«ՄԱՐԱԹՈՒԿԻ» ՆԵՐԿԱՅԱՑՈՒՑԻՉ. «ՏՄՊՊՀ-Ն ԱՌԱՅՍՕՐ ՈՐԵՎԷ ՈՐՈՇՈՒՄ ՉԻ ԸՆԴՈՒՆԵԼ «ՄԱՐԱԹՈՒԿ ՀՈԼԴԻՆԳ» ԸՆԿԵՐՈՒԹՅԱՆ
Արխիվ 12-16«ՄԱՐԱԹՈՒԿԻ» ՆԵՐԿԱՅԱՑՈՒՑԻՉ. «ՏՄՊՊՀ-Ն ԱՌԱՅՍՕՐ ՈՐԵՎԷ ՈՐՈՇՈՒՄ ՉԻ ԸՆԴՈՒՆԵԼ «ՄԱՐԱԹՈՒԿ ՀՈԼԴԻՆԳ» ԸՆԿԵՐՈՒԹՅԱՆ ՎԵՐԱԲԵՐՅԱԼ»
«Իրավունքը» նախկին հրապարակումներում անդրադարձել է ՏՄՊՊՀ-ի կողմից «Մարաթուկ Հոլդինգ» ՍՊԸ-ի նկատմամբ հարուցված վարույթին և դրա հիմքերին:
Ընկերությունից փորձեցինք ճշտել, թե ինչ վիճակում է գործընթացը: Ընկերության ներկայացուցիչը մեզ հայտնեց, որ 11.04.2015 թվականին տեղի է ունեցել հանձնաժողովի նիստ, որի ընթացքում ընկերության ներկայացուցիչները բանավոր եւ գրավոր ներկայացրել են բացատրություններ հարուցված վարույթի անհիմն լինելու վերաբերյալ և նաև ներկայացրել են տեղեկություններ մրցակից այլ սուբյեկտների կողմից հնարավոր անբարեխիղճ մրցակցության մասին:
Չնայած դրան, առայսօր հանձնաժողովը որևէ որոշում չի ընդունել «Մարաթուկ Հոլդինգ» ընկերության վերաբերյալ, ոչ էլ անդրադարձել է ընկերության կողմից ներկայացված փաստերին:
Հետաքրքրական է այն հանգամանքը, որ «Մարաթուկ Հոլդինգ» ՍՊԸ-ի նկատմամբ վարույթը հարուցվել էր թերթի հրապարակման հիման վրա, այնինչ տվյալ դեպքում ընկերության կողմից կոնկրետ ներկայացվում են փաստեր, որոնք, ընկերության կարծիքով, անտեսվում են Հանձնաժողովի կողմից:
«Մարաթուկ Հոլդինգ» ընկերության ներկայացուցիչը նաեւ ասաց, որ իրենք համբերատար և հույսով լի սպասում են Հանձնաժողովի որոշմանը, որը, ընկերության կարծիքով, պետք է հիմնված լինի իրական փաստերի, այլ ոչ թե քողարկված ենթադրությունների վրա:
Ընկերության ներկայացուցիչը նշեց, որ իրենք հետևողական են լինելու իրենց իրավունքների պաշտպանության հարցում և յուրաքանչյուր անարդար որոշում իրենց նկատմամբ բողոքարկելու են համապատասխան ատյաններում:
ՍՈՆԱ ԴԱՎԹՅԱՆ
