Ի՞ՆՉՆ Է ԵՂԵԼ ՎՐԱՍՏԱՆԻ ՋՐԱՌԱՏ ԱՂԵՏԻ ՊԱՏՃԱՌԸ

Ի՞ՆՉՆ Է ԵՂԵԼ ՎՐԱՍՏԱՆԻ ՋՐԱՌԱՏ ԱՂԵՏԻ ՊԱՏՃԱՌԸ

Հունիսի 13-ի գիշերը հարեւան Վրաստանի մայրաքաղաք Թիֆլիսում տեղի է ունեցել սարսափելի աղետ: Հորդառատ անձրեւը իր հետ բերել է մեծ ավերածություններ, ինչպես նաեւ հեղեղի պատճառով մայրաքաղաքի փողոցներում են հայտնվել թիֆլիսյան գազանանոցի ավելի քան 60 գիշատիչ: Վերջին տվյալներով` կա 14 զոհ, ինչպես նաեւ 100-ից ավելի մարդ գտնվում է հիվանդանոցներում: Իսկ աղետի հասցրած նյութական վնասի մոտավոր չափը կազմում է 40 միլիոն լարի: Տեղի ունեցածի մասին «Իրավունքը» զրուցեց ԱԺ ՀՀԿ խմբակցության պատգամավոր, «Վիրահայերի միասնություն» ՀԿ-ի համանախագահ ՏԱՃԱՏ ՎԱՐԴԱՊԵՏՅԱՆԻ հետ, ով ցավով նշեց.

–Խոսել եմ «Վրաստան» թերթի խմբագիր Վան Բայբուրդի հետ եւ, եղած տեղեկությունների համաձայն, ազգությամբ հայ երկու քույրեր են զոհվել, նույն Եղիազարով ազգանունով եւս երկու զոհ ունենք:

– Պարոն Վարդապետյան, աղետի՞ զոհ են դարձել, թե՞ Թիֆլիսի փողոցներում հայտնված գազանների:
– Աղետի զոհ են դարձել:
– Լայնորեն շրջանառվում է տեսակետ, որ հեղեղը եղել ոչ թե միայն հորդառատ անձրեւի արդյունք, այլ այդ կողմերում` Սաբորթալո թաղամասում, ճանապարհ են կառուցել, որտեղ գետակ է հոսում, եւ ճանապարհի տակով դրա հունը փակել են նեղ խողովակի մեջ, եւ դա չի դիմացել հեղեղի ճնշմանը: Ու այս անփութությունը կապվում է Վրաստանի նախկին նախագահ, այժմ Օդեսայի նահանգապետ Միխայիլ Սահակաշվիլու անվան հետ, քանի որ նրա օրոք է կառուցվել այն:
– Չգիտեմ` ում օրոք է կառուցված, բայց ես հետեւյալ տեղեկությունն ունեմ, որ սողանքների հետեւանքով է փակվել գետի հունը, եւ հսկայական կուտակումների արդյունքում այդ ջուրը գահավիժել է նաեւ Վրաստանի մայրաքաղաք ու ավերածությունների, զոհերի պատճառ դարձել:
– Ի՞նչ քայլեր պետք է ձեռնարկի Հայաստանը` հարեւան երկրին սատարելու հարցում:
– Մեր կենդանաբանական այգու չորս աշխատակից արդեն իսկ գտնվում են Թիֆլիսում, բնականաբար, առաջիկայում այլ աջակցություններ նույնպես կլինեն:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝