ՄԵԾԱՀԱՍԱԿ ԲՆԱԿՉՈՒԹՅԱՆ ԳՐԵԹԵ ՄԵԿ ԵՐՐՈՐԴԸ ԿԱՆՈՆԱՎՈՐ ԾԽՈՂ Է
Արխիվ 12-16ՄԵԾԱՀԱՍԱԿ ԲՆԱԿՉՈՒԹՅԱՆ ԳՐԵԹԵ ՄԵԿ ԵՐՐՈԴԸ ԿԱՆՈՆԱՎՈՐ ԾԽՈՂ Է
Առողջապահության համաշխարհային կազմակերպության անդամ երկրները, որոնց թվում` Հայաստանը, մայիսի 31-ին նշում են «Առանց ծխախոտի» համաշխարհային օրը: ԱՀԿ-ն այս օրը նշում է 1988 թվականից, իսկ Հայաստանը` 2000-ից: Այդ մասին ՀՀ առողջապահության նախարարությունում կազմակերպված ասուլիսի ժամանակ ասաց ակադեմիկոս Ս.Ավդալբեկյանի անվան Առողջապահության ազգային ինստիտուտի տնօրեն ԱԼԵՔՍԱՆԴՐ ԲԱԶԱՐՉՅԱՆԸ:
«Հայաստանում ծխախոտի օգտագործման տարածվածությունը բարձր է հատկապես տղամարդկանց շրջանում: Վիճակագրական տվյալների համաձայն` մեծահասակ բնակչության գրեթե մեկ երրորդը կանոնավոր (ամենօրյա) ծխող է, օգտագործողների ճնշող մեծամասնությունը տղամարդիկ են»,- նշեց Ա. Բազարչյանը:
Իր իսկ խոսքերով` ինչպես ամբողջ աշխարհում, այնպես էլ Հայաստանում տղաների շրջանում ծխելու առաջին փորձերը կատարվում են 13-15 տարեկանում: Իրականացված հարցման համաձայն` 15 և բարձր տարիքային խմբերում ծխախոտի օգտագործման տարածվածությունը կազմել է 24%` տղամարդկանց շրջանում 50%, կանանց շրջանում` մինչև 3%:
«1999 թվականից Հայաստանում 2-3 տարին մեկ մեծահասակ բնակչության շրջանում իրականացվում են մի շարք հետազոտություններ, որոնք միտված են հետևելու ծխախոտի տարածվածության մակարդակին: Դեռահասների շրջանում տարբեր գործիքներ ու մեթոդներ են կիրառվում, որոնց արդյունքներով ծխախոտ է օգտագործում 13-15 տարեկան տղաների 5-6%-ը», - ասաց բանախոսը՝ հավելելով, որ հերթական հետազոտություն նախատեսվում է իրականացել այս տարի աշնանը։
Վ. ՄՈՒՐԱԴՅԱՆ
