ԽՄՈՐՈՒՄՆԵՐ ՆԵՐՔԱՂԱՔԱԿԱՆ ԴԱՇՏՈՒՄ
Արխիվ 12-16ԽՄՈՐՈՒՄՆԵՐ ՆԵՐՔԱՂԱՔԱԿԱՆ ԴԱՇՏՈՒՄ
Արտաքնապես թվում է, թե մեր երկրի ներքաղաքական կյանքում անդորր է տիրում: Եվ իրոք գրեթե չկան սուր բախումներ, իշխանափոխություն բառը դարձել է հուշ, ու երեւացող են ընդամենը 2 գործընթաց: Մեկը` նախապատրաստությունը ԵՄ Արեւելյան գործընկերության Ռիգայի գագաթնաժողովին, որով, չգիտես ինչու, շատ են ոգեւորվել բոլոր արեւմտամետները, անկախ նրանից` իշխանական ճամբարում են, թե` ընդդիմադիր, չնայած պարզ է, որ հռչակագրերից այն կողմ բանը չի հասնելու: Իսկ մյուսը` Սահմանադրական բարեփոխումների հանձնաժողովի պլանային հանդարտ աշխատանքն է: Բայց իրականում քաղաքական ընդերքը բավականին թեժ է, եւ հասունանում է դաշտի վերաֆորմատավորումը: ՆՈՐ ԿՈՒՍԱԿՑՈՒԹՅՈՒՆՆԵՐ ԵՎ ՀՆԵՐԻ ԱՇԽՈՒԺԱՑՈՒՄ
Այն, որ բավականին շուտով քաղաքական դաշտն ակտիվանալու է, երեւում է թեկուզեւ ՀՅԴ-ի վարքագծից: Կիրակի օրով տեղի ունեցավ ՀՅԴ Գերագույն մարմնի հանդիպումը 11 մարզային կառույցների եւ 50 կոմիտեների ներկայացուցիչների հետ: Ըստ պաշտոնական հաղորդագրության. "Խոսվեց քաղաքական դաշտում ստեղծված ներկա իրավիճակի, հնարավոր վերադասավորումների, միջկուսակցական հարաբերությունների, երկրում արմատական փոփոխություններ կատարելու անհրաժեշտության, սահմանադրական բարեփոխումների գործընթացի մանրամասների, տեղական ինքնակառավարման մարմինների ընտրություններին նախապատրաստվելու մասին":
Ակտիվանում է նաեւ ՕԵԿ-ը, ու Հ3-ի եթերը գերհագեցած է այդ կուսակցության պատգամավորների խորհրդարանական ելույթներով: Բայց միաժամանակ նոր կուսակցությունների ստեղծում է տեղի ունենում:
Այսպես, ընդամենը 2 օր անց տեղի է ունենալու Տիգրան Ուրիխանյանի նախաձեռնած "Ալյանս" կուսակցության հիմնադիր համագումարը: "Ալյանսը", ընդհանուր առմամբ, ունենալու է ռուսամետ աշխարհաքաղաքական կողմնորոշում:
Բայց միաժամանակ Նիկոլ Փաշինյանը բավականին ակտիվ աշխատում է իր "Քաղաքացիական պայմանագիր" նախաձեռնությունից արեւմտամետ ուղղվածության կուսակցություն ստեղծելու ուղղությամբ, ինչը դեպի մայրամուտ գնացող ՀԱԿ-ում խանդի բուռն տեսարաններ է հարուցում:
Չի բացառվում նաեւ, որ առաջիկայում թափով կակտիվանա նախկին վարչապետ Տիգրան Սարգսյանի նախագիծ համարվող Արմենական կուսակցությունը: Իսկ ՍԴՀԿ-ն, ՀԴԿ-ն եւ որոշ այլ ուժեր ձախակողմյան թեքում ունեցող փաստացի դաշինք են ձեւավորում, ու նրանց մեկնարկը տրվել էր մայիսմեկյան հանրահավաքով:
ԿՐՔԵՐ ՍԱՀՄԱՆԱԴՐԱԿԱՆ ԲԱՐԵՓՈԽՈՒՄՆԵՐԻ ՇՈՒՐՋ
Սահմանադրական բարեփոխումների ե՛ւ հայեցակարգի, ե՛ւ ժամկետների վերաբերյալ արդեն հստակություն կա, ու մայիսի 18-19-ին արդեն հասնելու է հայեցակարգը Վենետիկի հանձնաժողովի փորձագետների հետ քննարկելուն: Ըստ հանձնաժողովի անդամ Վարդան Պողոսյանի. "Մենք աշխատում ենք մեկ նախագծի վրա, եւ, կախված քաղաքական կոնսուլտացիաների բնույթից, քաղաքական ուժերի առաջարկություններից, հնարավոր են նաեւ որոշակի մոդիֆիկացիաների նախագծում: Չեմ բացառում, որ մեկ նախագծի մեջ լինեն նաեւ տարբեր այլընտրանքներ: Չնայած դրա հավանականությունը շատ քիչ եմ համարում, որովհետեւ մասնագիտական առումով Սահմանադրական հանձնաժողովը, կարծում եմ, վերջնական մասնագիտական եզրահանգում է կատարել հօգուտ խորհրդարանական համակարգի":
Այդ հստակությունը սահմանադրական բարեփոխումների թերեւս միակ ռեալ հակառակորդի` ՀԱԿ-ի մոտ ջղակծկումներ է առաջացրել, ինչն արտահայտվել է Գագիկ Ջհանգիրյանի հարցազրույցում: Այսպես, նա կասկածի տակ է դնում այն, որ խորհրդարանական կառավարմանն անցնելը լայն աջակցություն կստանա, եւ միաժամանակ անպատվում է ԲՀԿ-ին. "ՕԵԿ-ը թեեւ ինչ-որ առաջարկություններ է ներկայացրել, բայց կրկին կիսանախագահական կառավարման մոդելի կողմնակից է: ԲՀԿ-ից էլ նախկին անունն է մնացել": Նա նաեւ դառը հիասթափությամբ շեշտում է, որ սահմանադրական փոփոխությունների նկատմամբ նախկին դիմադրությունը չկա. "Իշխանական այդ ողջ օպերացիայի իմաստն այն էր, որ միասնական ճակատը քանդվեր": Ի դեպ, ԲՀԿ-ի արձագանքը եղավ անհապաղ` կուսակցության մամլո խոսնակ Վահան Բաբայանի հարցազրույցի տեսքով, ուր մատնանշվեց, որ Ջհանգիրյանի "հույժ ոչ կոռեկտ" արտահայտությունների վերաբերյալ ԲՀԿ-ն ակնկալում է ՀԱԿ-ի ղեկավարության պաշտոնական բացատրությունները:
Ինչեւէ, մասնագիտությամբ մուտիլովկաների պրոֆեսոր Ջհանգիրյանը նաեւ ակնարկում է, որ ներքին, ստվերային դիմադրություն կա` խորհրդարանական համակարգի չանցնելու նկատառումով. "Ես այդպիսի հավանականություն տեսնում եմ, հատկապես այն պարագայում, երբ սահմանադրական փոփոխությունների մասնագիտացված հանձնաժողովին հանձնարարվեց զուգահեռաբար մշակել նաեւ գործող համակարգը կատարելագործելու տարբերակը":
Ի՞նչ ակնարկ է անում Ջհանգիրյանը: Հարկ է հիշել, որ խորհրդարանական մոդելին անցնելը արմատապես հակասում է Ռոբերտ Քոչարյանի կենսական քաղաքական շահերին եւ գործնականում բացառում է նրա ցանկացած հնարավորությունը` 2018-ին վերադառնալ Բաղրամյան 26: Այսինքն` ստացվում է, որ Քոչարյան-Տեր-Պետրոսյան ստվերային տանդեմը բավականին լավ էլ գործում է: Օբյեկտիվորեն նրանց ճամբարները համերաշխ էին Արցախի ընտրություններում էքստրեմիստական դիրքորոշում ունեցող Հայկ Խանումյանին աջակցելու հարցում, եւ օբյեկտիվորեն նրանց ձգտումները լրիվ համընկնում են` սահմանադրական բարեփոխումների դեմ պայքարելու ուղղությամբ: Բայց, ինչպես հայտնի է, քաղաքականությունը հնարավորի արվեստ է, իսկ դիմադրության ռեալ հնարավորությունները բավականին քիչ են:
ՀՈՎՀԱՆՆԵՍ ԳԱԼԱՋՅԱՆ
Հավանեցի՞ր հոդվածը, կիսվիր ընկերներիդ հետ
