ՀԱՅ ՊԱՏԳԱՄԱՎՈՐՆԵՐԸ` ՀԱՅԿԱԿԱՆ ԴՐՈՇԸ ԿՈՆՉԻՏԱՅԻ ՈՒՍԵՐԻՆ ԳՑՎԵԼՈՒ ՓԱՍՏԻ ՄԱՍԻՆ
Արխիվ 12-16ՀԱՅ ՊԱՏԳԱՄԱՎՈՐՆԵՐԸ` ՀԱՅԿԱԿԱՆ ԴՐՈՇԸ ԿՈՆՉԻՏԱՅԻ ՈՒՍԵՐԻՆ ԳՑՎԵԼՈՒ ՓԱՍՏԻ ՄԱՍԻՆ
«Իրավունքն» այսօր ՀՀԿ պատգամավոր Մկրտիչ Մինասյանից, արեւմտամետ պատգամավոր Ալեքսանդր Արզումանյանից եւ «Ժառանգություն» խմբակցության քարտուղար Թեւան Պողոսյանից պարզեց` ինչպե՞ս են նրանք վերաբերվում հայկական դրոշը Կոնչիտայի ուսերին հայտնվելու փաստին: Ալեքսանդր Արզումանյանը, լսելով մեր հարցադրումը, ձեռքը թափահարեց` հասկացնելով, որ չի ցանկանում հարցին պատասխանել: Դե ոնց պատասխանի, կամ ինչ պատասխանի, երբ նույն հաջողությամբ մեկ այլ լրատվամիջոցում ակտիվ պաշտպանությամբ հանդես է եկել համասեռամոլներին:
ՀՀԿ պատգամավոր Մկրտիչ Մինասյանն էլ ասաց, որ իր համար անընդունելի է այդ երեւույթը. «Բացարձակ չեմ ընդունում: Թե դա ում խարդավանք է եւ ում կազմակերպածը, կամ մեր ոխերիմ հարեւանների մատը խառն է այս գործում, չգիտեմ»:
«Ժառանգություն» խմբակցության քարտուղար Թեւան Պողոսյանն էլ ասաց, որ մենք պարբերաբար ենք խոսում Հայաստանի` ազատ երկիր լինելու մասին:
- Ինչ-որ մի երկրի քաղաքացի որոշել է Հայաստանի դրոշը գցի իր ուսերին, որ դրանով իր կողմնակիցներին ցույց տա, թե որ երգն է հավանում: Դա իր գործն է: Եկեք ուրիշներին մի կողմ դնենք: Եկեք նայենք հետեւյալին` արդյոք ամեն ինչ անում ենք, որ «Genealogy» խումբը հաղթանակ տանի այն բուն իմաստով, որ մի մերժեք ցեղասպանությունը: Համայն հայությամբ այնպես անենք, որ մեր խումբը հաղթի: Մեկ-մեկ եկեք հայելուն նայենք եվ ասենք մեր արածները: Թե հիմա որերորդ քաղաքացին ինչ է արել, մյուսը քաղաքացին էլ Ադրբեջանի ու Վրաստանի դրոշը կգցի իր վրա, դա իրենց գործն է: Եթե հայկական դրոշակը դարձել է պաշտամունքի օրինակ, ես միայն ուրախ եմ:
-Անգամ եթե դա Կոնչիտայի համա՞ր է դա պաշտամունքի առարկա:
- Ես չեմ ուզում իրենց խնդիրների մասին խոսել: Դա իրենց արժեքային համակարգի մեջ ընդունելի է: Կոնչիտայի մասին վերաբերմունքը թող իրենք ասեն: Եթե մենք Հայաստանում ունենանք կոնչիտաներ, ես իմ կարծիքը կասեմ: Դրա մասին մի անգամ չէ, որ «Իրավունք» թերթին ասել եմ: Ինձ համար եվրոպական արժեքները ընտանիքի արժեքն է: Իմ խնդիրն այսօր այն է, որ ես կարողանամ զանգահարել արտասահմանում ապրող իմ ընկերներին, բարեկամներին եւ ասել նրանց` իրենք քվեարկեն մեր երկրի օգտին:
- Աղմուկ բարձրացնողների ու դժգոհողների հիմնական մտահոգությունը այն էր, թե ո՞վ եւ ինչո՞ւ է թույլ տվել, որ հայկական դրոշը գցվի Կոնչիտայի ուսերին:
- Ինչ է նշանակում` ինչո՞ւ են թողել: Մարդիկ ազատ են: Եթե որեւէ մեկը Հայաստանում ցանկանա Հայաստանի դրոշը գցել իր ուսերին, իսկ մյուսն էլ ասի` չէ՛, չէ՛, մի՛ գցի, որովհետեւ մազերիդ գույնը դուրս չեկավ, հայացքն այդպես չէ, դու ջինս ես հագել, այլ ոչ թե կոստյում: Չեմ ուզում, որ մենք այսօր այդ խնդիրները քննարկենք: Մենք ունենք ավելի կարեւոր խնդիր` ինչ անել, որ «Genealogy» խումբը հաղթի:
Հ.Գ Ո'չ, կարծում ենք «Եվրատեսիլում» հաղթանակն այդքան կարեւոր չէ, որքան մեր երկրի բարոյական կերպարն այդ մրցույթում պահելը, որից մեկն էլ մեր դրոշն անաղարտ պահելն է, ըստ որի էլ` այն կդառնա պաշտամունքի առարկա` բարոյական մարդկանց համար:
ՍՈՆԱ ԴԱՎԹՅԱՆ
