ՀԱՅ ՍՊԱՌՈՂԸ ՄՏԱՀՈԳՎԱԾ Է «ԿԻՆԴԵՐ ՍՅՈՒՐՊՐԻԶ» ՆԱՐԻՆՋՆԵՐՈՎ
Արխիվ 12-16ՀԱՅ ՍՊԱՌՈՂԸ ՄՏԱՀՈԳՎԱԾ Է «ԿԻՆԴԵՐ ՍՅՈՒՐՊՐԻԶ»
ՆԱՐԻՆՋՆԵՐՈՎ
Արդեն մի քանի օր է համացանցը ցնցել է Լիբիայից Ալժիր ներկրված և Ալժիրի մաքսային ծառայության աշխատակիցների կողմից առգրավված նարնջի մեծ խմբաքանակի մասին լուրը: Տարածված տեղեկության համաձայն նարինջը սրսկված է եղել ՄԻԱՎ և ՁԻԱՀ վարակակիր արյամբ: Ալժիրից ծնունդ առած ու հայ սպառողին հասած այս լուրը, հայ սպառողի մոտ անմեղ հարց է առաջացնում՝ թե օրինակ, նույն Լիբիայից նարինջ ներկրվո՞ւմ է արդյոք Հայաստան և եթե այո, ապա՝ դրանք պատշաճ ստուգում անցնում են հայ մաքսավորների կողմից, թե՝ ոչ: Մինչ Հայաստան ներկրվող նարնջի աշխարհագրությունը պարզելը, «Իրավունք»-ը զրուցեց «Իրազեկ և պաշտպանված սպառող» ՀԿ նախագահ Բաբկեն Պիպոյանի հետ, ճշտելու համար, թե Հայաստանում նարնջի «պարունակությունը» պարզելու վերաբերյալ ստուգումներ իրականացվու՞մ է: Բ. Պիպոյանի, տեղեկացմամբ ՄԻԱՎ-ի և ՁԻԱՀ-ի հարուցիչը արտաքին միջավայրում անկայուն է և եթե նույնիսկ նարնջի մեջ նման «զանգված» ներարկվի, ապա մի քանի վայրկյանի ընթացքում վտանգը կվերանա: Այսինքն նման արյամբ «հագեցած» նարինջը ՄԻԱՎ, ՁԻԱՀ վարակի աղբյուր հանդիսանալ չի կարող: «Տվյալ պարագայում տվյալ հայտարարությունը կիսահակագիտական է և մեղմ ասած այստեղ երևում է աֆրիկյան դիրքորոշումը: Բայց էականն այստեղ այլ հարց է, թե՝ ինչեր են փորձում հայտնաբերել, որը մենք չենք էլ փորձում: Հարցն այն է, թե աշխարհն ինչպես է ընկալում սննդի անվտանգություն ասվածը, ինչպե՞ս է մոտենում խնդրին և ինչպես են փորձում խորանալ խնդիրների մեջ, նույնիսկ աֆրիկյան երկրները, իսկ մե՞նք ինչքան ենք փորձում խորանալ»,- ասում է Բ. Պիպոյանը:
ԱՐՄԻՆԵ ԳՐԻԳՈՐՅԱՆ
