"ԱՆԸՆԴՈՒՆԵԼԻ ԵՄ ՀԱՄԱՐՈՒՄ 74 ՏԱՐԵԿԱՆ ԿՆՈՋ ՀԱՆԴԵՊ ԽԱՓԱՆՄԱՆ ՄԻՋՈՑ ԿԻՐԱՌԵԼ ԿԱԼԱՆՔԸ"
Արխիվ 12-16ԽԱՓԱՆՄԱՆ ՄԻՋՈՑ ԿԻՐԱՌԵԼ ԿԱԼԱՆՔԸ"
Երեկ երեկոյան կալանավորվել է ԽՍՀՄ Գերագույն սովետի նախկին պատգամավոր, ԱԺ 4-րդ գումարման ԲՀԿ-ական պատգամավոր, "Գարուն" արտադրական միավորման սեփականատեր Գոհար Ենոքյանը: Ավելին` այս մութ պատմության առնչությամբ տարածվող լուրերում շոշափվում է ԱԺ ԲՀԿ խմբակցության պատգամավոր Կարո Կարապետյանի` Ցուվեցի Կարոյի անունը: Պատճառները պարզելու համար "Իրավունքը" նախեւառաջ փորձեց կապ հաստատել ՀՔԾ-ի հետ, սակայն ապարդյուն: Ի վերջո, մեզ հաջողվեց ուշ երեկոյան զրուցել ԱԺ ԲՀԿ խմբակցության ղեկավար ՆԱԻՐԱ ԶՈՀՐԱԲՅԱՆԻ հետ, ով հենց այդ պահին գտնվում էր ՀՔԾ-ում ու անձամբ զրուցել էր տիկին Ենոքյանի հետ, ինչի մասին նշեց.
–Կարծում եմ` Հատուկ քննչական ծառայության իրավասության շրջանակում է հարցին պարզաբանում տալ, թե ինչու է տիկին Ենոքյանի հանդեպ խափանման միջոց ընտրվել կալանքը եւ ինչ մեղադրանքով: Իհարկե, ես զրուցել եմ տիկին Ենոքյանի հետ եւ ներկայացրել է իր վարկածը, իր տեսակետը, բայց ինձ իրավասու չեմ համարում այդ մասին խոսել: Այս պահին ինձ զուտ հետաքրքրում է տիկին Ենոքյանի առողջական վիճակը, որովհետեւ նա ունի շատ բարձր ճնշում, ունի նաեւ առողջական շատ լուրջ այլ խնդիրներ (կանացի): Եվ ես` որպես պատգամավոր, որպես կին, ուղղակի, անընդունելի եմ համարում 74 տարեկան կնոջ հանդեպ խափանման միջոց կիրառել կալանքը: Ակնկալում եմ, որ իմ պատգամավոր գործընկերներն էլ կմիանան իրենց ստորագրությամբ, որպեսզի դիմենք` տիկին Ենոքյանի խափանման միջոցը փոխելու համար: Հիմա դեռ այստեղ եմ եւ հույս ունեմ, որ հենց այսօր էլ հնարավոր կլինի խափանման միջոցը փոխել:
– Տիկին Զոհրաբյան, մամուլում նաեւ այս գործով շրջանառվում է ԱԺ ԲՀԿ խմբակցության պատգամավոր Կարո Կարապետյանի անունը, որեւէ տեղեկություն ունե՞ք այս մասին:
– Ո՛չ, կարծում եմ` բոլոր պարզաբանումները պետք է ստանալ իրավապահ մարմիններից: Իսկ ինձ այս պահին հետաքրքում է միայն տիկին Ենոքյանի առողջական վիճակը, որովհետեւ կրկնում եմ` տիկին Ենոքյանի առողջական վիճակն այնպիսին է, որ չեմ կարծում, թե այդպիսի առողջական վիճակով նրա հանդեպ որպես խափանման միջոց կալանքը ընտրելը ճիշտ է: Ինչ վերաբերում է գործի իրավական կողմին, այդ հարցով թող պարզաբանումներ տան իրավապահ մարմինները:
Ի դեպ, նշենք, որ որոշ ժամանակ առաջ կալանավորվել էր նաեւ Գ.Ենոքյանի հարազատներից մեկը, որը նույնպես առնչվում էր "Գարուն" արտադրական միավորման հետ: Հավելենք նաեւ, որ "Իրավունքը" փորձեց գործի առնչությամբ պարզաբանում ստանալ նաեւ ԱԺ ԲՀԿ խմբակցության պատգամավոր Կ.Կարապետյանից, սակայն նրա հեռախոսազանգին ուշ երեկոյան պատասխանեց մեկ այլ տղամարդ` վստահեցնելով, որ պարոն Կարապետյանը այդ պահին զբաղված է եւ կպատասխանի ավելի ուշ: Բայց այդպես էլ նրան չհաջողվեց գտնել:
ՀՐԱՆՏ ՍԱՐԱՖՅԱՆ
Հավանեցի՞ր հոդվածը, կիսվիր ընկերներիդ հետ
