«2017-Ի ԸՆՏՐՈՒԹՅՈՒՆՆԵՐԻՆ ԿՈՄԿՈՒՍԸ ՀԱՄԱՊԱՏԱՍԽԱՆ ՏՈԿՈՍՆԵՐ ԿՀԱՎԱՔԻ ՈՒ ԿՄՏՆԻ ՀՀ ԱԶԳԱՅԻՆ ԺՈՂՈՎ»
Արխիվ 12-16«2017-Ի ԸՆՏՐՈՒԹՅՈՒՆՆԵՐԻՆ ԿՈՄԿՈՒՍԸ ՀԱՄԱՊԱՏԱՍԽԱՆ ՏՈԿՈՍՆԵՐ ԿՀԱՎԱՔԻ
ՈՒ ԿՄՏՆԻ ՀՀ ԱԶԳԱՅԻՆ ԺՈՂՈՎ»
ԼՂՀ Կենտրոնական ընտրական հանձնաժողովը հրապարակել է խորհրդարանական ընտրությունների նախնական պաշտոնական արդյունքները: Ըստ որի` ԼՂՀ ԱԺ են անցել 5 քաղաքական ուժ` «Ազատ Հայրենիք», «Ազգային վերածնունդ», Արցախի ժողովրդավարական կուսակցություն, ՀՅԴ, «Շարժում 88»: Իսկ անցողիկ շեմը չեն կարողացել հաղթահարել երկու կուսակցություն` ԼՂ Կոմկուսը ու «Խաղաղություն եւ զարգացում» կուսակցությունը: Այս մասին «Իրավունքը» զրուցեց ՀԿԿ կենտկոմի առաջին քարտուղար ՏԱՃԱՏ ՍԱՐԳՍՅԱՆԻ հետ:
–Ընկեր Սարգսյան, ինչպե՞ս կգնահատեք ԼՂՀ խորհրդարանական ընտրությունների արդյունքները:
– Ճիշտն ասած, ոչ միայն ԼՂՀ, այլ ընդհանրապես նաեւ մեր` Հայաստանի Հանրապետությունում, ընտրությունները չեն կայանում: Ընտրություններում հատուկ ընդգծվում են, թե ում քանի տոկոս է հասնում եւ այլն:
Իհարկե, ընտրությունների արդյունքներին ծանոթ եմ, եւ ինձ առանձնապես հետաքրքրում էր ԼՂ Կոմունիստական կուսակցությունը, բայց, ցավոք, շատ քիչ ձայն էին հավաքել, իսկ մնացածը` ինչպես որ միշտ:
– Այնուամենայնիվ, ըստ Ձեզ, ի՞նչը խանգարեց Կոմկուսին հաջողության հասնել:
– Ինձ թվում է` երեւի, կազմակերպչական աշխատանքը կաղաց: Տարածքային կազմակերպությունները, հավանաբար, չկարողացան իրենց ուժերը մոբիլիզացնել: Բացի դա, նաեւ ոչ օբյեկտիվ վերաբերմունք եղավ ընտրությունների ժամանակ, ու դրա համար էլ այդպիսի ցածր տոկոս ունեցավ Կոմկուսն այս ընտրություններում:
– Ի դեպ, «Ժառանգություն» կուսակցության խոսնակ Դավիթ Սանասարյանը երեկ առանձնակի խանդավառությամբ նշել էր, թե լավ լուր է այն, որ Կոմունիստական կուսակցությունն Արցախի խորհրդարանում ներկայացված չէ: Ի՞նչ չի կարողանում կիսել «Ժառանգությունը» Կոմկուսի հետ:
– Ինձ համար զարմանալի է, որովհետեւ դրանք տարբեր քաղաքական հոսանքներ են: Ոչ մի համեմատություն «Ժառանգության» եւ Կոմունիստական կուսակցության միջեւ չի կարող լինել: Կոմկուսը ամուր գաղափարախոսություն ունեցող կուսակցություն է եւ այդ տեսակետից, եթե այդպիսի չարակամություն կա, դա միայն ու միայն խոսում է ոչ «Ժառանգության» օգտին: Կոմկուսը 100-ամյա կուսակցություն է, ու անհամեմատելի է «Ժառանգության» հետ, չգիտեմ, թե պատճառն ինչ է, որ իրենք այդպիսի բացասական տրամադրվածություն ունեն եւ ուրախացել են, որ Կոմկուսը խորհրդարան չի անցել:
– ԼՂՀ-ում Կոմունիստական կուսակցության ձախողումը խորհրդարանական ընտրություններին կխանգարի՞ ՀՀ Կոմկուսին մասնակցել 2017 թվականին կայանալիք ԱԺ ընտրություններին:
– Ինձ թվում է` սա լավ դաս եղավ, բայց Կոմկուսը կհամախմբվի, այդ թվում` Արցախի Կոմկուսը ակտիվ դերակատարություն կունենա, եւ ես չեմ կասկածում, որ 2017 թվականի ընտրություններին Կոմկուսն անպայման համապատասխան տոկոսներ կհավաքի եւ կմտնի Ազգային ժողով: Դրանում ես մի տոկոս չեմ կասկածում, ու դրա վառ ապացույցն էր մայիսմեկյան մեր երթը, որը շատ հզոր էր: Մարդիկ բարձր տրամադրությամբ, նպատակային ձեւով եկել էին մասնակցելու, կարծես թե, լավ տարիների շքերթը լիներ: Միգուցե, իշխանություններին դուր չեկավ դա, որովհետեւ Կոմկուսը արմատական ընդդիմադիր կուսակցություն է, բայց ինձ թվում է` առաջիկայում ամեն ինչ կլինի հոգուտ մեզ: Իսկ ինչ վերաբերում է ԼՂ Կոմկուսի համապատասխան տոկոսներ չհավաքելուն, ոչինչ, ամեն ինչ էլ լինում է, ու ամեն ինչ դեռ առջեւում է:
ՀՐԱՆՏ ՍԱՐԱՖՅԱՆ
