ՊԱՏՐԱ՞ՍՏ ԵՍ ՄՏՆԵԼ ՀԱԿԱԿՈՌՈՒՊՑԻՈՆ ԽՈՐՀՈՒՐԴ
Արխիվ 12-16ՊԱՏՐԱ՞ՍՏ ԵՍ ՄՏՆԵԼ ՀԱԿԱԿՈՌՈՒՊՑԻՈՆ ԽՈՐՀՈՒՐԴ
Փետրվարին կառավարության որոշմամբ ստեղծված Կոռուպցիայի դեմ պայքարի խորհուրդը դեռեւս ձեւավորման ճանապարհին է, իսկ մայիսի 13-ին կլրանա խորհրդում հասարակական կազմակերպությունների մրցույթի դիմումների ընդունման վերջնաժամկետը: Խորհրդի կազմում խորհրդարանական խմբակցություններից ներկայացուցիչներ ընդգրկելու համար կառավարության աշխատակազմը դիմել է խորհրդարանին, սակայն ԱԺ խմբակցությունների մի մասը հրաժարվում են միանալ կոռուպցիայի դեմ պայքարի աշխատանքներին, մի մասն էլ համաձայում են, եթե...
Մասնավորապես ԲՀԿ-ն պատրաստակամություն է հայտնել մասնակցել, եթե աշխատանքները ձեւական չլինեն, "Ժառանգությունը" առաջարկություններ է ներկայացրել, եւ եթե դրանք ընդունվեն, ապա համաձայն է մասնակցել, իսկ ՀՅԴ-ն, ՀԱԿ-ը եւ ՕԵԿ-ը առանց "եթե"-ների, կոնկրետ մերժել են համագործակցության հրավերը:
"Իրավունքը" փորձեց պարզել, թե ՀԱԿ-ը եւ ՕԵԿ-ը ինչու են հրաժարվում նման հնարավորությունից: ԱԺ ՀԱԿ խմբակցության քարտուղար Արամ Մանուկյանը, հերթական անգամ փայլատակեց մտքի գոհարներով եւ ասաց, որ իրենք հրաժարվել են մասնակցել խորհրդի աշխատանքերին, քանի որ լիովին վստահում են ՀՀ ֆինանսների նախարար Գագիկ Խաչատրյանին: "Մեր ներկայացուցիչը խորհրդում Գագիկ Խաչատրյանն է",- արագ` 10 վայրկյանում, պատասխանեց Արամ Մանուկյանը: Երբ խնդրեցինք, որ առավել մանրամասնի, թե ինչ նկատի ունի` դա ասելով, պատասխանեց, որ ուներ 10 վայրկյան ժամանակ այս կարեւոր հարցի համար: Դե ինչ, ամեն քաղաքական գործիչ կամ կուսակցություն յուրովի է ընկալում թե՛ կոռուպցիայի դեմ պայքարը, թե՛ կոռուպցիայի դեմ պայքարի խորհրդում ներկայացուցիչ ունենալու կարեւորությունը: Իսկ ՀԱԿ-ի, կամ ավելի ճիշտ, ՀՀՇ-ի պարագայում, ինչ խոսք, դժվար է խոսել այդ մասին, քանի որ 90-ականներին անգամ, կոռուպցիա բառն անիմաստ էր արտաբերելը:
Կոռուպցիայի դեմ պայքարի խորհրդի աշխատանքներին մասնակցելուց հրաժարվելու պատճառը ՕԵԿ խոսնակ Արթուր Միսակյանի տեղեկացմամբ` պայմանավորված է նրանով, որ ՕԵԿ-ը նպատակահարմար չի գտնում մասնակցել խորհրդի աշխատանքներին, քանի որ այն վստահություն չի ներշնչում: "Մեր կարծիքով` հակակոռուպցիոն հանձնաժողովը պետք է լինի անկախ մարմին, եւ նրանում ներգրավված կազմակերպությունները, անհատները, եւ կազմակերպությունների ներկայացուցիչները պետք է լինեն անկախ, որպեսզի նրա գործունեության արդյունավետությունը բարձր լինի: Նրանք պետք է, այսպես ասած, իշխանության ձեռքի տակ չլինեն, որպեսզի գործունեությունը լինի հնարավորինս արդյունավետ: Խնդիրը ընդամենը սրա մեջ է",- ասաց Ա. Միսակյանը:
Հետաքրքիր է, տեսնես այս նույն կարծիքը կունենա՞ր ՕԵԿ-ը անցյալ տարի, երբ դեռ կոալիցիայի անդամ էր:
ԱՐՄԻՆԵ ԳՐԻԳՈՐՅԱՆ
