«ԳԻՇԱՏԻՉՆԵՐԻ ԽՆՋՈՒՅՔԸ» «ԱՐՏ ՖԵՍՏՈՒՄ»
Արխիվ 12-16«ԳԻՇԱՏԻՉՆԵՐԻ ԽՆՋՈՒՅՔԸ» «ԱՐՏ ՖԵՍՏՈՒՄ»
«Արտ ֆեստ» ամենամյա երիտասարդական երրորդ բաց փառատոնի շրջանակներում Երեւանի թատրոնի եւ կինոյի պետական ինստիտուտի Ուսումնական թատրոնում տեղի ունեցավ ռեժիսոր ԱՇՈՏ ՀԱԿՈԲՅԱՆԻ «Գիշատիչների խնջույքը» հոգեբանական դրամայի ներկայացումը:
Ա. Հակոբյանն, ով նաեւ Հ. Պարոնյանի անվան թատրոնի դերասան է, «Իրավունքի» հետ զրույցում փաստեց, որ վերջնական անձնակազմով ներկայացման խաղացել են 2-3 ամիս առաջ. «Սա «Գիշատիչների խնջույքի» երկրորդ ցուցադրությունն էր, թե հետագայում ինչ ճակատագիր կունենա ներկայացումը չեմ կարող ասել: Համագործակցում եմ Ուսումնական թատրոնի հետ, սակայն այս ներկայացումը խաղացանկային ներկայացում չէ, իսկ այսօրվա համար պարզապես շատ շնորհակալ եմ»,-նշեց ռեժիսորը եւ ավելացրեց, որ ներկայացման բոլոր դերասանները «Երիտասարդ թատերախմբի» դերասաններ են. «Թատերախումբը մենք հիմնել ենք դեռ ուսանողական տարիներին: Ներկայացման շատ դերասանները հենց այդ թատերախմբից էին, իսկ մի քանիսին հրավիրել էինք տարբեր թատրոններից»,-եզրափակեց Ա. Հակոբյանը:
Նշենք, որ «Մեկ տանիքի ներքո» խորագրով «Արտ ֆեստ» փառատոնը կտեւի մեկ ամիս եւ կամփոփի արվեստի տարբեր ճյուղեր:
ԶՎԱՐԹ ԽԱՉԱՏՐՅԱՆ
