ԹՈՒՐՔ ՅԱԿԻՆԸ ՊԱՏՃԱՌՆԵՐԸ ՓՆՏՐՈՒՄ Է` ԻՐԵՆ ՇՐՋԱՆՑԵԼՈՎ
Արխիվ 12-16ԹՈՒՐՔ ՅԱԿԻՆԸ ՊԱՏՃԱՌՆԵՐԸ ՓՆՏՐՈՒՄ Է` ԻՐԵՆ ՇՐՋԱՆՑԵԼՈՎ
Ռուսաստանի առաջնության 27-րդ տուրի շրջանակներում Մոսկվայի "Սպարտակը" մրցակցի հարկի տակ 4:2 հաշվով պարտվեց Գրոզնիի "Թերեքին": Եվ սա այն դեպքում, երբ Չեչնիայի թիմը 40-րդ րոպեից խաղում էր տասը ֆուտբոլիստներով:
Այս հանդիպումն իր հերթին ապացուցեց, որ մոսկովյան թիմի խնդիրները շատ ավելի լուրջ են եւ բնավ կապ չունեն մեկ կամ երկու հայազգի ֆուտբոլիստների, առավել եւսª նրանց եւ մարզչի հարաբերությունների հետ: Սակայն թուրքական ծագում ունեցող Մուրատ Յակինը թիմի խաղային ձախողումների մեղավորին փնտրում է` բացառապես իրեն շրջանցելով, մինչդեռ թիմի հիմնական խնդիրներն առաջացան հենց այն պահից, երբ թուրք մասնագետը գլխավորեց մոսկովյան թիմը:
Ինչեւէª այս վերջին հանդիպմանը Յուրա Մովսիսյանը փոխարինման դուրս եկավ 60-րդ րոպեին եւ "Սպորտ-Էքսպրեսսի" գնահատմամբ ստացավ 4.5 գնահատականը: Մուրատ Յակինի թիմի կազմում ամենաբարձրը գնահատվել են Կուինսի Պրոմեսը եւ Վյաչեսլավ Կրոտովըª 6: Մովսիսյանի խաղին անդրադարձել է նաեւ "Sovsport"-ը, որը, ինչպես երեւում է, ավելի շատ հարում է Յակինյան գաղափարներին. "Գլուշակովի նուրբ փոխանցումից հետո Մովսիսյանն ուներ գերազանց հնարավորություն, սակայն վատ մշակեց գնդակը եւ ձախողեց պահը: Մովսիսյանը վազում է, բայց ոչ ավելին: Աննպատակ, անհասկանալի աթլետիկական վազք: Գուցե, պետք է ոչ թե Բարիոսին վաճառել, այլ...":
Մոսկովյան ակումբի, կարելի է ասել, խայտառակ արդյունքից հետո արտահայտվել է նաեւ Ռուսաստանի ֆուտբոլային միության առաջին փոխնախագահ Նիկիտա Սիմոնյանը. "Կարգ եւ ոգի թիմում պետք է ստեղծի մարզիչը: Բարձր կարգը ձեռք է բերվում մարզումների ժամանակ: Եթե թիմը չունի անհրաժեշտ կարգ եւ ոգի, ապա դա մարզիչի մեղքն է: "Թերեքի" դեմ խաղը բացասական իմաստով կմտնի "Սպարտակի" պատմության մեջ. ունենալ քանակական առավելություն եւ 4 գոլ բաց թողնել երկրորդ խաղակեսում: Եթե "Սպարտակի" մարզչական շտաբը լիներ սպարտակցի, իր հեղինակությամբ կանդրադառնար թիմի կամային ու բարոյական որակների վրա":
ՔՐԻՍՏԻՆԵ ՊԵՏՐՈՍՅԱՆ
