"ՓՈՐՁՈՒՄ ԵՆ ՆՈՐԱՑՆԵԼ ԳՈՅՈՒԹՅՈՒՆ ՉՈՒՆԵՑՈՂ ԲԱՆԿՑԱՅԻՆ ԳՈՐԾԸՆԹԱՑԸ"
Արխիվ 12-16Մայիսի 21-22-ը Ռիգայում տեղի կունենա Արեւելյան գործընկերության անդամ երկրների ղեկավարների գագաթնաժողովը: Եվրոպացի բարձրաստիճան պաշտոնյաներից մեկը, ով չի ցանկացել իր անունը նշել, հայտնել է, որ գագաթնաժողովի շրջանակներում հնարավոր է տեղի ունենա Հայաստանի եւ Ադրբեջանի նախագահների կամ արտգործնախարարների հանդիպումը: Պաշտոնյան նաեւ հույս է հայտնել, որ Ռիգայում ԵԱՀԿ Մինսկի համանախագահները գործի կդնեն հնարավոր բոլոր ջանքերը` Լեռնային Ղարաբաղի հիմնախնդրի կարգավորման համար: Ի՞նչ է նշանակում դա, հնարավո՞ր է, որ այս կերպ ԼՂ բանակցային գործընթացը մտնի ակտիվ փուլ, դա ինչ-որ կապ ունի՞ Ֆրանսիայի նախագահ Օլանդի ապրիլի 24-ին Երեւան եւ հաջորդ օրըª Բաքու կատարած այցի հետ: Այս հարցերի պատասխանները փորձեցինք ստանալ հայաստանյան որոշ վերլուծաբաններից:
Քաղաքագետ ԼԵՎՈՆ ՇԻՐԻՆՅԱՆԻ խոսքով` դժվար է ասել, որ Հայաստանի եւ Ադրբեջանի նախագահների անսպասելի հանդիպումը կբերի բանակցային գործընթացի ակտիվացմանը: Քաղաքագետի համար ավելի հավանական է, որ Ռիգայում կհանդիպեն ոչ թե Հայաստանի եւ Ադրբեջանի նախագահները, այլª արտգործնախարարները. "Այս հանդիպումը համանախագահների կողմից պարտադրանք է` հայ-ադրբեջանական սահմանին կայուն իրավիճակ պահպանելու համար: Սպասելի չէ, որ Մինսկի խումբը փորձում է ակտիվացնել բանակցային գործընթացը, բայց որ նման հանդիպումներով երկու կողմերին պարտավորեցնում են խաղաղության` փաստ է: Նշեմ, որ բացի Հայաստանից ոչ մեկին ձեռնտու չէ բանակցային գործընթացի ակտիվացումն ու ԼՂ հիմնահարցի լուծումը: Բացի դրանից, Ադրբեջանն անում է ամեն ինչ, բանակցային գործընթացը ոչ ճիշտ հունով տանելու համար: Այդ պատաճառով էլ Մինսկի խումբը իր գործողություններով փորձում է գոնե այս ոչ պատերազմական իրավիճակը պահպանել: Հանդիպումից սպասելիքներ չունեմ":
Քաղաքագետ ԴԵՐԵՆԻԿ ՄԱԼԽԱՍՅԱՆԸ փաստեց, որ ԼՂ բանակցային գործընթացի ակտիվացման համար դեռեւս չկան նախադրյալներ, այսինքն` չկան նոր մշակված փաստաթղթեր, սկզբունքներ եւ այլն. "Ընդհակառակը` ադրբեջանական կողմից պատերազմի սպառնալիքը նույն թափով շարունակվում է, իսկ հայկական կողմը բնականաբար չի գնում զիջումների, եւ այս իրավիճակում հնարավոր չէ ակտիվացնել բանակցային գործընթացը: Նախատեսված հանդիպումը պարզապես արհեստական հանդիպում է լինելու, որտեղ երկու կողմերն էլ կմնան իրենց համոզմունքներին: Սա հանդիպում է հանդիպելու համար, որի ընթացքում հնարավոր է հայ-ադրբեջանական սահմանին հավելյալ լարվածություն նկատենք":
Քաղաքական եւ միջազգային հետազոտությունների հայկական կենտրոնի փորձագետ ՌՈՒԲԵՆ ՄԵՀՐԱԲՅԱՆԸ փաստեց, որ Ռիգայում նախանշված հնարավոր հանդիպմամբ ԵԱՀԿ Մինսկի համանախագահները փորձեր են անում ակտիվացնել բանակցային գործընթացը, որն այժմ` կարելի է ասել, գոյություն չունի. "Սա հերթական հադիպումն է, որով փորձում են ակտիվացնել, նորացնել եւ նոր շունչ հաղորդել մինչեւ այժմ գոյություն չունեցող բանակցային գործընթացին: Այս հարցում ԵԱՀԿ Մինսկի խումբը կարծես թե ունի որոշակի փոխհամաձայնություն: Թե ինչ հաջորդականությամբ տեղի կունենան գործողությունները, կտեսնենք հանդիպումից հետո":
ԶՎԱՐԹ ԽԱՉԱՏՐՅԱՆ
Հավանեցի՞ր հոդվածը, կիսվիր ընկերներիդ հետ
