ԱՐԱԳԱԾ ԱԽՈՅԱՆԸ ՉԻ ԱՆԴԱՄԱԿՑԻ, ԲԱՅՑ ԿՆՊԱՍՏԻ «ԱԼՅԱՆՍԻՆ»
Արխիվ 12-16ԱՐԱԳԱԾ ԱԽՈՅԱՆԸ ՉԻ ԱՆԴԱՄԱԿՑԻ, ԲԱՅՑ ԿՆՊԱՍՏԻ «ԱԼՅԱՆՍԻՆ»
Կայացավ «Ալյանս» ցենտրիստական առաջադիմական կուսակցության հիմնադիր համագումարը, որի ժամանակ կուսակցության նախագահ ընտրվեց ԱԺ պատգամավոր, նախկին ԲՀԿ-ական Տիգրան Ուրիխանյանը: Ի դեպ, Տ. Ուրիխանյանին շնորհավորելու էին եկել ինչպես նախկին, այնպես էլ ներկա ԲՀԿ-ականներ, որոնց թվում էր նաեւ ԱԺ պատգամավոր, նախկին ԲՀԿ-ական ԱՐԱԳԱԾ ԱԽՈՅԱՆԸ: Լրագրողներիս հետ զրույցում պարոն Ախոյանն անդրադառնալով «Ալյանսին»` նախ խոսեց Տ. Ուրիխանյանի մասին.
-Կայացած երիտասարդ, առողջ մտածելակերպի տեր անձնավորություն է Ուրիխանյանը: Այստեղ արդեն ամենակարեւորն այն է, որպեսզի կարողանա կայացնել այս կուսակցությունը, որովհետեւ սա դեռ կայացում չէ, սրանով հիմնաքարն է դրվում: Իհարկե, բավականին քաղաքական փորձ ունի Տիգրան Ուրիխանյանը, բայց նա դեռ ճանապարհ պիտի անցնի, դեռ պետք է ժողովրդի մեջ հավատ եւ հույս արթնացնի:
- Ըստ Ձեզ, պարոն Ուրիխանյանին կհաջողվի՞ այդ հույսն ու հավատն արթնացնել` որպես ընդդիմադիր նոր քաղաքական ուժի ղեկավար:
- Չեմ կարող այս պահին գնահատականներ հնչեցնել: Օր ու գիշեր ջանք ու եռանդ չխնայող աշխատանք է պետք, որ այդ կերպարը ստեղծվի ու ժողովրդի մեջ հավատ ներշնչվի:
- Հնարավո՞ր է` Ձեզ առաջիկայում տեսնենք «Ալյանս» կուսակցությունում:
- Ես այսօր անկուսակցական պատգամավոր եմ եւ իմ որոշումների մեջ ազատ եմ: Չեմ ուղղորդվում որեւիցե իշխող կամ ընդդիմադիր կուսակցությունների կողմից: Այնպես որ, եթե որեւիցե լավ բան տեսա, ինքս չեմ ասում, որ կանդամագրվեմ այս կուսակցությանը, բայց կնպաստեմ, որպեսզի այդ ծրագիրն իրականանա: Դա, իհարկե, կերեւա հետագա աշխատանքի ընթացքում, ոչինչ չի բացառվում, բայց չեմ անդամագրվի որեւիցե կուսակցությունում:
ՀՐԱՆՏ ՍԱՐԱՖՅԱՆ
