ՄԽԻԹԱՐՅԱՆԸ ԱՄՐԱՊՆԴԵՑ ԴԻՐՔԵՐԸ "ԲՈՐՈՒՍԻԱՅՈՒՄ"
Արխիվ 12-16ՄԽԻԹԱՐՅԱՆԸ ԱՄՐԱՊՆԴԵՑ ԴԻՐՔԵՐԸ "ԲՈՐՈՒՍԻԱՅՈՒՄ"
Ֆուտբոլի ազգային առաջնություններն ավարտվեցին: Թեեւ այս մրցաշրջանը բարդ ստացվեց հատկապես հայ ֆուտբոլիստների համար, բայց դրա վերջնամասը խոստումնալից էր ու հստակեցրեց ապագայի հետ կապված գրեթե բոլոր հարցերը: Գերմանիայի առաջնության վերջին տուրերում Հենրիխ Մխիթարյանն աչքի ընկավ իր արդյունավետ խաղով, իսկ առաջնության վերջին տուրիª Բրեմենի "Վերդերի" դեմ հանդիպումը լավագույններից էր Ազգային ընտրանու կիսապաշտպանի համար: Whoscored.com-ը ներկայացրել է Մխիթարյանի վիճակագրությունը եւ գնահատականը այդ խաղում: Հայաստանի հավաքականի 26-ամյա ֆուտբոլիստը խաղադաշտում անցկացրել էր 90 րոպե եւ կատարել 5 հարված, որոնցից երկուսն ընթացել են դարպասի ուղղությամբ: Մխիթարյանի կատարած 68 փոխանցումները 76.5 տոկոս ճշգրտությամբ էին: Նա 1 անգամ հաղթել է օդային մենապայքարում, 4 անգամ խլել է գնդակը եւ 2 անգամ կանգնեցրել է մրցակցի փոխանցումը: Հենրիխը կանոնները խախտել է մեկ անգամ, իսկ նրա դեմ պայքարում խախտում թույլ չեն տվել: Մխիթարյանը ստացել է 8.87 գնահատականը եւ, ճանաչվելով խաղի լավագույն ֆուտբոլիստª ընդգրկվել է նաեւ տուրի խորհրդանշական հավաքականում:
Հենրիխ Մխիթարյանի մասին ֆուտբոլային լեզվով շքեղ արտահայտվել է նաեւ Goal.com-ը. "Մխիթարյանը "հոշոտեց" "Վերդերի" պաշտպանության աջ եզրը: Հենրիխն արդյունավետ օգտագործեց իր արագությունը եւ պարգեւատրվեց խփած գոլով": Գերմանական մյուս պարբերականները եւս անդրադարձել են Մխիթարյանի խաղին. "Bild"-ը Հայաստանի հավաքականի 26-ամյա ֆուտբոլիստին տվել է ամենաբարձրª 1 գնահատականը: Մխիթարյանին ամենաբարձր գնահատական է շնորհել նաեւ "Ruhr Nachrichten"-ըª նաեւ գրելով հետեւյալը. "Մխիթարյանը գոլային պահ ունեցավ արդեն երկրորդ րոպեին եւ միանգամից մտավ խաղի ու "Բորուսիայի" կոմբինացիների մեջ: Դրա արդյունքում նա դարձավ գոլի հեղինակ":
Հիշեցնենք, որ Մխիթարյանը ավարտված առաջնությունում 28 խաղում դարձել էր 3 գոլի եւ 4 գոլային փոխանցման հեղինակ: Մրցաշրջանի վերջնամասում Հենրիխ Մխիթարյանը կարողացավ ապացուցել իր բարձր կարգն ու կարեւորությունը թիմի համար, ապահովագրելով իրեն` նոր մարզչի նշանակումից հետո սպասվելիք փոփոխություններից:
ՔՐԻՍՏԻՆԵ ՊԵՏՐՈՍՅԱՆ
Հավանեցի՞ր հոդվածը, կիսվիր ընկերներիդ հետ
