ԹՈՒՐՔՄԵՆՍՏԱՆԻ ԴԵՍՊԱՆԻ «ՏԱՋԿԱԿԱՆ» ՄԻԼԻՈՆՆԵՐԸ

ԹՈՒՐՔՄԵՆՍՏԱՆԻ ԴԵՍՊԱՆԻ «ՏԱՋԿԱԿԱՆ»

ՄԻԼԻՈՆՆԵՐԸ

Բարձրաստիճան անձանց էթիկայի հանձնաժողովից

«Իրավունքը» տեղեկանում է, որ  Թուրքմենստանում ՀՀ դեսպան, ԱԺ նախկին պատգամավոր Վլադիմիր Բադալյանը  լավ ունեցվածքի  տեր է: Դեսպանի նախորդ տարի  հայտարարագրած դրամական միջոցներն միայն արտարժույթով են` 112,200 դոլար եւ 12,400 եվրո: Ընդ  որում` եվրոյով դրամական միջոցները տարվա վերջում  նվազել են: Դեսպանի հարկային եկամուտները նախորդ տարում  կազմել են  24,264 դոլար:

Դեսպանի կնոջ` Աննա Խաչատրյանի դրամական միջոցները եւս քիչ չեն: Նախորդ  տարի դեսպանի կինը հայտարարագրել է 180,000. դրամ, 12,000 դոլար, 175.000 եվրո:

Տեղեկացնենք, որ Վլադիմիր Բադալյանը դեսպանի պաշտոնը զբաղեցնում է 2008 թ-ից: Ի դեպ, մինչ դեսպանի պաշտոն զբաղեցնելը Վլադիմիր Բադալյանը  եղել է  ԱԺ պատգամավոր:

Ծնվել է 1958 թ. հոկտեմբերի 4-ին Երեւանում: 1980 թ. ավարտել է Երեւանի պոլիտեխնիկական ինստիտուտը: Ճարտարագետ-հարստացնող:
1980-1981 թթ. աշխատել է Ղազախստանի Ջեսկազգանի լեռնամետալուրգիական գործարանի ԳԱՄ-ում վարպետ, ճարտարագետ, 1981-1985 թթ. «Երքիմշին» տրեստում` ճարտարագետ: 1985-1990 թթ. կատարել է կոմերիտական աշխատանք:
1990-1991 թթ. աշխատել է ՀամԼԿԵՄ կենտկոմում: 1991-1998 թթ. եղել է «Էրզրում» ԳԱՄ համանախագահ, 1998-1999 թթ.` ՀՀ կառավարության գործերի կառավարիչի տեղակալ, 1999-2003 թթ.` «Հրազդան» մարզահամալիրի տնօրեն:

2003 թ. հուլիսի 23-ին ԱԺ պատգամավոր է ընտրվել թիվ 16 ընտրատարածքից: Եղել է  «Ժողովրդական պատգամավոր» պատգամավորական խմբի անդամ: 2006թ. հուլիսի 31-ից ՀՀԿ անդամ է: 2008թ. օգոստոսի 28-ին ՀՀ Նախագահի հրամանագրով նշանակվել է Թուրքմենստանում Հայաստանի Հանրապետության արտակարգ եւ լիազոր դեսպան: 2009թ. դեկտեմբերի 21-ին ՀՀ Նախագահի հրամանագրով նշանակվել է Տաջիկստանի Հանրապետությունում Հայաստանի Հանրապետության արտակարգ եւ լիազոր դեսպան, նստավայրը՝ Աշխաբադ:

Վլադիմիր Բադալյանի կենսագրությունից  պարզ է դառնում, որ նա բիզնես գործունեություն  չի ծավալել,  գրեթե միշտ աշխատել է պետական համակարգում, այսինքն` ապրել է աշխատավարձով, հետեւաբար հարց է առաջանում` ի՞նչ ճանապարհով է իր գումարները վաստակել Թուրքմենստանում մեր դեսպանը:

Ի դեպ, տարիներ առաջ տպագրված մամուլի հրապարակումներից մեկի համաձայն` դեսպանը հայհոյանքներով է խոսում դեսպանատան աշխատակիցների հետ: Դեսպանը, սակայն, հերքել է այդ լուրերը:

ՍՈՆԱ ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝