ԵՐԵՎԱՆ-ՍՏԵՓԱՆԱԿԵՐՏ ՌԵՏՐՈ ՄԵՔԵՆԱՆԵՐԻ ՇՔԵՐԹ` ՆՎԻՐՎԱԾ ԵՌԱՏՈՆԻՆ
Արխիվ 12-16ՌԵՏՐՈ ՄԵՔԵՆԱՆԵՐԻ ՇՔԵՐԹ` ՆՎԻՐՎԱԾ ԵՌԱՏՈՆԻՆ
Հայոց եռատոնի` Արցախի բանակի կազմավորման, Շուշիի ազատագրման 23-րդ եւ Հայրենական մեծ պատերազմի 70-րդ տարեդարձի կապակցությամբ Հայաստանի ավտոմոբիլային ֆեդերացիան կազմակերպել է Երեւան-Շուշի-Ստեփանակերտ ռետրո ավտոմեքենաների շքերթ: Շքերթի մեկնարկը կտրվի մայիսի 8-ին, Երեւանի Արցախի փողոցից: Ֆեդերացիայի նախագահ Գագիկ Աղաջանյանը "Իրավունք"-ին փոխանցեց, որ թեպետ ավտոերթին մասնակցելու համար ներկայացված է եղել մոտ 60 հնաոճ մեքենա, սակայն տեխնիկական վիճակի վերլուծության արդյունքում դրանցից միայն 21 մեքենայի է ֆեդերացիան թույլատրել մասնակցել միջոցառմանը: "Մոտավորապես 60 հոգանոց խումբ է մեկնելու: Յուրաքանչյուր մեքենա ունի երկուական վարորդ: Բացի այդ, շարասյան հետ Երեւանից Ստեփանակերտ կմեկնեն տեխնիկական անձնակազմը, ուղեկցող անձնակազմը եւ ֆեդերացիայի անդամները: Հայաստանում նմանատիպ մեքենաներ շատ կան, սակայն այդ ծանր ճանապարհն անցնելու հնարավորություն բոլոր մեքենաները չէ որ ունեն",- ասաց Գ. Աղաջանյանը:
Առաջին օրը` մայիսի 8-ին, հնաոճ ավտոմեքենաների շարասյունը Երեւանից կմեկնի Գորիս, մայիսի 9-ին կժամանի Շուշի: Շուշիում երթի մասնակիցները ծաղկեպսակ կդնեն ազատամարտիկների հուշարձանին, որից հետո կմեկնեն Ստեփանակերտ: "Նախապես պլանավորված ժամանակացույցի համաձայն` Ստեփանակերտում ժամը 12:00-ին ծաղկեպսակ կդնենք Հայրենական պատերազմի մասնակիցների հիշատակը հավերժացնող հուշահամալիրին, որից հետո տեղի կունենա ռետրո մեքենաների ցուցադրություն Ստեփանակերտի կենտրոնական հրապարակում",- տեղեկացրեց Հայաստանի ավտոմոբիլային ֆեդերացիայի նախագահը:
ԱՐՄԻՆԵ ԳՐԻԳՈՐՅԱՆ
Հավանեցի՞ր հոդվածը, կիսվիր ընկերներիդ հետ
