«ՄԱՐՏԻԿԻ ԵՐԳՆ» ԱՅՍ ԱՆԳԱՄ ՀՆՉԵՑ ԶԻՆՎՈՐ ՄՈԴԵԼԻ ՇՈՒՐԹԵՐԻՑ (Տեսահոլովակի պրեմիերա)
Արխիվ 12-16«ՄԱՐՏԻԿԻ ԵՐԳՆ» ԱՅՍ ԱՆԳԱՄ ՀՆՉԵՑ ԶԻՆՎՈՐ ՄՈԴԵԼԻ ՇՈՒՐԹԵՐԻՑ (Տեսահոլովակի պրեմիերա)
Մայիսյան եռատոնի առթիվ մոդել, երգիչ ԷՄԻԼ ՊՈՂՈՍՅԱՆԸ յուրահատուկ անակնկալ է պատրաստել` հանրության դատին հանձնելով իր նոր տեսահոլովակը: Երգարվեստին նոր շունչ հաղորդող մոդելը, ով վերջին շրջանում լուրջ գործունեություն է ծավալում այս ասպարեզում, եւ փոփ ժանրում արդեն ունի իր ունկնդիրների բանակը, այս անգամ հանդես է եկել «Մարտիկի երգի» մատուցմամբ: Տեսահոլովակի պրեմիերայի, լեգենդար «Մարտիկի երգի» ու իր ստեղծագործական ուղու մասին էլ ծավալվեց «Իրավունքի» զրույցը հենց նրա հետ:
- Էմիլ, թերեւս Ձեր կարիերային հետեւող հանրությունը սպասում էր Ձեզնից մոդելային ոլորտում նորությունների, բայց Դուք ներկայացաք նոր տեսահոլովակով:
- Իմ առաջին մասնագիտությունը, միանշանակ, երգ-երաժշտությունն է, եւ ես դեռ վաղ հասակից եմ երգել: Իսկ մոդելային գործունեությամբ շատ պատահական եմ սկսել զբաղվել, երբ ինձ ասացին, որ ունեմ համապատասխան տվյալներ մասնակցելու միջազգային մրցույթի, բայց դա ինձ համար հոբբի է: Իսկ ինչ վերաբերում է տեսահոլովակին, ասեմ, որ ամենը կատարել ենք երկու օրվա ընթացքում` իմ ընկերների` Վազգենի եւ Հարությունի օգնությամբ:
- Հետաքրքիր է` ո՞վ է տեսահոլովակի փոքրիկ կիթառահարը:
- Փոքրիկ կիթառահարը կարելի է ասել իմ փոքրիկ եղբայրն է` Հայկ Բիգանյանը, ով նույնպես երգում է:
- «Մարտիկի երգը» շատերն են կատարել, Դուք ո՞ւմ կատարումը կառանձնացնեիք, որից տպավորվել եք ամենաշատը:
- Դարի ամենալավ կատարողն այս երգի իմ վոկալի ուսուցիչն է` ԼՂՀ վաստակավոր արտիստ Տիգրան Մկրտչյանը: Ես լսել եմ իմ շատ սիրելի մաեստրոյի կատարմամբ «Մարտիկի երգն», ու անչափ տպավորվել է այն ինձ մոտ:
- Ձեզ հանրությունն առավել շատ ճանաչում է որպես հաջողակ մոդել, ով երբեմն ռոմանտիկ երգերով գրավում է ամենքի ուշադրությունը: Կցանկանայի այս անգամ անդրադառնայինք, ուղղակի, շարքային Էմիլ Պողոսյանին, ով իր երգով հավատացնում է, որ «Հայրենիքն իր սրտում է»:
- Կարծում եմ` յուրաքանչյուր հայ պետք է հայրենասեր լինի` անկախ իր աշխատանքից, մասնագիտությունից եւ , ընդհանրապես, ընտրած ուղուց:
- Բավական լուրջ մարտահրավեր է հայկական շոու-բիզնեսին, երբ մոդելային արտաքինով երիտասարդը որոշում է այսուհետ հանդես գալ իր առաջին մասնագիտությամբ` երգարվեստով: Ի՞նչ կասեք այս մասին:
- Կարծում եմ` նրանից է, որ կատարել եմ առաջին լուրջ քայլերս մոդելային ասպարեզում, բայց ըստ իս, սա լավ հնարավորություն է, որ ինձ ճանաչեն նաեւ որպես երգիչ:
- Վստահ եմ, որ հատուկ էիք մտածել հենց այսօր անել տեսահոլովակի պրեմիերան: Հետեւաբար կուզեի խոսեիք նաեւ Ձեզ համար մայիսի 9-ի կարեւորության մասին:
- Տեսահոլովակի գաղափարը շատ հանկարծակի է ծնվել ինձ մոտ, քանի որ արդեն մոտ էր մայիսի 9-ը: Բայց, իհարկե, նախատեսել էի հենց մայիսի 9-ին լիներ պրեմիերան, քանի որ երգը նվիրված էր բոլոր այն մարդկանց, ովքեր գնացել եւ կռիվ են տվել, որպեսզի մենք այսօր մեր գլուխները դնենք բարձին եւ հանգիստ քնենք: Ինչպե՞ս կարելի է չգնահատել նման քաջարի տղաների կատարածը եւ չլինել հայրենասեր: Նշեմ, որ երգը նվիրվում է նաեւ մերօրյա հայ զինվորներին, ովքեր հսկում են մեր սահմանները, եւ նրանց շնորհիվ մենք խաղաղ ու ապահով ապրում ենք:
- Կշարունակե՞ք ռազմահայրենասիրական երգերով ներկայանալ հանրությանը:
- Ես սիրում եմ հանդես գալ տարբեր ժանրերում` փոփ, դասական, ժողովրդական եւ նաեւ ռազմահայրենասիրական:
ՀՐԱՆՏ ՍԱՐԱՖՅԱՆ
