"5800 ԴԻՄՈՒՄՆԵՐԻՑ ՄՈՏ 3000-Ի` ՌԴ ՄՈՒՏՔ ԳՈՐԾԵԼՈՒ ԱՐԳԵԼՔԸ ՀԱՆՎԵԼ Է"
Արխիվ 12-16Հայտնի է, որ Ռուսաստանի միգրացիոն օրենսդրության եւ կիրառվող պրակտիկայում վերջին շրջանում տեղի ունեցած խստացումների արդյունքում բազմաթիվ օտարերկրյա քաղաքացիների նկատմամբ սկսել է կիրառվել ՌԴ մուտքի արգելանք` մինչեւ 10 տարի ժամկետով: Հայաստանի հազարավոր քաղաքացիներ եւս այդ արգելանքի տակ էին: Թե որքան քաղաքացիների մուտքի արգելանք է վերացվել եւ ինչ տենդենց է առհասարակ նկատվում ՌԴ մուտքի արգելանք ունեցողների հետ կապված` փորձեցինք պարզել Տեղական կառավարման եւ արտակարգ իրավիճակների նախարարության պետական միգրացիոն ծառայության պետ ԳԱԳԻԿ ԵԳԱՆՅԱՆԻՑ:
-Այս տարվա առաջին եռամսյակում ՌԴ մուտքի արգելքի պատճառով Հայաստանից Ռուսաստան մեկնել չկարողացող քաղաքացիներից ավելի քան 6400-ն արդեն դիմել է պետական միգրացիոն ծառայությանը` խնդրանքով, որ արգելքը հանվելու համար դիմում ներկայացվի ռուսական կողմին: Յուրաքանչյուր օր 50-60 դիմում ենք ստանում:
Դիմումներից 5800-ն արդեն ուղարկվել է: Վերջին շրջանում աճել է դրական ելքերի տեսակարար կշիռը եւ կրճատվել է քննարկումների ժամկետը: 5800 դիմումներից մոտ 3000-ը դրական ելք են ունեցել, այսինքնª ՌԴ մուտք գործելու արգելքը հանվել է: Մենք ամենօրյա աշխատանք ենք տանում, որպեսզի հայաստանցիներին թույլատրվի մեկնել ՌԴ եւ աշխատել:
Երբեմն մարդիկ չեն պատկերացնում` ինչն ինչոց է եւ տարբեր, ընդ որումª ոչ ճիշտ կարծիքներ են հայտնում: Օրինակª իբր իրականում ՌԴ-ն զտման գործընթաց է իրականացնում, այսինքն` իր երկրում փորձում է պահել հայ աշխատուժին: Նման բան չկա: Վերջերս 75 տարեկան թոշակառու մարդու համար ենք միջնորդել, նա էլ հո աշխատուժ չէ՞: Ցանկացած երկրում, եթե էմիգրանտը խախտումներ անի, նրան պետք է հետ ուղարկեն: Ներկայիս զիջումները ՌԴ-ի կողմից միայն բարի կամքի դրսեւորում է, այլ անուն տալ ես չեմ կարող:
ԻԼՈՆԱ ԱԶԱՐՅԱՆ
Հավանեցի՞ր հոդվածը, կիսվիր ընկերներիդ հետ
