ՍՈՍՈՆ ԲՈԼՈՐԻ ՑԱՎԸ ՏԱՆԵԼՈՎ` ՎՐԱՑԻՆԵՐԻՆ «ՍՏԻՊԵՑ» ՀԱՅԿԱԿԱՆ ՊԱՐԵԼ
Արխիվ 12-16ՍՈՍՈՆ ԲՈԼՈՐԻ ՑԱՎԸ ՏԱՆԵԼՈՎ` ՎՐԱՑԻՆԵՐԻՆ «ՍՏԻՊԵՑ» ՀԱՅԿԱԿԱՆ ՊԱՐԵԼ
Օրերս Կ. Դեմիրճյանի անվան մարզահամերգային համալիրի փոքր դահլիճում տեղի ունեցավ երգչուհիներ Անչոկի, Նարի Հարությունյանի եւ վրացի երգիչ Սոսո Պավլիաշվիլիի համերգը: Երեկոն բացեց Անչոկը, կատարելով հին ու սիրված մի քանի երգեր: Նարի Հարությունյանը նույնպես կատարեց արդեն սիրված երգեր: Երգչուհիների ելույթն ավարտվեց «Իմ հրեշտակ» զուգերգով, որն արժանացավ հանդիսատեսի բարձր ծափահարություններին: Ծափահարություններն էլ ավելի բարձր հնչեցին, երբ բեմում հայտնվեց Սոսո Պավլիաշվիլին, ով ողջունելով հայ հանդիսատեսին` խոստացավ, որ համերգի ընթացքում կպարգեւի ջերմ ու բարձր տրամադրություն: Այդպես էլ եղավ, մոտավորապես երկու ժամ երգիչն իր կատարումներով ուրախացրեց ոչ միայն հայ, այլեւ հատուկ իր համար Վրաստանից Հայաստան ժամանած երկրպագուներին: Սոսոն վրացի եւ հայ հանդիսատեսին «ստիպեց» իր երգերի ներքո պարել հայկական պարեր, մերթ ընդ մերթ կրկնելով «ձեր ցավը» տանեմ արտահայտությունը: Երգիչը Հայաստան էր ժամանել ծնողների եւ մի քանի ազգականների հետ, որոնք ներկա էին համերգին: Ընթացքում Ս. Պավլիաշվիլին Հայաստանին եւ Երեւանին երգ նվիրելուց զատ, չմոռացավ նաեւ իր խոնարհումը բերել Հայոց ցեղասպանության անմեղ զոհերի հիշատակին.«Չենք կարող մոռանալ, թե ինչպես են կոտորել մեր նախնիներին: Այսօր թույլ չենք տա նույնկերպ վարվել մեր թոռների հետ: Սա մեծ ցավ է, որը մեր տատերից ու պապերից փոխանցվել է մեզ, այն մեզ ավելի ուժեղ ու բարի է դարձրել` մոտեցնելով Աստծուն»,- նշեց Սոսոն: Երգիչը խոստովանեց, որ շատ է կապված հայերի հետ, ինչն էլ պատճառ է դարձել, որ ստանձնի հայ ընտանիքներից մեկի երեխաների կնքահոր պարտականությունները: Սոսոյի եւ Նունե Եսայանի «Ուժեղ, քան նախկինում» երգը անակնկալ էր հանդիսատեսի համար, որը ընդունվեց բուռն ծափահարություններով: Համերգի վերջում հանդիսատեսն իր «բիսերով» Սոսոյին կրկին բեմ կանչեց, իսկ վերջինս հանդիսատեսի հետ միասին կատարեց իր հիթերից մեկը եւ շնորհակալություն հայտնեց ջերմության համար:
ԶՎԱՐԹ ԽԱՉԱՏՐՅԱՆ
