ՎԱԶԳԵՆ ՄԱՆՈՒԿՅԱՆԸ ԳՈՒՇԱԿՈՒԹՅԱՄԲ ՉԻ ԶԲԱՂՎՈՒՄ, ԻՍԿ ԹԵ ԻՆՉՈՎ Է ԶԲԱՂՎՈՒՄ` ՈՉ ՈՔ ՉԳԻՏԻ

ՎԱԶԳԵՆ ՄԱՆՈՒԿՅԱՆԸ ԳՈՒՇԱԿՈՒԹՅԱՄԲ ՉԻ ԶԲԱՂՎՈՒՄ, ԻՍԿ ԹԵ ԻՆՉՈՎ Է ԶԲԱՂՎՈՒՄ` ՈՉ ՈՔ ՉԳԻՏԻ

Հայաստանյան ներքաղաքական դաշտում տարեսկզբից կանխատեսվող գարնանային սրացումները, ինչպես տեսանք, ավարտվեցին ընդդիմության ֆիասկոյով: Դրան չնայած հաջորդեցին նոր քաղաքական վերադասավորումներ ու նոր կուսակցությունների ծնունդներ, սակայն տպավորությունն այնպիսին է, որ ընդդիմությունը կամ խորը քնած է, կամ անհանդուրժողականության ճիչերն այնքան նվազ են, որ առանձնապես չեն լսվում: Այնուամենայնիվ, որոշ քաղաքական գործիչներ կրկին սկսել են բարձրաձայնել, թե աշունն այնուամենայնիվ թեժ է լինելու: Իրականում քաղաքական ինչպիսի՞ աշնան ականատեսը կլինենք, եւ արդո՞ք տեղի կունենա ընդդիմության կոնսոլիդացիա: Այս եւ «Իրավունքի» այլ հարցերի վերաբերյալ իր տեսակետն է հայտնում ՀՀ հանրային խորհրդի նախագահ ՎԱԶԳԵՆ ՄԱՆՈՒԿՅԱՆԸ:

–Պարոն Մանուկյան, Ձեր կարծիքով, առաջիկայում քաղաքական դաշտում ինչպիսի՞ հնարավոր վերադասավորումներ կլինեն, քանի որ քաղաքական գործիչները թեժ աշուն են խոստանում: Դուք նման կանխատեսում ունե՞ք:
–  Շատ անորոշ հարց եք տալիս: Հազար ձեւի վերափոխումներ էլ կարող են լինել, ինչո՞ւ եք հիմա սկսում դրա մասին խոսել: Հո ես գուշակ չե՞մ: Կնայենք, կտեսնենք: Ես պատրաստ չեմ այդպիսի հարցի պատասխանել: Ոչ մեկն էլ չի իմանում, թե ինչեր կլինեն, իսկ կանխագուշակումներ անելն էլ իմ սովորությունը չէ:
– Վերջին շրջանում նոր քաղաքական կուսակցություններ են ձեւավորվել, օրինակ` «Քաղաքացիական պայմանագիր» կուսակցությունը, որը կարծես հետաքրքրություն է առաջացրել քաղաքական դաշտում: Ի՞նչ կասեք այս մասին:
– Որեւէ մեկնաբանություն չունեմ այդ հարցի վերաբերյալ: Ես գիտեմ, որ ամեն ինչ կյանքը պետք է ցույց տա, առայժմ դեռ ոչինչ չեմ կարող ասել:
– Իսկ Ձեր կարծիքով` հնարավո՞ր է երկրորդ նախագահ Ռոբերտ Քոչարյանի վերադարձը մեծ քաղաքականություն:
– Գիտե՞ք ինչ, ես Հայաստանում չէի, նոր եմ եկել: Երեւի, քաղաքական դաշտում բան չկա, որ ստիպված նման հացադրումներ եք անում: Չէ, համարեմ, որ այդ հարցերին ես պատասխան չունեմ:
–  Իսկ հոսանքի թանկացումն անխուսափելի՞ կլինի, թե՞ հնարավոր կլինի այս անգամ շրջանցել այն:
– Չեմ իմանում: Դուք հարցեր եք տալիս, թե ինչ կլինի ապագայում: Մի հատ գուշակ կամ գնչու չկա՞ Հայաստանում: Փող եք տալիս, նա էլ սկսում է գուշակել: Ես հո գնչու չեմ:
– Հոսանքի թանկացման շուրջ տեղի ունեցող իրադարձությունները թույլ են տալիս ենթադրել, որ կարծես թե դրանից խուսափել չի լինի:
– Ես որեւիցե բան ասել չեմ կարող: Հանրային խորհուրդն իր կարծիքն ասել է, հիմա էլ հետեւում ենք, թե ինչ կլինի:
ԱՐՄԻՆԵ ԳՐԻԳՈՐՅԱՆ
Հ.Գ.– Դժվար է պատկերացնել, որ պոկերի մեծ վարպետ եւ էլ ավելի մեծ սիրահար, քաղաքական գործիչ Մանուկյանը ապագայի կանխատեսումների հարցում կարող է նման զսպվածություն դրսեւորել, թեեւ կարելի է հավատալ նրա անկեղծությանը, երբ աում է, թե չգիտի` ինչ կլինի քաղաքական ապագայում. նույն կերպ նա հավանաբար չգիտեր, ինչ է լինելու ՀՀ-ի ապագան, երբ Ղարաբաղ կոմիտեի, իսկ հետագայում ՀՀՇ ղեկավարության կազմում` բռունցք էր թափահարում օպերայի հրապարակում:

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝