ԷԼԵԿՏՐԱԷՆԵՐԳԻԱՅԻ ՍԱԿԱԳՆԻ ՈԴԻՍԱԿԱՆԸ` ՈՐՊԵՍ ՔԱՂԱՔԱԿԱՆ ԿԱՏԵԳՈՐԻԱ
Արխիվ 12-16ԷԼԵԿՏՐԱԷՆԵՐԳԻԱՅԻ ՍԱԿԱԳՆԻ ՈԴԻՍԱԿԱՆԸ`
ՈՐՊԵՍ ՔԱՂԱՔԱԿԱՆ ԿԱՏԵԳՈՐԻԱ
Քաղաքական ընդդիմադիր դաշտում կրքերը թեժանում են: Այս անգամ համալրված ընդդիմությունը խոր քնից արթնացել ու էլեկտրաէներգիայի սակագնի թանկացման դեմ է պայքարում: Սակայն, այլեւս ոչ թե նախկին «քառյակ»-«եռյակ» ձեւաչափերով, այլ յուրաքանչյուրը յուրովի:
Ինչպես միշտ, հարցի լուծումը գտնելու համար, ԱԺ ՀԱԿ խմբակցությունն առաջարկում է ժամանակավոր խորհրդարանական հանձնաժողով ստեղծել եւ արդեն երեկվանից բաղձալի 44 պատգամավորական ստորագրություն է մուրում, բայց ապարդյուն: Նրանց միացավ միայն «Ժառանգությունն» ու ՕԵԿ-ը: Իսկ առավել խոհեմ ընդդիմությունը` ՀՅԴ-ն ու ԲՀԿ-ն, խնդրի լուծման այլ տարբերակներ են փնտրում: Թեպետ ԲՀԿ-ում հավատացնում են, որ ոչ միայն լուծումն են գտել, այլեւ էլեկտրաէներգիայի սակագինը չթանկացնելու բաղադրատոմս են «հայտնաբերել», ինչի առթիվ էլ կողմ են ոչ թե ստորագրահավաքների, այլեւ ընդլայնված խորհրդարանական լսումների: Այս, ինչպես նաեւ խորհրդարանում տիրող լարված իրավիճակի մասին էլ «Իրավունքը» զրուցեց ԱԺ ԲՀԿ խմբակցության պատգամավոր ՄԻՔԱՅԵԼ ՄԵԼՔՈՒՄՅԱՆԻ հետ:
«ՄԵՆՔ ՊԱՏՐԱՍՏ ԵՆՔ
ՔՆՆԱՐԿՄԱՆ ԵՎ ԼՈՒԾՈՒՄՆԵՐ ԱՌԱՋԱՐԿԵԼՈՒ»
–Պարոն Մելքումյան, ԱԺ հերթական քառօրյան խիստ լարված մեկնարկ ունեցավ, ըստ Ձեզ, որքանո՞վ այն կարող է ի նպաստ ժողովրդի ազդեցութուն ունենալ էլեկտրաէներգիայի սակագնի թանկացման վրա:
– Այս աժիոտաժը, բնականաբար, ժողովրդի տրամադրությունների, մոտեցումների արդյունքն է: Բոլորն էլ գիտեն, որ սակագնի թանկացումը լուրջ ազդեցություն ունեցող գործոն է լինելու: Դրա համար պետք է ամբողջ շղթան շատ լուրջ ուսումնասիրել եւ լուծում տալ: Ես լուծում տալու կողմնակից եմ: Իսկ եթե պետք է լուծում, այդ լուծումները մենք ունենք: Արդեն իսկ դիմել ենք ՀՀ վարչապետին եւ Հանրային ծառայությունները կարգավորող հանձնաժողովին` ներկայացնելով մեր առաջարկները: Այնպես որ, «Բարգավաճ Հայաստանը» եւ ես անձամբ այդ լուծումները տեսնում եմ: Մենք պատրաստ ենք քննարկման եւ լուծումներ առաջարկելու:
– Իսկ փորձե՞լ եք հարցը քննարկել եւ Ձեր առաջարկները ներկայացնել հենց Հանրային ծառայությունները կարգավորող հանձնաժողովի նախագահ Ռոբերտ Նազարյանին:
– Ինչպես նշեցի, մենք արդեն այդ առաջարկներն ուղարկել ենք հանձնաժողովին, եւ իրենք ստացել են դա: Բայց Ռոբերտ Նազարյանին չեմ տեսել անձնապես: Ինձ թվում է` մինչեւ այդ քննարկումները, կհանդիպենք, կզրուցենք: Անձամբ ես շահագրգիռ եմ, որ մեր մոտեցումները հնարավորինս ընդունվեն, որովհետեւ այնտեղ ե՛ւ սոցիալական մաս կա, ե՛ւ խոշոր ձեռնարկությունների չօգտագործված, բայց պատվիրված հզորությունների մասով առաջարկներ կան, որի ռիսկերը գնում, բաշխվում է սակագնի ու բնակչության վրա: Այդ հարցերը պետք է լուծել, եւ դրանք ամբողջ մի շղթա է: Կոնկրետ տարեկան կտրվածքով վերջին 4-5 տարում հստակ գիտենք, թե ինչքան է ձեւավորվում պարտքը եւ այլն, այդ բոլոր լուծումները մենք ունենք: Հիմա պետք է համակողմանի քննարկենք ու տեսնենք, թե ինչ է հնարավոր անել:
«ԽՆԴԻՐՆԵՐԸ ԱՌԱՎԵԼԱՊԵՍ ՆԱԵՎ ՀԷՑ-ԻՑ ԴՈՒՐՍ ԵՆ»
–Հայաստանի էլեկտրական ցանցերի (ՀԷՑ) գլխավոր տնօրեն Եվգենի Բիբինի զարմիկն է ՀԷՑ-ում համակարգային աուդիտ անցկացնում: Չե՞ք կարծում, որ սա, մեղմ ասած, անտրամաբանական է:
– Գիտեք, Հայաստանի էլեկտրական ցանցերն ունի սեփականատերեր, եւ այդ սեփականատերերը շահագրգիռ են իրենց գործունեության մեջ ու թույլ չեն տա, որ որեւէ մեկը խաբի իրենց: Ես շատ միամիտ բան եմ համարում դա, թե ով է անում աուդիտ, ով չի անում: Կա սեփականատեր, որը թույլ չի տալիս, որ խաբեն իրեն եւ վերջ: Ավելին` խնդիրները միայն այդտեղ չեն, խնդիրները առավելապես նաեւ ՀԵՑ-ից դուրս են:
– Ի դեպ, սեփականատերերի եւ սեփականաշնորհման մասին. չե՞ք կարծում, որ այսօր ծառացած խնդիրը շատ ավելի հին արմատներ ունի:
– Չէի ասի, որովհետեւ եթե սեփականաշնորհել են, չի նշանակում, որ պետությունը ձեռքերը լվացել է արդեն: Կարելի է պարտադրել, որ ներդրումային պարտավորությունները կատարվեն: Սակագին է հաստատվում եւ սակագնի մեջ պետք է դրվի այդ ներդրումների, այդ թվում` կորուստների նվազեցման խնդիրը: Օրինակ, եթե ատոմակայանը քիչ է արտադրել էներգիա, ինչո՞ւ պիտի դրա պատասխանը ՀԷՑ-ը տա: Օրենքով պետությունը պիտի փոխհատուցի:
ՀՐԱՆՏ ՍԱՐԱՖՅԱՆ
