«ՄԻ ԲԱՆԻ ՄԱՍԻՆ, ՈՐԸ ԴԵՌ ՉԿԱ, Ի՞ՆՉ ԱՍԵՍ»

«ՄԻ ԲԱՆԻ ՄԱՍԻՆ, ՈՐԸ ԴԵՌ ՉԿԱ, Ի՞ՆՉ ԱՍԵՍ»

Վերջին օրերին լայնորեն շրջանառվում է, որ Ազգային ժողովի անկախ պատգամավոր Էդմոն Մարուքյանը, հետ չմնալով ընդդիմադիր պատգամավորներից, որոշել է կուսակցություն հիմնել ու այն էլ` բացահայտ արեւմտամետ ուղղությամբ: Իսկ տեղեկությունը նա անձամբ է հաստատել` հավելելով, որ այս պահին տիրապետում է կուսակցություն հիմնելու համար բոլոր անհրաժեշտ ռեսուրսներին: Ըստ տարածված լուրերի` նոր ստեղծվելիք կուսակցության անդամներից մեկն էլ լինելու ԱԺ «Ժառանգություն» խմբակցության քարտուղար ԹԵՎԱՆ ՊՈՂՈՍՅԱՆԸ, ինչի մասին էլ «Իրավունքը» զրուցեց հենց նրա հետ:

ԻՆՉ ՈՒԶՈՒՄ Է ԼԻՆԻ,
ՄԻԱՅՆ ՊՐՈԵՎՐՈՊԱԿԱ՞Ն ԼԻՆԻ

–Պարոն Պողոսյան, հաշվի առնելով, որ Է. Մարուքյանի կողմից ստեղծվելիք կուսակցությունում հնարավոր է նաեւ Դուք լինեք, կարո՞ղ ենք ասել, որ մտադիր եք Ձեր քաղաքական կապերը խզել Րաֆֆի Հովհաննիսյանի հետ:
– Նախեւառաջ խնդիր չեմ տեսնում` քաղաքական գծի խզման որեւէ հարցի շրջանակի հետ կապված, քանի որ կարելի է անդամակցել կամ ճանապարհ գնալ, եթե որեւէ կառույց արդեն գոյություն ունի: Եվ երկրորդ` ես կուսակցական չեմ եւ կուսակցական խնդիրների հետ որեւէ առնչություն չունեմ` անդամակցելու կամ չանդամակցելու: Իսկ ցանկացած ուժ, որը կունենա պրոեվրոպական ուղղվածություն` լինի ՍՊԸ, ՀԿ կամ կուսակցություն, միշտ պատրաստ եմ նրանց հետ համագործակցել, քանի որ տեսնում Հայաստանի երկարատեւ շահերի բավարարումը ու զարգացումը Եվրոպական ինտեգրման մեջ:
– Փաստորեն, առաջիկայո՞ւմ էլ չեք պատրաստվում դառնալ կուսակցական, այլ միայն կլինեն համագործակցություննե՞ր:
– Կարելի է խոսել այդ մասին, երբ կա կոնկրետ, վերջնական նախաձեռնություն: Քննարկումներ 100 ձեւի կարելի է անել, բայց երբ կլինի այդ ամենը կոնկրետ, այն ժամանակ էլ կխոսենք: Իսկ ո՞վ է ասել, որ, միեւնույն ժամանակ, չեմ ասի, որ գնում եմ ու անդամակցեմ: Բայց այսօր մի բանի մասին, որը դեռ չկա, ի՞նչ ասես: Այսօրվա դրությամբ ինքս կուսակցական նախասիրություն չունեմ ու դրա համար երբեւէ կուսակցական չեմ դարձել, բայց կլինեն ուղղություններ, քաղաքական զարգացումներ, պարզ կդառնա հետագայում:

«ԻՍԿ Ո՞Վ Է ԱՍԵԼ,
ՈՐ ԻՆՉ-ՈՐ ՏԵՂ ԵՆՔ ԳՆՈՒՄ»

–Գաղտնիք չէ, որ ընդդիմությունում, անկախ «Ժառանգություն» խմբակցության գործունեությունից, Դուք որոշակի վարկանիշ ձեռք եք բերել: Չկա՞ մտավախություն, որ Էդմոն Մարուքյանի հետ նույն ուղղությամբ գնալով` կկորցնեք այդ վարկանիշը:
– Առաջին հերթին` եթե ինձ գնահատեն, ապա գնահատելու են որպես Թեւան Պողոսյան` իմ եւ իմ արած աշխատանքի շրջանակներում: Իսկ ո՞վ է ասել, որ ինչ-որ տեղ ենք գնում: Ես դեռ մինչեւ 2019 թվականը  խմբակցությունում եմ լինելու: Իմ էթիկայի կապերը շատ ավելի հզոր են, քան որեւէ մի այլ խնդիր, ինչը մեկ անգամ չէ, որ ապացուցել եմ: Ինձ թվում է` ամեն ինչ դեռ առջեւում է: Խոսել ապագայի մասին, դեռ այն էլ չկողմնորոշված, կարծում եմ` այսօրվա դրությամբ շատ վաղ է: Այնպես որ, ես կատարում եմ իմ աշխատանքը որակով ու պատվով եւ ձգտում եմ իմ նախընտրական խոստումները կյանքի կոչել:
– Այսինքն` «Ժառանգություն» խմբակցությունո՞ւմ էլ դեռ չեք քննարկել Ձեր ապագա ծրագրերի մասին:
– Բայց ինչի՞ մասին քննարկում լինի:
– Ամեն դեպքում, մտադիր եք նոր քաղաքական ուժի հարել:
– Հիմա վաղը, եթե Նիկոլ Փաշինյանի հետ համագործակցեմ, էլի նո՞ւյնն եք հարցնելու: Բոլորի հետ էլ աշխատելու եմ, ովքեր կունենան պրոեվրոպական ուղղություն եւ, ընդհանրապես, մի բան, որին կհավատամ, որ Հայաստանի համար լավ է: Համարում եմ, որ դրանով կնպաստեմ այն խնդիրների լուծմանը, որը հայանպաստ է, ուղղությունն էլ, արդեն ասացի, թե որն է լինելու: Հիմա մարդիկ, եթե ինչ-որ հարցեր են քննարկում, չի նշանակում, որ վաղը կամ մյուս օրը այդպես են անելու կամ ինչ-որ բան են փոխելու: Այնպես որ, անիմաստ տեղը աժիոտաժ ստեղծելը իմ ոճի մեջ չէ: Իհարկե, կարդացել եմ, որ մամուլում ոգեւորվել են նոր ստեղծվելիք կուսակցության մասին լուրերից, բայց ընթացքը դեռ կյանքը կապացուցի: Երբ 2012 թվականին եկա խորհրդարան, 100 ու մի բան գրեցին: Հետո ինձ թվում է` նույնիսկ շատերը զարմացան իրենց գրածներից, որոնք իրականություն չդարձան:

«ՄԱՐՈՒՔՅԱՆՆ ԸՆԴԱՄԵՆԸ ԽՈՍԵԼ Է ԱՊԱԳԱ
ՑԱՆԿՈՒԹՅՈՒՆՆԵՐԻ ՈՒ ՏԵՍԼԱԿԱՆՆԵՐԻ ՄԱՍԻՆ»

–Ի վերջո, ի՞նչ քննարկում եք ունեցել պարոն Մարուքյանի հետ` նոր կուսակցություն ստեղծելու վերաբերյալ:
– Հանդիպում, քննարկում, նախնական խոսակցություններ եղել են, բայց որեւէ վերջնական, կոնկրետ հարցերի մասին խոսք չի եղել: Իսկ պարոն Մարուքյանը մամուլում ընդամենը խոսել է ապագա ցանկությունների եւ տեսլականների մասին, նորից եմ ասում, որ ուժը ունենա պրոեվրոպական ուղղություն:
– Ըստ Ձեզ, նոր ձեւավորվող կուսակցությունները կկարողանան լուրջ տեղ գրավել քաղաքական դաշտում:
– Այսպես, թե այնպես, սերնդափոխություն պետք է լինի, եւ դա պետք է բոլորը գիտակցեն: Իսկ դա կլինի կուսակցությունների ներսում, թե նոր դեմքերի գալով` արդեն կյանքը ցույց կտա, բայց, այնուամենայնիվ, փոփոխություններ լինելու են:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝