ԶԱՐՈՒՀԻ ՓՈՍՏԱՆՋՅԱՆ. "ՍՈՒՐԻԿ ԽԱՉԱՏՐՅԱՆԻ ՊԱՇՏՈՆԱՎԱՐՈՒՄԸ ԴԱՌՆՈՒՄ Է ՀԱՍԱՐԱԿՈՒԹՅԱՆ ՀԱՄԱՐ ՉԱՐԻՔ"
Արխիվ 12-16
ԱԺ քառօրյայի մեկնարկին "Ժառանգության" պատգամավոր Զարուհի Փոստանջյանը դիմեց ԱԺ նախագահ Գալուստ Սահակյանին` պահանջելով շրջանառության մեջ դնել իր` ԱԺ հայտարարության նախագիծը` Սյունիքի մարզպետ Սուրիկ Խաչատրյանի եւ նրա որդու մասին:Նա ասաց, որ իր նախագիծը վերաբերում է Սուրիկ Խաչատրյանի գործունեությանը եւ նրա կողմից կատարված հանցագործություններին. "Նա մեղադրվում էր ծանր հանցագործություն կատարելու մեջ: Այդ թվում` նա դատապարտված է եղել մի քանի անգամ եւ չպետք է պաշտոնավարի: Դուք այդ նախաձեռնությունը, շրջանցելով ԱԺ կանոնակարգ օրենքի պահանջները, չդրեցիք շրջանառության մեջ: Եվ մենք այս վերջին օրերին տեսանք, որ Սուրիկ Խաչատրյանի որդին նորից ընդգրկված է վիճաբանությունների մեջ, որի հետեւանքով մի երիտասարդ կորցրել է աչքը, մյուսը ստացել է մարմնական վնասվածքներ: Այս մեղքի բաժինը նաեւ, կարծում եմ, Դուք եք կրում: Այդ երիտասարդները մեր հանրության մի մասն են: Այս անպատժելի մթնոլորտի հետեւանքով Սուրիկ Խաչատրյանի պաշտոնավորումը դառնում է հասարակության համար սպառնալիք",- ասաց Զարուհի Փոստանջյանը, այնուհետ հավելեց, որ. "Փորձաքննության արդյունքներ ունենք, որ նա թմրանյութ է օգտագործում: Փաստորեն, այս արատավոր ընտանիքը, ունենալով լծակներ, շարունակում է սպառնալիք լինել մեր հանրության համար":
ԱԺ նախագահն ասաց, որ դա ԱԺ-ի քննարկման հարց չէ, այլ` դատախազության, ուստի, երբ շուտով Գեւորգ Կոստանյանը հաշվետվություն ներկայացնի ԱԺ-ում, Զարուհի Փոստանջյանը կարող է այդ հարցերը բարձրացնել նրա մոտ. "Բոլոր պատգամավորները դատապարտում են: Եթե հանցակազմ կա, պիտի հանցագործը պատժվի":
ԱՐՄԵՆՈՒՀԻ ՀԱԿՈԲՅԱՆ
Հավանեցի՞ր հոդվածը, կիսվիր ընկերներիդ հետ
