ՀԱՄԱՅՆՔՆԵՐԻ ՂԵԿԱՎԱՐՆԵՐԸ ԿԱՄԱՑ ՓՆԹՓՆԹՈՒՄ ՈՒ ՓՈՂ ԷԻՆ ՈՒԶՈՒՄ
Արխիվ 12-16ՀԱՄԱՅՆՔՆԵՐԻ ՂԵԿԱՎԱՐՆԵՐԸ ԿԱՄԱՑ ՓՆԹՓՆԹՈՒՄ ՈՒ ՓՈՂ ԷԻՆ ՈՒԶՈՒՄ
ԱԺ տարածքային կառավարման եւ տեղական ինքնակառավարման հարցերի մշտական հանձնաժողովը մայիսի 4-ին կազմակերպել էր խորհրդարանական լսումներ` «Համայնքների խոշորացում» թեմայով: Մի քանի ժամ տեւած քննարկման ժամանակ ուշագրավ էր այն, որ կարծիքներ էին արտահայտում, պատասխանում, բանավիճում ու պարզաբանում միայն պատգամավորները, կառավարության ու հասարակական կազմակերպությունների ներկայացուցիչները: Մինչդեռ «ձկան պես լուռ էին» ներկա համայնքապետերն ու մեծամասամբ մարզպետները, ինչի մասին, ցավով նշեց նաեւ հանձնաժողովի նախագահ, ԱԺ ԲՀԿ խմբակցության պատգամավոր Ստեփան Մարգարյանը: Ավելին` վերջիններս ո՛չ լավ, ո՛չ վատ կարծիք չցանկացան արտահայտել «Համայնքների խոշորացման» մասին` հրաժարվելով զրուցել անգամ լրատվամիջոցների հետ: Հակառակ դրան, նրանցից շատերը հետեւելով ելույթներին` միայն լուռ փնթփնթում էին, թե ավելացրեք համայնքներին հասանելիք բյուջեն ու նոր մեզնից պահանջեք որակյալ կառավարում: Ինչեւէ, հատկանշական էր, որ քննարկման վերջում պետական աթոռների վրա դողացող ու պաշտոնից չազատվելու համար բոլոր բարձրաձայնված քննադատությունները կուլ տվող համայնքապետերը ոչ թե մտահոգված էին իրենց համայնքների բարօրության, այլ խմբովի «ծրագրեր էին» մշակում` օրվա «ուտուշ-խմուշը» կազմակերպելու մասին:
ՀՐԱՆՏ ՍԱՐԱՖՅԱՆ
