ՀՀԿ ՊԱՏԳԱՄԱՎՈՐԸ` ԱԱԾ ՆԱԽԿԻՆ ՊԱՇՏՈՆԱԿԱՏԱՐԻՆ. «ԼՅՈՒՍՏՐԱՑԻԱՆ ԻՇԽԱՆԱՓՈԽՈՒԹՅԱՆ ՀԵՏ Ի՞ՆՉ ԿԱՊ ՈՒՆԻ»
Արխիվ 12-16ՀՀԿ ՊԱՏԳԱՄԱՎՈՐԸ` ԱԱԾ ՆԱԽԿԻՆ ՊԱՇՏՈՆԱԿԱՏԱՐԻՆ.
«ԼՅՈՒՍՏՐԱՑԻԱՆ ԻՇԽԱՆԱՓՈԽՈՒԹՅԱՆ ՀԵՏ Ի՞ՆՉ ԿԱՊ
ՈՒՆԻ»
ԱԱԾ նախկին պետի պաշտոնակատար, նախկին ՀՀՇ-ական, ՀՀ առաջին նախագահ Լեւոն Տեր-Պետրոսյանի խնամին Դավիթ Շահնազարյանը վեջերս «Հ3» հեռուստաընկերությամբ հեռարձակվող «Շաբաթ երեկո Կարմենի հետ» հաղորդաշարի ժամանակ դարձյալ խոսել է լյուստրացիայի` գաղտնազերծման մասին`ասելով, որ Հայաստանում լյուստրացիա կարելի է անել այն ժամանակ, երբ երկու անգամ ընտրությունների արդյունքներով իշխանափոխություն կլինի, ընտրության արդյունքները հանրության համար կլինեն ընդունելի:
«Իրավունքը» ՀՀԿ խմբակցության քարտուղար Գագիկ Մելիքյանից պարզեց`համամիտ է Դավիթ Շահնազարյանի այս հայտարարության հետ: «Հարցի ձեւաչափը չեմ ընդունում: Երկրորդ` չեմ ընդունում լյուստրացիայի հարցը»,- հակիրճ պատասխանեց Մելիքյանը:
ՀՀԿ մեկ այլ պատգամավոր, ՀՀԿ փոխնախագահ Ռազմիկ Զոհրաբյանը չցանկացավ որեւէ մեկի խոսքը մեկնաբանել, բայց իր համար անհասկանալի է` ինչ կապ ունի լյուստրացիան իշխանափոխության հետ: «Դա լրիվ այլ խնդիր է: Այդպիսի հարցադրումներ եղան ժամանակին, բայց քանի որ մեծամասնությունը չընդունեց, այդպես էլ մնաց»,- ծիծաղելով ասաց պատգամավորը:
Ռազմիկ Զոհրաբյանը հիշեցնում է`այսօր մեր իշխանության մեջ չկան մարդիկ, որոնք ժամանակին`ԽՍՀՄ տարիներին, եղել են հատուկ ծառայությունների աշխատակից, իսկ այսօր զբաղեցնում են բարձր պաշտոններ: «Ի՞նչը լյուստացիա անել, ո՞ւմ լյուստրացիա անել»,- հռետորական հարցադրում է հնչեցնում ՀՀԿ պատգամավորը, ապա հավելում. «Լյուստրացիա անելու անհրաժեշտությունը պետք է հասարակությունը առաջ քաշի: Դուք տեսել եք, որ առաջ քաշի հասարակությունը նման խնդիր»:
Թե ինչու 1990-ականներին չարվեց լյուստրացիա, պատգամավորը դժվարացավ ասել, միայն ասաց, որ այդ խնդիրն առաջ է քաշվում որոշ անհատների կողմից, որոնք, չգիտես ում առաջադրանքներով, անընդհատ հարցն առաջ են քաշում:
ՍՈՆԱ ԴԱՎԹՅԱՆ
