ՀԱՅԿԱԿԱՆ «ԿԱՐՄԻՐ ԿԱՐԿՈՒՏ»-Ը` ԿԱՖԿԱՅԻ ՏԱՆԸ

ՀԱՅԿԱԿԱՆ «ԿԱՐՄԻՐ ԿԱՐԿՈՒՏ»-Ը` ԿԱՖԿԱՅԻ ՏԱՆԸ

Պրահայում հունիսի 18-28-ը կանցկացվի «ՊՐԱՀԱՅԻ ՔՎԱԴՐԻՆԱԼԵ» թատերանկարչության եւ բեմանկարչության միջազգային փառատոնը, որին Հայաստանը կներկայանա «ԿԱՐՄԻՐ ԿԱՐԿՈՒՏ» խորագրով բեմանկարչական ինստալյացիայով` նվիրված Հայոց ցեղասպանության 100-րդ տարելիցին: Այս մասին հայտնում են ՀՀ մշակույթի նախարարության լրատվական ծառայությունից: Հայոց ցեղասպանության 100-րդ տարելիցի միջոցառումները համակարգող պետական հանձնաժողովի եւ ՀՀ մշակույթի նախարարության աջակցությամբ նախագիծն իրականացնում է «ԷՅՎԱ» արվեստների հիմնադրամը:

«ԿԱՐՄԻՐ ԿԱՐԿՈՒՏ» բեմանկարչական ինստալյացիայի գաղափարային պատկերը ձեւավորվել է մեկ դոկումենտալ լուսանկարի եւ երաժշտության փոխազդեցության արդյունքում: Լուսանկարում պատկերված են Մուշի ցերեկային դպրոցի փոքրիկ աշակերտները, իսկ երաժշտությունը ՏԻԳՐԱՆ ՀԱՄԱՍՅԱՆԻ կողմից ժամանակակից մշակում ստացած Ներսես Շնորհալու Հարության «Նոր ծաղիկ» տաղն է:

Քվադրինալեի պաշտոնական բացումը տեղի կունենա հունիսի 17-ին, Պրահայի կենտրոնում գտնվող Հին քաղաքի հրապարակում` 80 երկրից ժամանած հյուրերի, դեսպանների, աշխարհահռչակ արվեստագետների եւ այլոց մասնակցությամբ, իսկ հունիսի 18-28-ը այցելուները հնարավորություն կունենան ծանոթանալու Քվադրինալեի մասնակից 64 երկրների ցուցադրություններին: Հայաստանի տաղավարը տեղակայված կլինի Ֆ. Կաֆկայի տանը ուր եւ հանրությանը կներկայացվի «ԿԱՐՄԻՐ ԿԱՐԿՈՒՏ» ինստալյացիան: Հիմնական ցուցադրությունից բացի, հունիսի 23-ին տեղի կունենա «Հայկական օր» միջոցառումը, որի շրջանակում կներկայացվի «Հայոց ցեղասպանության վերջին վերապրածները» նախագիծը` Հայոց ցեղասպանությունը վերապրած եւ մինչ օրս Հայաստանում ապրող մարդկանց մտքերն ու հույզերը:

ՆՈՒՆԵ ՉՈԲԱՆՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝