ԼԵՎՈՆ ՏԵՐ-ՊԵՏՐՈՍՅԱՆԻ ԽՆԱՄԻՆ ԴԱՐՁԻ՞ Է ԵԿԵԼ
Արխիվ 12-16ԼԵՎՈՆ ՏԵՐ-ՊԵՏՐՈՍՅԱՆԻ ԽՆԱՄԻՆ ԴԱՐՁԻ՞ Է ԵԿԵԼ
Ազգային անվտանգության պետական վարչության նախկին պետ, ՀՀ առաջին նախագահ Լեւոն Տեր-Պետրոսյանի խնամին, «Համաձայնություն» կենտրոնի ղեկավար Դավիթ Շահնազարյանը «Շաբաթ երեկո Կարմենի մոտ» հաղորդաշարում եւս մեկ անգամ հայտարարել է` ՀՀ երկրորդ նախագահ Ռոբերտ Քոչարյանի տեղը բանտն է, նա հանցագործ է, սահմանադրությունը բռնի կերպով ոտնահարելով դարձավ նախագահ:
Լեւոն Տեր-Պետրոսյանի խնամին, իհարկե, նորություն չի ասում, քանի որ այդ մասին տարբեր լրատվամիջոցներ, այդ թվում նաեւ` «Իրավունքը» բազմիսց գրել է, սակայն ԱԱԾ նախկին պետը հերթական անգամ, «Հին ընկերներին չեն մոռանում» կարգախոսով առաջնորդվելով` կողմնակալ վերաբերմունք է դրսեւորում ՆԳ նախկին նախարար, հետախուզման մեջ գտնվող Վանո Սիրադեղյանի հանդեպ: Մասնավորապես, «Համաձայնություն» կենտրոնի ղեկավարը Սիրադեղյանին համարում է մեր պետականության մեջ ներդրում ունեցող գործչի, ցանկանում, որ Վանոն վերադառնա, բայց քար լռություն է պահպանում Սիրադեղյանին առաջադրված մեղադրանքի ու նրա հանցագործ լինելու մասին, որի վերաբերյալ եւս տարբեր տարիներին եղել են հրապարակումներ: Նախկին պաշտոնյային ընդամենը հիշեցնենք`Սիրադեղյանին առաջադրված մեղադրանքը բաղկացած է ինը դրվագից:
Անդրադառնալով իր եւ Լեւոն Տեր-Պետրոսյանի հարաբերություններին`խնամի Շահնազարյանը հավաստիացնում է` քաղաքական կոնսուլտացիաներ չկան իր եւ Տեր-Պետրոսյանի միջեւ, սակայն Քոչարյանի նկատմամբ խորը հակակրանքը նրան, այնուամենայնիվ, ստիպում է «կծել» ՀԱԿ առաջնորդին` ասելով, որ ճիշտ չէր համաժողովրդական շարժումը դնել ԲՀԿ-ի տրամադրության տակ: Իսկ ԲՀԿ-ն մինչ փետրվարի քսանի հանրահավաքի չեղյալ համարվելն ու դրան հաջորդած գործողությունները համարվում էր Քոչարյանի «արբանյակը»:
ԱԱԾ նախկին պետը, սակայն, մի ուշագրավ հայտարարություն էլ է անում: Նա հայտարարում է, որ բազմիցս է քննադատել Սերժ Սարգսյանին, բայց հիմա ցանկացած հեղափոխական իշխանափոխություն սպառնալիք է մեր պետությանը: Մինչդեռ Դավիթ Շահնազարյանը նախորդ տարի բավական ոգեւորված էր Ուկրանիայում ստեղծված մայդանային իրավիճակով, ավելին` Շահնազարյանը հայտարարում էր, որ «Մայդանում պայքարում են ոչ միայն ուկրաինացիների, այլև մեր ժողովրդի ազատության ու անկախության համար, որովհետև Ռուսաստանը շարունակում է կիրառել իր նեո-կայսերական քաղաքականությունը Հայաստանի և Ուկրաինայի նկատմամբ»:
Թե ինչ շահեց մեր ժողովուրդը մայդանային արյունալի իրավիճակից, քաղաքագետներն ու փորձագետները լավագույնս կվերլուծեն, բայց ՀՀՇ-ական նախկին պաշտոնյայի խաղաղասիրական հայտարարությունից կարելի է ենթադրել` հավանաբար, նախկին ՀՀՇ-ականը դարձի է եկել:
ՍՈՆԱ ԴԱՎԹՅԱՆ
Read more at: http://168.am/2014/01/21/320453.html
Copyright © c.bavota
