ԳԱՐՆԱՆԱՅԻՆ ՍՐԱՑՈՒՄՆԵՐ. ՔԱՂԱՔԱԿԱՆ ԴԱՇՏԸ "ՏՈԿԻ՞ ԵՆ ՏՎԵԼ"
Արխիվ 12-16ԳԱՐՆԱՆԱՅԻՆ ՍՐԱՑՈՒՄՆԵՐ.
ՔԱՂԱՔԱԿԱՆ ԴԱՇՏԸ "ՏՈԿԻ՞ ԵՆ ՏՎԵԼ"
Այս քառօրյան սկսվեց բավականին բուռն: Պատճառը` Հայաստանի էլցանցերի հայտն է` էլեկտրաէներգիայի սակագինը բարձրացնելու: Թե ինչու հանկարծ ասպարեզում հայտնվեց այդ նոր պատուհասը, ինչքանով են հիմնավորված կամ անհիմն փաստարկները, առանձին հարց է: Սակայն փաստը մնում է փաստ, որ խորհրդարանի աշխատանքներին տեղի ունեցավ ընդմիջում, որի ընթացքում ԲՀԿ-ն, ՀԱԿ-ը եւ "Ժառանգությունը" խորհրդակցեցին:
ԽՈՐՀՐԴԱՐԱՆԱԿԱՆ ԸՆԴԴԻՄՈՒԹՅԱՆ "ԳԱԼՎԱՆԱՑՈՒՄ"
Հիշո՞ւմ եք, ֆիզիկայի դպրոցական դասագրքի օրինակը` թե ինչպես իտալացի բժիշկ Գալվանիի գիտափորձի ժամանակ գորտի առանձին վերցված մկանը կծկվում է էլեկտրական հոսանքի իմպուլսից: Մոտավորապես նույն ազդեցությունը խորհրդարանական ընդդիմության վրա թողեց էլեկտրաէներգիայի հնարավոր թանկացման լուրը: Միանգամից ելույթներ ունենալու, քայլերի դիմելու ասպարեզ գոյացավ:
Բայց մոտեցումները տարբեր են: Եթե ՀԱԿ-ը կողմնակից է ԱԺ ժամանակավոր հանձնաժողով ստեղծելուն եւ այդ նպատակով ստորագրություններ է հավաքում` արտահերթ նիստ գումարելու համար, ապա ԲՀԿ-ն կողմնակից է էլեկտրաէներգիայի սակագների շուրջ խորհրդարանական լսումներ կազմակերպել: Առաջին տարբերակը ենթադրում է ամիսների աշխատանք, իսկ երկրորդը` առավել հրատապ քննարկում: Բայց երկուսի դեպքում էլ մի "բայց" կա` ընդունվելու համար անհրաժեշտ է ԱԺ մեծամասնության համաձայնությունը:
Խորհրդարանական մեծամասնությունն էլ, ՀԿԿ խմբակցության անդամ Հովհաննես Սահակյանի խոսքերով, ուրբաթ օրը հանդիպելու է Հանրային ծառայությունները կարգավորող հանձնաժողովի նախագահ Ռոբերտ Նազարյանին եւ նրանից պարզաբանումներ ստանալուց հետո միայն կճշտի իր անելիքները:
Ինչեւէ, փաստը մնում է փաստ, որ թանկացումը, մեղմ ասած, չի կարող ուրախալի լինել հանրության համար, ու այս կամ այն կերպ դրա շուրջ դժգոհությունն արտահայտվելու է: Մայիսի վերջերին հանրահավաք է նախատեսված թանկացումների դեմ, սոցիալական ցանցերում այդ հանրահավաքին նախաձեռնող խումբը մարդ է հրավիրում, իսկ խորհրդարանական ընդդիմությունն էլ ակտիվորեն ելույթներով է հանդես գալիս: Գալվանացված, կամ ինչպես ժողովուրդը կասեր` "տոկի տված" ընդդիմադիր դաշտը աշխուժանում է: Անշուշտ աշխուժություն կլինի եւ սոցիալական նշանակություն ունեցող այլ խնդիրներում: Մասնավորապես համայնքների խոշորացման շուրջ էլ տարաձայնությունների պակաս չկա: Նույնիսկ միեւնույն կուսակցությունում` ԲՀԿ-ում, միաժամանակ կան խոշորացմանը կողմ եւ դեմ արտահայտվողներ:
Բայց միաժամանակ նաեւ ակնառու է, որ համայնքների խոշորացման հանրաքվեին ընտրողների ակտիվությունը շատ ցածր էր, թեեւ մասնակիցների մեծամասնությունը կողմ քվեարկեց:
Բայց ոչ միայն սոցիալական հիմնախնդիրների շուրջ աշխուժություն եւ տարակարծություն կա, այլեւ որոշակի շարժ է նկատվում "Արեւմուտք, թե Ռուսաստան" ավանդական հարթությունում:
ԱՇԽԱՐՀԱՔԱՂԱՔԱԿԱՆ ՏՎԱՅՏԱՆՔՆԵՐ
Ինչպես եւ խոստացված էր, Տիգրան Ուրիխանյանն անցկացրեց "Ալյանս" անունը կրող կուսակցության հիմնադիր համագումարը: Կուսակցությունը կողմնորոշված է ավելի շուտ դեպի հյուսիս, իսկ ուղղվածությունը ձախ կենտրոնամետ է: Այդ դաշտում որոշ չափով նաեւ այլ կուսակցությունների ակտիվություն է նկատվում` ՀԴԿ, ՍԴՀԿ, Կոմունիստներ:
Առանձին հարց է նաեւ Ռոբերտ Քոչարյանի կողմնակիցների մասնակցությամբ տարբեր ինտրիգային եւ տեղեկատվական շարժերը: Այդտեղ էլ, ինչպես արդեն հիշատակել էինք, օբյեկտիվորեն նկատվում է առաջին եւ երկրորդ նախագահների ճամբարների համաչափ աշխատանքը, ինչպես ստվերում, այնպես էլ տեղեկատվական-քարոզչական դաշտում:
Սակայն ամենաջղաձիգ, իսկական "տոկի տված" վիճակ է արեւմտամետների դաշտում: Այդտեղ Ռիգայի ԵՄ Արեւելյան գործընկերության գագաթնաժողովին ընդառաջ ինչ-ինչ սին հույսեր են արթնացել, եւ արեւմտամետները ձգտում են ամեն կերպ ակտիվանալ: Երբեմն հասնում է կուրյոզների, զորօրինակ, "ԿԳԲ-ի գործակալների" լյուստրացիայի, այսինքն` գաղտնազերծման պահանջի:Դե պարզ է, օրինակ, Պարույր Հայրիկյանի աչքին ամենուրեք ԿԳԲ է երեւում, եւ եթե նրա կամքը լինի, ապա գերեզմանոցների մեռելներին էլ կստուգեն` արդյո՞ք եղել են ԿԳԲ-ի գործակալ:
Իսկ մեկ ուրիշ ակտիվություն, կարելի է ասել` հիվանդագին եւ հիսթերիկ, նկատվում է գրանտածիծների դաշտում: Միաժամանակ եւ զուգահեռ, թեւ թեւի տված արթնացան համասեռամոլների պաշտպանները եւ հակաբանակային քարոզչությամբ զբաղվողները: Եվ, ի դեպ, առաջիններին իր լիակատար հրապարակային աջակցությունը հայտնեց Բրիտանական դեսպանատունը: Իսկ դրսեւորումները` իսկը գարնանային սրացում: Էլ խմբով ծիածանագույն դրոշով Հյուսիսային պողոտայում լուսանկարվեցին, էլ մայրաքաղաքի ասֆալտին եւ պատերին սեւ ներկով թողեցին համասեռամոլապաշտպան գրառումներ, եւ այդ ամենն ուղեկցվեց անգլալեզու որոշ միջազգային լրատվամիջոցների բուռն, հորթային հրճվանքով:
Մեկ էլ գարնանային ուշացած սրացման այլ դրսեւորում էլ երեւաց` ոմանք առաջ քաշեցին դավադրության տեսություն, իբր համասեռամոլների պաշտպաներին ակտիվացրել է իշխանությունը, որպեսզի ժողովրդի ուշադրությունը շեղի էլեկտրաէներգիայի թանկացումից: Բայց, իհարկե, դա հիմարություն է, քանզի բողոքողը կբողոքի եւ կգա հրապարակ, իսկ չբողոքողը կբավարարվի` խոհանոցում փնթփնթալով: Ու դժվար թե, ինչ-որ այլ առիթներ բողոքողին չբողոքող դարձնեն, կամ` հակառակը:
Ինչեւէ, սպասենք նաեւ Ռիգայի բուն գագաթնաժողովին` իր ձեւական ըհռչակագրային փաստաթղթերով: Այ, այդ ժամանակ արեւմտամոլների վառ հույսերի փուքսը կիջնի, առավել եւս, որ ամբողջ աշխարհում նկատելի է միտումը, որ ԱՄՆ-ն նվազեցնում է իր միջամտությունը ռուսական ազդեցության գոտի համարվող տարածաշրջաններում:
Իսկ արեւմտամոլությունն ուղեկցող տարատեսակ գենախեղվածների հիմիկվա ակտիվությունը ընդամենը նրանց կարապի երգն է, կամ միգուցե հոգեվարքի ջղակծկումը:
ՀՈՎՀԱՆՆԵՍ ԳԱԼԱՋՅԱՆ
Հավանեցի՞ր հոդվածը, կիսվիր ընկերներիդ հետ
