներ, ՀԿ-ների ներկայացուցիչներ, ոլորտի մասնագետներ: Թեպետ ելույթներն ու հարցադրումները բավական թեժ էին ու կոշտ, բայց, այնուամենայնիվ, որոշումը մնաց նույնը եւ էլեկտրաէներգիան կթանկանա 6.93 դրամով: Այս, ինչպես նաեւ խնդրի քաղաքական շահարկումների մասին «Իրավունքը» զրուցեց ԱԺ սոցիալական հարցերի մշտական հանձնաժողովի նախագահ, ԱԺ ՀՀԿ խմբակցության պատգամավոր ՀԱԿՈԲ ՀԱԿՈԲՅԱՆԻ հետ:

«ՀԱՐՑԻ ԼՈՒԾՈՒՄԸ` ԲԱՆԱԼԻՆ, ՉԻ ԳՏՆՎՈՒՄ ԱԶԳԱՅԻՆ ԺՈՂՈՎՈՒՄ»

–Պարոն Հակոբյան, ամփոփելով էլեկտրաէներգիայի թանկացման վերաբերյալ լսումները` որեւէ արդյունք արձանագրեցի՞ք:
– Բայց լսումներից ի՞նչ արդյունք էիք ուզում սպասել, երբ հարցի լուծումը` բանալին, չի գտնվում Ազգային ժողովում:
– Ամեն դեպքում, խորհրդարանական լսումները հույս էին, որ այդ բանալու տեղը ցույց կտրվեր:
– Լսումներն ընդամենը կարող էին հանրությանը մատչելի եւ հասանելի դարձնել թանկացման պատճառները: Եվ կարծում եմ` արդյունքում ճշտվեց եւ դարձավ հասարակությանը հայտնի, թե ինչ պատճառով էլեկտրաէներգիան թանկացավ:
– Այսինքն` Ձեզ համար արդարացվա՞ծ է էլեկտրաէներգիայի թանկացումը, թե դեռ հարցականներ մնացել են:
– Միշտ ասել եմ, որ թանկացումը օբյեկտիվ եւ սուբյեկտիվ կողմ ունի: Օբյեկտիվ կողմերից է այն, որ դոլար-դրամ հարաբերակցությունը փոխվել է, ինչպես նաեւ այն, որ վերջին երկու-երեք տարիները եղել են ոչ ջրառատ, ատոմակայանը 85 օր լրացուցիչ գրաֆիկից դուրս չի աշխատել: Իսկ այն, որ սակագինը փոխվել է աշխատանքի որակի, կառավարման համակարգի եւ այլնի հետ կապված, սրանք սուբյեկտիվ պատճառներն են:

«ՃԻՇՏ ՉԷՐ ԲԻԲԻՆԻՆ
ԱԶԳԱՅԻՆ ԺՈՂՈՎ ԿԱՆՉԵԼԸ»

–Իսկ ինչպե՞ս եք վերաբերվում «Հայաստանի էլեկտրական ցանցեր» ընկերության գլխավոր տնօրեն Եվգենի Բիբինի հասցեին հնչած մեղադրանքներին:
– Ո՞վ էր մեղադրում Բիբինին:
– Մասնավորապես ընդդիմադիր պատգամավորները:
– Ովքեր Բիբինին մեղադրում են, ՀՀ օրենսդրությունը ճիշտ չգիտեն: Բիբինն աշխատում է հանձնաժողովի որոշումներով եւ Ազգային ժողովի կողմից էլցանցերի առքուվաճառքի պայմանագրով:
– Ուզում եք ասել, որ ընդդիմությունը մեղադրանքներ հնչեցնելով Ե. Բիբինի հասցեին` պարզապես դիվիդենտնե՞ր էր շահում:
– Միայն:
– Այնուամենայնիվ, Ե. Բիբինը չներկայացավ խորհրդարանական լսումներին: Չե՞ք կարծում, որ սա արհամարհանք էր խորհրդարանականների նկատմամբ:
– Ոչ, կարծում եմ` ճիշտ չէր Բիբինին Ազգային ժողով կանչելը, որովհետեւ նա խորհրդարանում անելիք չուներ: Ի վերջո, Բիբինը չի եկել օրենսդրական աշխատանքի, նա ունի իրավական ակտեր, որոնցով կառավարում է իր աշխատանքը:

«ԼՍՈՒՄՆԵՐԻ ԺԱՄԱՆԱԿ ՀՆՉԱԾ ԵԼՈՒՅԹՆԵՐԸ
ԴԵՌԵՎՍ ԱՊԱՑՈՒՅՑ ՉԵՆ»

–Ի՞նչ կասեք այն մասին, որ թեպետ վերոնշյալ խնդրում բազմիցս խոսվեց հնարավոր չարաշահումների մասին, սակայն ՀՀ Դատախազությունն այդպես էլ հանձն չառավ այս գործն ուսումնասիրել:
– Ի՞նչն ուսումնասիրեր, եթե կան չարաշահումներ, պետք է ուսումնասիրել: Ես չգիտեմ` կա՞ն, թե՞ չկան:
– Մի՞թե դա պարզ չդարձավ լսումների արդյունքում:
– Լսումների ժամանակ հնչած ելույթները դեռեւս ապացույց  կամ հիմք չեն` չարաշահումները հաստատելու համար: Եթե դուք մամուլ կարդաք կամ Ազգային ժողովում լսեք պատգամավորներին, ուրեմն` օրական մեկը հանցագործ է, բայց իրականության մեջ բացարձակ այդպես չէ:
– Անդրադառնանք նաեւ խնդրի սոցիալական կողմին: Ստեղծված իրավիճակում էլեկտրաէներգիայի թանկացման հարցում սուբսիդավորումը որքանո՞վ կարող է եղած խնդիրների լուծում դառնալ:
– Սուբսիդավորումը պետք է լինի պարտադիր եւ պետք է լինի այն չափով, որպեսզի աղքատության շեմից ներքեւ գտնվող քաղաքացիների քանակը չշատանա:
– Ըստ Ձեզ` որքանո՞վ են ի վիճակի աղքատության շեմից բարձր համարվող քաղաքացիները վճարել 6.93 դրամով թանկացած էլեկտրաէներգիայի համար:
– Մենք ունենք չափանիշ, ուղեցույց, գիծ` հասարակության մեջ աղքատության շեմի որոշման, եւ այդ շեմից ցածր մարդկանց տեղերը գիտենք: Մեր ամենախոցելի խավն իրենք են, դրա համար պետության առաջնային ֆունկցիան է  նրանց օգնել: Երբ շաքարավազի, հացի գինը բարձրանում է, պայմանական ասեմ, որ ձեզ չեն փոխհատուցում, որովհետեւ դուք ապրում եք աղքատության շեմից վերեւ: Իհարկե, էլեկտրաէներգիայի սակագնի թանկացումը կարող է պատճառ դառնալ, որ դուք ավելի շատ գումարներ ուղղեք, ասենք, հենց հացին եւ այլն` մյուս տեղերից խնայելով, բայց սա աղքատության հետ կապ չունի: Աղքատության համար անհրաժեշտ է, որպեսզի աղքատության շեմից ցածր գտնվող քաղաքացիներին պետությունը փոխհատուցի համապատասխան չափով:

«ՔԱՂԱՔԱՑԻՆԵՐԸ ԳԻՏԵՆ, ԹԵ ՈՎ Է ՄՏԱԾՈՒՄ ԻՐԵՆՑ ՄԱՍԻՆ»

–Քաղաքացին այսօր շարունակում է պնդել` ասելով, թե ինչու պետք է ինքը մարի ՀԷՑ-ի պարտքերը:
– Հարցադրումը հետաքրքիր է: Ես արդեն ասացի, որ կան օբյեկտիվ պատճառներ: Եվ եթե կան օբյեկտիվ պատճառներ, հետեւաբար քաղաքացին չի փոխհատուցում ՀԵՑ-ի պարտքերը, այլ` վճարում է թանկացած էլեկտրաէներգիայի դիմաց: Իսկ սուբյեկտիվ պատճառների դեպքում, այո՛, քաղաքացու հարցադրումը ճիշտ է:
– Եզրափակելով թեման` եւս մեկ հարց. ընդդիմությանը կհաջողվի՞ այս խնդրից իր համար ինչ-որ բան քաղել` թե՛ վերադասավորումների, թե՛ ուժերի վերակազմավորման եւ թե՛ քաղաքացիներին իր կողմը գրավելու առումով:
– Անցած դարից պատգամավոր եմ եւ երբեք չեմ տեսել, որ քաղաքացիները «վառ» ընդդիմության հետեւից գնան: Եվ դրա վառ ապացույցը մի քանի կուսակցություններն են, որոնք Ազգային ժողովում եղել են ճարտար լեզուներով ընդդիմություն, բայց հաջորդ խորհրդարանական ընտրություններին Ազգային ժողով չեն մտել: Քաղաքացիները հստակ գիտակցում են իրենց շահը, եւ բոլոր այն հռետորները, ելույթ ունեցողները, ովքեր իբրեւ մտածում են քաղաքացիների շահերի մասին, թող չխաբվեն, որովհետեւ քաղաքացիները գիտեն, թե ով է մտածում իրենց մասին, եւ ով ում շահն է պաշտպանում:
– Աշնանը վառ ընդդիմություն կունենա՞նք:
– Շնորհակալություն... Ցտեսություն:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝