ՍՈՍՈՆ ԲՈԼՈՐԻ ՑԱՎԸ ՏԱՆԵԼՈՎ` "ՍՏԻՊԵՑ" ՀԱՅԿԱԿԱՆ ՊԱՐԵԼ
Արխիվ 12-16Օրերս Կ. Դեմիրճյանի անվան մարզահամերգային համալիրի փոքր դահլիճում տեղի ունեցավ երգչուհիներ Անչոկի, Նարի Հարությունյանի եւ վրացի երգիչ Սոսո Պավլիաշվիլիի համերգը: Հանդիսատեսի ծափահարություններն էլ ավելի բարձր հնչեցին, երբ բեմում հայտնվեց Սոսո Պավլիաշվիլին, ով ողջունելով հայ հանդիսատեսին` խոստացավ, որ համերգի ընթացքում կպարգեւի ջերմ ու բարձր տրամադրություն: Այդպես էլ եղավ, Սոսոն վրացի եւ հայ հանդիսատեսին "ստիպեց" իր երգերի ներքո պարել հայկական պարեր, մերթ ընդ մերթ կրկնելով "ձեր ցավը" տանեմ արտահայտությունը:
Երգիչը Հայաստան էր ժամանել ծնողների եւ մի քանի ազգականների հետ, որոնք ներկա էին համերգին: Հանդիսատեսի շարքերում էր նաեւ երգչի դուստրը, ով անտեսելով հղիությունը` հայկական շարժումներով լավ քեֆ էր անում` հոր ակտիվ կատարումների տակ: Ընթացքում Ս. Պավլիաշվիլին Հայաստանին եւ Երեւանին երգ նվիրելուց զատ, չմոռացավ նաեւ իր խոնարհումը բերել Հայոց ցեղասպանության անմեղ զոհերի հիշատակին. "Չենք կարող մոռանալ, թե ինչպես են կոտորել մեր նախնիներին: Այսօր թույլ չենք տա նույնկերպ վարվել մեր թոռների հետ: Սա մեծ ցավ է, որը մեր տատերից ու պապերից փոխանցվել է մեզ, այն մեզ ավելի ուժեղ ու բարի է դարձրել` մոտեցնելով Աստծուն",- նշեց Սոսոն:
ԶՎԱՐԹ ԽԱՉԱՏՐՅԱՆ
Հավանեցի՞ր հոդվածը, կիսվիր ընկերներիդ հետ
