ՀԱՅ ԲՌՆՑՔԱՄԱՐՏԻԿՆԵՐԸ ՄԵԿՆԵՑԻՆ ԲԱՔՈՒ

ՀԱՅ ԲՌՆՑՔԱՄԱՐՏԻԿՆԵՐԸ ՄԵԿՆԵՑԻՆ ԲԱՔՈՒ

Եվրոպական առաջին խաղերին մասնակցող մեր բռնցքամարտիկները մեկնեցին Բաքու: Ինչպես հայտնում է Հայաստանի բռնցքամարտի  ֆեդերացիայի մամուլի ծառայությունը, բռնցքամարտի հայկական պատվիրակության կազմում են 49 կգ քաշային Արտյոմ Ալեքսանյանը, 52 կգ քաշային Նարեկ Աբգարյանը, 56 կգ քաշային Արամ Ավագյանը, 60 կգ քաշային Սամվել Բարսեղյանը, 64 կգ քաշային Հովհաննես Բաչկովը , 81 կգ քաշային Նիկոլ Արությունովը, ինչպես նաև մարզիչներ Կարեն Աղամալյանը, Արման Հարությունյանը և Վյաչեսլավ Արությունովը: Հայ բռնցքամարտիկները Բաքվում իրենց ելույթը կսկսեն հունիսի 16-ին: Նախնական տվյալներով մեր մարզիկներից առաջինը ռինգ դուրս կգան 56 կգ քաշային Արամ Ավագյանը, 60 կգ քաշային Սամվել Բարսեղյանը և 64 կգ քաշային Հովհաննես Բաչկովը: Հայաստանի բռնցքամարտի ֆեդերացիան մրցավայր է ուղարկել վերը նշված քաշային կարգերի ուժեղագույն մարզիկներին և յուրաքանչյուր մարզիկից մեդալի ակնկալիք ունի: Հայաստանի բռնցքամարտի ֆեդերացիայի նախագահ Արթուր Գեւորգյանը վստահ է հայ մարզիկների հաղթանակին. ՙՎստահ եմ,որ ունենալու ենք հաղթանակներ և մեր տղաներին հաջողվելու է այդ երկրում ծածանել հայոց եռագույնը։ Նրանց մասնակցությունն անգամ իսկական հերոսություն և հայրենասիրության դրսևորում է։ Այս խաղերը բռնցքամարտիկների համար ուղեգիր է դեպի աշխարհի առաջնություն,որտեղ էլ նրանք հնարավորություն կստանան պայքարել ՌԻՈ 2016–ի ուղեգրերի համար՚,- իր ֆեյսբուքյան էջում գրել է Արթուր Գեւորգյանը:

Հայաստանի բռնցքամարտի հավաքականը նախքան մրցավայր մեկնելը անցել է ֆիզիկական և հոգեբանական բարձր պատրաստվածություն և պատրաստ են Բաքվում բարձր պահել հայկական սպորտի անունը:

ՔՐԻՍՏԻՆԵ ՊԵՏՐՈՍՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝